រាជធានីភ្នំពេញ ៖ ប្រជាពលរដ្ឋនៅទីជនបទទំនងជាអាចទទួលបានការងារធ្វើនៅមូលដ្ឋានរបស់ខ្លួនតាមរយៈកញ្ចប់ថវិកាពលកម្មរបស់រដ្ឋ ដូចជាការជីកប្រឡាយ ឬកសាងហេដ្ឋារចនាសម្ព័ន្ធនានា។ កញ្ចប់ថវិកានឹងធ្វើឲ្យពលរដ្ឋអាចទទួលបានផលប្រយោជន៍ពីរ ទី១-បានប្រាក់ឈ្នួលចិញ្ចឹមជីវិតពេលមានវិបត្តិកូវីដ១៩ និងទី២- ទទួលការអភិវឌ្ឍក្នុងសហគមន៍ ។
ក្នុងពេលអញ្ជើញពិនិត្យដំណើរសាងសង់អាកាសដ្ឋានអន្តរជាតិភ្នំពេញថ្មីនាព្រឹកថ្ងៃទី២២មិថុនានេះ សម្តេចតេជោ ហ៊ុន សែន នាយករដ្ឋមន្ត្រីបានប្រកាសថារដ្ឋនឹងទម្លាក់ទុនទៅទីជនបទ ដែលគេហៅថាថវិកាពលកម្ម ១០០លានដុល្លារ ដើម្បីឲ្យពលរដ្ឋមានការងារធ្វើ មានប្រាក់ឈ្នួលចិញ្ចឹមជីវិត។ នាយករដ្ឋមន្ត្រីគូសបញ្ជាក់ថា «តាមការជីកប្រឡាយទឹកតូចៗ បម្រើការអភិវឌ្ឍន៍នៅមូលដ្ឋានគាត់ផង គាត់បានប្រាក់ចិញ្ចឹមជីវិតទៀត» ។
នេះជាវិធានការមួយក្នុងចំណោមវិធានផ្សេងៗ ដែលរដ្ឋាភិបាលគ្រោងជួយពលរដ្ឋនៅពេលលំបាកដោយសារកូវីដ១៩នេះ។ នៅថ្ងៃទី២៤មិថុនាខាងមុខនេះ រដ្ឋាភិបាលនឹងប្រកាសពីកញ្ចប់ថវិកាឧបត្ថម្ភដល់ពលរដ្ឋក្រីក្រដែលងាយរងផលប៉ះពាល់ដោយសារកូវីដ១៩នេះដែរ។ ប្រមុខដឹកនាំអះអាងថា រដ្ឋគ្រោងចំណាយ២៥លានដុល្លារក្នុងខែដើម្បីឧបត្ថម្ភ ជីវភាពពលរដ្ឋក្រីក្រីនៅទូទាំងប្រទេស ដែលមានចំនួន៦០ម៉ឺនគ្រួសារ។ ពេលវិបត្តិកូវី១៩នេះ យើងមិនបានទុកឲ្យពលរដ្ឋណាម្នាក់ស្លាប់ដោយសារដាច់បាយ ដោយយើងមិនបានដឹងនិងមិនបានដោះស្រាយនោះទេ ។ នេះជាការបញ្ជាក់របស់ប្រមុខរដ្ឋាភិបាល » ។
សេដ្ឋកិច្ចកម្ពុជានៅតែអាចគ្រប់គ្រងបាននៅក្នុងកាលៈទេសៈលំបាកនេះ ទោះបីបានធ្លាក់ចុះបន្តិចក៍ដោយនោះ។ ចំណូលចរន្តមានប្រមាណ៤០០លានដុល្លារក្នុងមួយខែអាចឲ្យរដ្ឋបើកបៀវត្សមន្ត្រីរាជការនិងជួយសង្គ្រោះពលរដ្ឋក្រីក្ររងគ្រោះពីកូវីដ១៩បានក្នុងពេលតែមួយ នេះបើតាមការបញ្ជាក់ពីប្រមុខរាជរដ្ឋាភិបាល សម្តេចតេជោ ហ៊ុន សែន៕
ចែករំលែកព័តមាននេះ