ខេត្តសៀមរាប ៖ កាលពីថ្ងៃទី១៨ ខែមិថុនា ឆ្នាំ២០២០ កម្លាំងផ្នែកគ្រប់គ្រងជនបរទេសដឹកនាំដោយលោកវរសេនីយ៍ទោ អារុណ រតនា អធិការរងទទួលការងារគ្រប់គ្រងជនបរទេស សហការជាមួយកម្លាំងប៉ុស្តិ៍នគរបាលរដ្ឋបាលស្វាយដង្គំ…
ខេត្តសៀមរាប ៖ កាលពីថ្ងៃទី១៨ ខែមិថុនា ឆ្នាំ២០២០ កម្លាំងផ្នែកគ្រប់គ្រងជនបរទេសដឹកនាំដោយលោកវរសេនីយ៍ទោ អារុណ រតនា អធិការរងទទួលការងារគ្រប់គ្រងជនបរទេស សហការជាមួយកម្លាំងប៉ុស្តិ៍នគរបាលរដ្ឋបាលស្វាយដង្គំ ចុះធ្វើការត្រួតពិនិត្យជនបរទេសស្នាក់នៅដោយខុសច្បាប់ នៅចំណុចផ្លូវសុខសាន្ត ស្ថិតនៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប។
តាមប្រភពពីសមត្ថកិច្ចនគរបាលក្រុងបានប្រាប់ថា ក្នុងការចុះពិនិត្យខាងលើ បានរកឃើញជនបរទេសម្នាក់ដែលស្នាក់នៅខុសច្បាប់ ឈ្មោះClARKE ANTHONY DAVID ភេទប្រុស អាយុ៦៤ឆ្នាំ ជាជនជាតិអង់គ្លេស លិខិតឆ្លងដែនលេខ៥៤០៦២៩១៩២ ។
តាមប្រភពដដែលបានបន្តថា តាមការបំភ្លឺពីបុរសជាជនបរទេសម្នាក់ខាងលើបានឱ្យដឹងថា គាត់ចូលមកក្នុងប្រទេសកម្ពុជាតាមច្រកទ្វារព្រលានយន្តហោះខេត្តព្រះសីហនុ ក្នុងអំឡុងខែកញ្ញា ឆ្នាំ ២០១៧ ក្នុងគោល បំណងជាអ្នកទេសចរណ៍។
បុរសជាជនបរទេសខាងលើបានបន្តថា ក្រោយពីបន្តទិដ្ឋាការជាអ្នកវិនិយោគរួចមក គាត់បានធ្វើដំណើរ មកស្នាក់នៅខេត្តសៀមរាបអស់រយៈពេលជាងមួយឆ្នាំ ដោយពុំបានប្រកបរបបអ្វីនោះទេ បន្ទាប់មកទៀត ធ្វើដំណើរទៅកាន់ខេត្តកំពតអស់រយៈពេល៣ខែនឹងបន្តស្នាក់នៅខេត្តកំពង់ចាមអស់រយៈពេលជាង២សប្តាហ៍ ចុងក្រោយធ្វើដំណើរតាមរថយន្តក្រុងមកកាន់ក្រុងសៀមរាបនៅថ្ងៃទី១៥ ខែមិថុនា ឆ្នាំ២០២០។ ទិដ្ឋាការរបស់គាត់បានផុតកំណត់នៅថ្ងៃទី១០ ខែកុម្ភៈ ឆ្នាំ២០១៩។
បច្ចុប្បន្ន បុរសជាជនបរទេសខាងលើនេះគ្មានថវិកាក្នុងការចំណាយហូបចុក និងស្នាក់នៅក្នុងក្រុងសៀមរាបនោះទេ ។
ក្រោយការសាកសួរ និងកសាងសំណុំរឿងរួចមក ដោយមានការឯកភាពពីលោកវរសេនីយ៍ឯក ណុប សារ៉ាក់ ជាអធិការ ក៏បញ្ជូនបុរសជាជនបរទេសរូបនោះចេញពីអធិការដ្ឋាននគរបាលក្រុងឱ្យទៅការិយាល័យស៊ើបអង្កេត និងអនុវត្តនីតិវិធីនៃស្នងការដ្ឋាននគរបាលខេត្តសៀមរាប ចាត់ការតាមនីតិវិធីបន្ត ហើយបញ្ជូនបន្តទៅអគ្គនាយកនៃអគ្គនាយកដ្ឋានអន្តោប្រវេសន៍ប្រវេសន៍ដើម្បីចាត់ការបន្ត៕ (កែសម្រួលដោយ ៖ ធីតា)
ចែករំលែកព័តមាននេះ