រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ជានគរបាលមន្ទីរប្រឆាំងគ្រឿងញៀនបានលួចលាក់មានស្រីថ្មី (ប្រពន្ធចុង) ហើយត្រូវប្រពន្ធដើមលួចដាក់ GPS នឹងម៉ូតូ រួចក៏តាមទាន់ប្តីដល់បន្ទប់ជួលឃើញស្តែងនឹងភ្នែក ស្ត្រីជាប្រពន្ធដើមក៏ចាក់សោពីក្រៅ…
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ជានគរបាលមន្ទីរប្រឆាំងគ្រឿងញៀនបានលួចលាក់មានស្រីថ្មី (ប្រពន្ធចុង) ហើយត្រូវប្រពន្ធដើមលួចដាក់ GPS នឹងម៉ូតូ រួចក៏តាមទាន់ប្តីដល់បន្ទប់ជួលឃើញស្តែងនឹងភ្នែក ស្ត្រីជាប្រពន្ធដើមក៏ចាក់សោពីក្រៅ រួចប្តឹងសមត្ថកិច្ចឱ្យជួយអន្តរាគមន៍តែម្តង បង្កឱ្យមានការភ្ញាក់ផ្អើលកាលពីម៉ោង១០និង២០នាទីយប់ថ្ងៃទី២១ ខែមិថុនា ឆ្នាំ២០២០ នៅផ្ទះជួល ស្ថិតក្នុងភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ ។
សេចក្តីរាយការណ៍បន្តថា បុរសខាងលើឈ្មោះហៅ ភា អាយុ៣៩ឆ្នាំ មុខរបរជាមន្ត្រីនគរបាលមន្ទីរប្រឆាំងគ្រឿងញៀន រស់នៅភូមិអូដឹម សង្កាត់ចោមចៅទី៣ ខណ្ឌពោធិ៍សែនជ័យ ។ ចំណែកស្ត្រីជាប្រពន្ធដើមឈ្មោះហៅ ចាន់រស្មី មានកូន២នាក់ ដោយឡែកស្រីស្នេហ៍លួចលាក់មិនស្គាល់អត្តសញ្ញាណ រស់នៅផ្ទះជួលកើតហេតុខាងលើ មានកូនស្រីម្នាក់ ។
តាមប្រភពពីប្រពន្ធដើមបានឱ្យដឹងថា ប្តីរបស់គាត់បានរៀបអាពាហ៍ពិពាហ៍ជាច្រើនឆ្នាំមកហើយ មានចំណងអាពាហ៍ពិពាហ៍បានកូនចំនួន២នាក់ ដោយកូនបងអាយុ១៥ឆ្នាំ និងកូនប្អូនអាយុជាង៤ឆ្នាំ ។ ប្តីរបស់គាត់បានលួចលាក់មានស្រីថ្មីរយៈពេលជាង៥ឆ្នាំមកហើយ តែមិនទាន់ជាក់ស្ដែងនោះទេ។
តាមប្រពន្ធដើមបន្តថា នៅមុនពេលកើតហេតុ គាត់ជាប្រពន្ធដើមបានលួចដាក់ GPS នឹងម៉ូតូរបស់ប្តីរបស់គាត់ បន្ទាប់ពីប្តីរបស់គាត់បានជិះម៉ូតូមកដេកជាមួយស្រីលួចលាក់ ហើយប្រពន្ធរួមទាំងបងប្អូនបាននាំគ្នាមកឃើញស្តែងនឹងភ្នែកថា ប្តីរបស់ខ្លួនមករស់នៅបន្ទប់ខាងលើ ទើបបង្កឱ្យមានការភ្ញាក់ផ្អើលដល់ម្ចាស់ផ្ទះតែម្តង។ គ្រានោះស្ត្រីជាប្រពន្ធបានយកសោមកចាក់ពីខាងក្រៅ រួចប្តឹងសមត្ថកិច្ចឱ្យជួយអន្តរាគមន៍ភ្លាមៗផងដែរ ។
ខណៈពេលភ្លាមៗនោះ ម្ចាស់ផ្ទះមិនឱ្យស្ត្រីជាប្រពន្ធដើមចាក់សោពីខាងក្រៅ និងមិនឱ្យធាក់បន្ទប់ជួលខាងលើទេ គឺរង់ចាំសមត្ថកិច្ចមកចាត់ការតាមនីតិវិធី ។
ប្រភពដដែលបន្តទៀតថា បន្ទាប់ពីសមត្ថកិច្ចនគរបាលប៉ុស្តិ៍ចោមចៅទី៣ មកដល់បានណែនាំស្ត្រីជាប្រពន្ធដើម និងបុរសជាប្តីឲ្យទៅដោះស្រាយគ្នានៅប៉ុស្តិ៍នគរបាលចោមចៅ៣ តែប្រពន្ធដើមមិនអស់ចិត្ត ចង់ឱ្យសមត្ថកិច្ចនគរបាលប៉ុស្តិ៍នាំស្ត្រីជាប្រពន្ធលួចលាក់យកទៅណែនាំនៅប៉ុស្តិ៍ ប៉ុន្តែសមត្ថកិច្ចមិនបាននាំស្ត្រីជាប្រពន្ធលួចលាក់ទៅប៉ុស្តិ៍នោះឡើយ ។
បន្ទាប់ពីការណែនាំម្តងជាពីរដងរួច បុរសជាប្តី និងស្ត្រីជាប្រពន្ធដើម បានមកប៉ុស្តិ៍ហើយសមត្ថកិច្ចណែនាំករណីលួចលាក់មានស្រីថ្មី បើប្រពន្ធតាមទាន់ប្តីមានសហាយ គឺប្រពន្ធអាចប្តឹង សមត្ថកិច្ចឃាត់ប្តី មិនមែនឃាត់ស្ត្រីជាប្រពន្ធលួចលាក់ទេ ។ បើកាលណា ប្រពន្ធ លួចមានប្រុសថ្មីវិញ ប្តីប្តឹងសមត្ថកិច្ចឃាត់ប្រពន្ធ តែមិនមែនឃាត់ប្រុសដែលលួចជាមួយប្រពន្ធនោះឡើយ ។
ក្រោយពីសមត្ថកិច្ចសាកសួរ បុរសជាប្តីបានសារភាពថា ប្រពន្ធដែលលួចលាក់ខាងលើ គឺមានការទំនាក់ទំនងស្នេហាអស់រយៈពេល១០ឆ្នាំមកហើយ មិនមែន៥ឆ្នាំទេ ដោយថែមទាំងមានកូនស្រីអាយុ៧ឆ្នាំទៀតផង ។
ក្រោយពេលកើតហេតុ បន្ទាប់ពីសមត្ថកិច្ចណែនាំហើយ រឿងរ៉ាវបានបែកធ្លាយ បុរសជាប្តីនឹងដោះស្រាយជាមួយប្រពន្ធដើមដោយនឹងលែងលះគ្នានៅសាលាសង្កាត់ ហើយខ្លួនសុំចុះចោលប្រពន្ធ និងកូន ទៅដោយខ្លួនទទេ រួចទៅរស់ជាមួយប្រពន្ធចុងវិញ ៕ (កែសម្រួលដោយ ៖ បុប្ផា)
ចែករំលែកព័តមាននេះ