ប្រទេសបារាំង ៖ រដ្ឋាភិបាលបារាំងបាននិយាយកាលពីថ្ងៃសៅរ៍ថា កីឡាដ្ឋានបាល់ទាត់ទាំងអស់នៅក្នុងប្រទេសបារាំង នឹងបើកឱ្យមានអ្នកគាំទ្រចូលទស្សនាសារជាថ្មី ចាប់ពីថ្ងៃទី១១ ខែកក្កដា ខណៈប្រទេសនេះកំពុងបន្តបន្ធូរបន្ថយវិធានការមួយចំនួន ដែលបានដាក់ដើម្បីទប់ស្កាត់ការរីករាលនៃកូវីដ-១៩។
បើតាមការបញ្ជាក់ពីអាជ្ញាធរបានឱ្យដឹងថា អ្នកគាំទ្រចំនួន ៥.០០០នាក់នឹងត្រូវបានអនុញ្ញាតឱ្យចូលទស្សនាក្នុងកីឡដ្ឋានសម្រាប់ការប្រកួតម្តង ដែលនេះគឺជាការដាក់កម្រិតក្នុងការរក្សាគម្លាត ដើម្បីបង្ការការរីករាលនៃវីរុសកូវីដ-១៩។
សូមជម្រាប់ថា បើទោះបីជាការប្រកួតលីគបាល់ទាត់ត្រូវបានរំសាយ សម្រាប់រដូវកាលនេះក៏ដោយ ប៉ុន្តែការប្រកួតដណ្តើមពានរង្វាន់ Coupe de France និងពានរង្វាន់ Coupe de la Ligue វគ្គផ្តាច់ព្រ័ត្រនៅតែត្រូវលេងតាមការគ្រោងទុក ខណៈបច្ចុប្បន្នកំពុងពិភាក្សាពីពេលវេលាប្រកួត ។
ក្រៅពីការប្រកួតពានរង្វាន់ទាំងពីរ អ្នកគាំទ្រក៏នឹងអាចទស្សនាក្រុមរបស់ពួកគេ លេងក្នុងការប្រកួតលក្ខណៈមិត្តភាព មុនចាប់ផ្តើមរដូវកាលថ្មីផងដែរ។
សូមរំលឹកថា ក្របខណ្ឌ Ligue 1 រដូវកាល ២០១៩-២០ របស់បារាំងត្រូវបានរំសាយចោលជាផ្លូវការកាលពីនៅថ្ងៃទី៣០ ខែមេសា ដោយក្នុងនោះម្ចាស់ជើងឯកបានទៅលើក្រុម PSG ។ Ligue 1 ក្លាយជាលីគបាល់ទាត់ធំបំផុតតែមួយគត់ក្នុងចំណោមលីគធំៗទាំង ៥ នៅទ្វីបអឺរ៉ុប ដែលត្រូវរំសាយដោយសារកូវីដ-១៩ ៕ (ដកស្រង់ចេញពី Reuters)
ចែករំលែកព័តមាននេះ