រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា យុវជនម្នាក់ទិញថ្នាំញៀនមួយកញ្ចប់តូចពីមិត្តភ័ក្ដិលក់នៅក្នុង (ណេត សូល) យកមកសម្ងំជក់តែម្នាក់ឯងនៅមុខផ្ទះក្បែររបងវត្តថាន់ យ៉ាងសប្បាយ ក៏ត្រូវកម្លាំងល្បាតប៉ុស្តិ៍នគរបាលរដ្ឋបាលទន្លេបាសាក់ល្បាត ទៅដល់កន្លែងនោះប្រទះឃើញ…
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា យុវជនម្នាក់ទិញថ្នាំញៀនមួយកញ្ចប់តូចពីមិត្តភ័ក្ដិលក់នៅក្នុង (ណេត សូល) យកមកសម្ងំជក់តែម្នាក់ឯងនៅមុខផ្ទះក្បែររបងវត្តថាន់ យ៉ាងសប្បាយ ក៏ត្រូវកម្លាំងល្បាតប៉ុស្តិ៍នគរបាលរដ្ឋបាលទន្លេបាសាក់ល្បាត ទៅដល់កន្លែងនោះប្រទះឃើញ ក៏ឃាត់ខ្លួនជាក់ស្តែងតែម្តង បង្កឱ្យមានការភ្ញាក់ផ្អើលកាលពីម៉ោង12និង30នាទីរំលងអធ្រាត្រឈានចូលថ្ងៃទី២០ ខែមិថុនា ឆ្នាំ២០២០ នៅចំណុចមុខផ្ទះជនសង្ស័យ ផ្ទះលេខ58Z ផ្លូវសុធារស ស្ថិតក្នុងភូមិ7 ក្រុម37 សង្កាត់ទន្លេបាសាក់ ខណ្ឌចំការមន ។
សេចក្តីរាយការណ៍បន្តថា ជនសង្ស័យខាងលើមានឈ្មោះ សុខ ដារ៉ាឧត្ដម ភេទប្រុស អាយុ28ឆ្នាំ មុខរបរមិនពិតប្រាកដ ស្នាក់នៅផ្ទះកើតហេតុខាងលើ ។
ប្រភពព័ត៌មានបានប្រាប់ឱ្យដឹងថា មុនពេលកើតហេតុ គឺកម្លាំងល្បាតប៉ុស្តិ៍នគរបាលរដ្ឋបាលទន្លេបាសាក់ កំពុងល្បាតពួនស្ទាក់ក្នុងមូលដ្ឋានទប់ស្កាត់បទល្មើស ដើម្បីការពារសុវត្ថិភាពជូនប្រជាពលរដ្ឋក្នុងមូលដ្ឋាន ។ ខណៈពេលកំពុងល្បាតមកដល់ចំណុចកើតហេតុខាងលើ ក៏ប្រទះឃើញជនសង្ស័យកំពុងសម្ងំជក់ថ្នាំញៀនតែម្នាក់ឯងនៅមុខផ្ទះរបស់ខ្លួនក្បែររបងវត្តថាន់ ក៏ឃាត់ខ្លួនជាក់ស្ដែងតែម្តង រួមទាំងដកហូតបានវត្ថុតាងដូចជា ឧបករណ៍ជក់មួយកំប្លេរ រួចនាំមកកាន់ប៉ុស្តិ៍នគរបាលរដ្ឋបាលទន្លេបាសាក់ ដើម្បីចាត់ការតាមនិតិវិធី។
បើតាមចម្លើយសារភាពពីជនសង្ស័យបានប្រាប់ឱ្យដឹងថា ថ្នាំញៀននោះ រូបគេទិញពីមិត្តភ័ក្ដិនៅ «ណេតសូល» យកមកសម្ងំជក់តែម្នាក់នៅមុខផ្ទះ ហើយខណៈពេលកំពុងតែជក់នោះ ក៏ត្រូវសមត្ថកិច្ចទៅដល់រួចឃាត់ខ្លួនរូបគេតែម្តង។
បច្ចុប្បន្នជនសង្ស័យ ត្រូវបានសមត្ថកិច្ចកសាងសំណុំរឿងបញ្ជូនទៅកាន់អធិកាដ្ឋានខណ្ឌចំការមន ចាត់ការបន្តតាមនីតិវិធីច្បាប់ហើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ