រាជធានីភ្នំពេញ៖ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកង ទ័ពជើងគោក ថ្មីៗនេះបានលើកឡើងថា កងកម្លាំងនគរបាលជាតិ កងទ័ព កងអាវុធហត្ថ ដើរតួនាទីយ៉ាងសំខាន់ក្នុងការការពារសនិ្តសុខសម្រាប់ជាតិ និងមាតុភូមិ ដូច្នេះហើយលោកបានលើកឡើងថា មានអ្នកខ្លះមើលមកកងកម្លាំងប្រដាប់អាវុធខ្មៅណាស់ ដូច្នេះលោកសូមចិត្តបងប្អូនពលរដ្ឋ សូមឲ្យមើលកងកម្លាំងប្រដាប់អាវុធ កងនគរបាលជាតិ កងទ័ព កងរាជអាវុធហត្ថនៅក្នុងផ្លូវល្អខ្លះផង ។
លោកឧត្តមសេនីយ៍ឯក ហ៊ុន ម៉ាណែត ដែលជាកូនប្រុសច្បងរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងយ៉ាងដូច្នេះជាឱកាសអញ្ជើញប្រគល់រថយន្ត ២៩០គ្រឿង ដែលទិញពីប្រទេសចិន និងជាអំណោយសម្តេចតេជោ និងសម្តេចកិត្តិព្រឹទ្ធបណ្ឌិត ជូនកងទ័ព និងនគរបាល កាលពីថ្ងៃទី ១៨ មិថុនា ឆ្នាំ២០២០ កន្លងទៅ ។
លោកបានលើកឡើងថា ជុំវិញរឿងទិញរថយន្ត ២៩០ គ្រឿងពីប្រទេសចិននោះ គឺលោកបានឃើញថា មានការចាប់អារម្មណ៍ច្រើនណាស់តាំងពីឡាននេះ ចុះកប៉ាល់ជាន់ដីខ្មែរ ។ មានការចុះផ្សាយជាបន្តបន្ទាប់តាមសារព័ត៌មាន តាមប្រព័ន្ធសង្គម ហើយមានអ្នកវិភាគខ្លះ គឺវិភាគហុយដីតែម្តង ដោយមិនទាំងដឹងពីរឿងងផង។ គ្រាន់តែឃើញឡាន ក៏ធ្វើវិភាគហុយដី ទាំងខ្លះមិនបានដឹងរឿងពិតប្រាកដ ។
លោកបានបញ្ជាក់យ៉ាងដូច្នេះ «ខ្ញុំសូមបញ្ជួនសារ សូមឲ្យមើលកងកម្លាំងប្រដាប់អាវុធ កងនគរបាលជាតិ កងទ័ព កងរាជអាវុធហត្ថនៅក្នុងផ្លូវល្អខ្លះផង ។ ឡានទាំងអស់នេះ មិនមែនឡាន Rolls-Royce ឡាន (Lexus) 570 ឬឡានអីយកមកសម្រាប់ជិះឯណា » ។
លោក ហ៊ុន ម៉ាណែត បានបន្តថា «មកដល់ម៉ោងនេះ យើងឃើញមានការអបអរសាទរច្រើនលើសលប់ពីប្រជាពលរដ្ឋរបស់យើង ដែលអបអរសាទរដល់លទ្ធភាព និងឱកាសដែល កងកម្លាំងរបស់យើង មានឱកាសមានរថយន្តទំនើបប្រើប្រាស់ ដើម្បីបំពេញភារកិច្ចបម្រើជាតិ មាតុភូមិ និងប្រជាជន ។ ប៉ុន្តែពេលជាមួយគ្នា ក៏មានអ្នកខ្លះគឺថា គឺឃើញកងកម្លាំងប្រដាប់អាវុធហ្នឹងខ្មៅ ខ្មៅរហូតតែម្តង ។ គ្រាន់តែបានឡានថ្មីជិះហ្នឹង ក៏ទើសដែរ គឺថាវិភាគវ៉ៃ បែកផ្សែងតែម្តង »។
លោក ហ៊ុន ម៉ាណែត បានថ្លែងបញ្ជាក់បន្ថែមថា «ឡាននេះ គឺជាមធ្យោបាយសម្រាប់ដឹកជញ្ជួនទ័ពយើង។ កងទ័ព កងនគរបាលជាតិ កងអាវុធហត្ថ ជានរណា? ជាកូនចៅរបស់ប្រជាពលរដ្ឋ ខ្មែរយើង មិនមែនជាបរទេសទេ ណា ។ អ្នកខ្លះអត់ទេ ឲ្យតែកងកម្លាំងប្រដាប់អាវុធ គឺមើលខ្មៅ។ ប្រទេសផ្សេងគេបំពាក់អាវុធទំនើប ចាយលុយរាប់រយលាន បំពាក់អាវុធទំនើប សម្ភារៈទំនើប សរសើរគេ ដល់ឯងគ្រាន់តែមានឡានថ្មីជិះវ៉ៃប្រហារ អញ្ចឹងឲ្យមានទសន្សៈជាតិនិយមខ្លះផង ។
លោកក៏បានចោទជាសំណួរឡើងថា ពេលគេដែលគេឈ្លានពានទឹកដី ពេលមានគ្រោះមហន្តរាយ ភ្លើងឆេះផ្ទះ បាក់អគារ ទឹកជំនន់ បុណ្យទានត្រូវការសន្តិភសុខ ចោរកម្ម អីកើតឡើង តើឲ្យកងកម្លាងំដើរទៅជួយពលរដ្ឋ ?
កបានពោលបន្តថា «អាហ្នឹងជាធម្យោបាយដើម្បីបង្កើននូវសមត្ថភាព លទ្ធភាពរបស់កងកម្លាំង ប្រសិទ្ធភាពរបស់កងកម្លាំងប្រដាប់អាវុធ ក្នុងការបម្រើជាតិ បម្រើប្រជាជន បម្រើអស់លោកដែល អ្នកខ្លះជេរផង ។ បុណ្យទានអី ឃើញតែប៉ូលីស ប៉េអឹមនៅហាលថ្ងៃ ដើម្បីឲ្យបងប្អូនសុខសប្បាយ វ៉ៃគ្នានៅព្រំដែនគឺកងទ័ព »។ (កែសម្រួលដោយ ៖ បុប្ផា)
ចែករំលែកព័តមាននេះ