អន្តរជាតិ ៖ ប្រធានសមាគមអត្តពលកម្មប្រចាំទ្វីបអឺរ៉ុបលោក Svein Arne Hansen បានទទួលមរណភាពហើយកាលពីថ្ងៃសៅរ៍ក្នុងវ័យ ៧៤ឆ្នាំ បន្ទាប់ពីបានតស៊ូជាមួយជំងឺដាច់សរសៃឈាមខួរក្បាល ដែលបានកើតឡើងកាលពីខែមីនាកន្លងទៅ ។
សូមជម្រាបជូនថាលោក Svein Arne Hansen ជនជាតិន័រវេស បានដឹកនាំសមាគមអត្តពលកម្មប្រចាំទ្វីបអឺរ៉ុបចាប់តាំងពីឆ្នាំ ២០១៥ និងជាប្រធានទី៥ របស់សមាគមមួយនេះ។
ក្រោយការស្លាប់របស់លោក Svein Arne Hansen ប្រធានបណ្តោះអាសន្ន ដែលត្រូវបានតែងតាំងគឺលោក Dobromir Karamarinov បាននិយាយនៅក្នុងសេចក្តីថ្លែងការណ៍មួយថា «ខ្ញុំមានការសោកស្តាយយ៉ាងខ្លាំង ដែលបានដឹងអំពីការស្លាប់របស់លោក Svein Arne ។ គាត់គឺជាមេដឹកនាំដ៏អស្ចារ្យម្នាក់ ដែលជាទស្សនវិស័យសម្រាប់កីឡារបស់យើង ជាមួយបុគ្គលិកលក្ខណៈ ប្រកបដោយការគោរពនៅក្នុងគ្រួសារអត្តពលកម្ម ។ យើងបានបាត់បង់បុរសដ៏អស្ចារ្យម្នាក់ហើយ»។
សូមរំលឹកថាលោក Svein Arne Hansen ធ្លាប់ជាប្រធាននៃព្រឹត្តិការណ៍ Bislett Games និងបានឡើងឋានៈជាអនុប្រធានសមាគមកីឡាអត្តពលកម្មរបស់ប្រទេសន័រវេសក្នុងឆ្នាំ ២០០៣ ។ លោកបានដើរតួនាទីយ៉ាងសំខាន់ក្នុងការបង្កើតព្រឹត្តិការណ៍កីឡាអត្តពលកម្មមួយចំនួន ប្រចាំទ្វីបអឺរ៉ុបផងដែរ៕ (ដកស្រង់ចេញពី៖ Reuters)
ចែករំលែកព័តមាននេះ