ខេត្តកំពង់ឆ្នាំង ៖ ទោះបីធ្លាក់ខ្លួនពិការក្តី តែដោយបានការលើកទឹកចិត្តពីភរិយា បុរសម្នាក់ដែលជិះតែលើរទេះរុញ បានតស៊ូរស់ចិញ្ចឹមជីវិតព្រមទាំងក្រុមគ្រួសារ ដោយការដុតក្រឡានលក់ដោយមិនអស់សង្ឃឹមឡើយ ។ គ្រួសារដ៏កម្សត់មួយនេះ មានទីលំនៅក្នុងភូមិចន្លោះរេន…
ខេត្តកំពង់ឆ្នាំង ៖ ទោះបីធ្លាក់ខ្លួនពិការក្តី តែដោយបានការលើកទឹកចិត្តពីភរិយា បុរសម្នាក់ដែលជិះតែលើរទេះរុញ បានតស៊ូរស់ចិញ្ចឹមជីវិតព្រមទាំងក្រុមគ្រួសារ ដោយការដុតក្រឡានលក់ដោយមិនអស់សង្ឃឹមឡើយ ។ គ្រួសារដ៏កម្សត់មួយនេះ មានទីលំនៅក្នុងភូមិចន្លោះរេន ឃុំស្វាយជ្រំ ស្រុករលាប្អៀរ ។ ជួបជា មួយអ្នកសារព័ត៌មានយើង នាព្រឹកថ្ងៃទី១៨ ខែមិថុនា ឆ្នាំ២០២០ បុរសឈ្មោះ ជា សាវុធ អាយុ៣៨ឆ្នាំ រៀបរាប់ថា គាត់បានធ្លាក់ខ្លួនពិការជាង១២ឆ្នាំហើយ ដោយគ្រោះថ្នាក់ការងារពេលធ្វើសំណង់ ។
ចាប់តាំងពីពេលនោះមក គាត់បានអស់សង្ឃឹមក្នុងជីវិតរួចទៅហើយ ព្រោះមិនដឹងរំពឹងលើអ្វីបើគាត់ជាមេគ្រួសារ ។ ប៉ុន្តែដោយសារការលើកទឹកចិត្តពីប្រពន្ធ និងដោយមានការអាណិតដល់កូន៣នាក់នៅក្នុងបន្ទុក គាត់បានព្យាយាមរស់បន្តទៀតដើម្បីក្រុមគ្រួសារ ហើយក៏បានបង្កើតមុខរបរមួយនៅផ្ទះ គឺការដុតក្រឡានឲ្យប្រពន្ធយកទៅលក់ ។
ថ្វីដ្បិតតែមុខរបរនេះជួបការលំបាក ហើយកម្រៃបានតិចតួចក៏ពិតមែន ប៉ុន្តែគាត់នៅតែតស៊ូដើម្បីក្រុមគ្រួសាររបស់គាត់ដែរ ។ ទោះបីគាត់នៅតែលើរទេះរុញ តែគាត់បានព្យាយាមដុតក្រឡានដោយកាត់ឫស្សីច្រកអង្ករដុត និងសកឱ្យស្អាត ជាមួយកូនរបស់គាត់ម្នាក់ ។ ចំណែកប្រពន្ធគាត់ជាអ្នកដាំស្ល និងំយកក្រឡានទៅលក់។
រីឯប្រពន្ធគាត់ឈ្មោះ ឆន ធារី អាយុ៤០ឆ្នាំ និយាយថា គាត់ជិះកង់ដឹកក្រឡានយកទៅលក់ដល់ផ្សារក្រោម ហើយត្រូវបានអតិថិជនគាំទ្រច្រើននិងប្រាប់ថា ក្រឡានគាត់ឆ្ងាញ់ ហើយខ្លះទៀតក៏បានទូរស័ព្ទកុម្មង់ទិញដើម្បីយកផ្ញើទៅក្រុមគ្រួសារនៅឯរាជធានីភ្នំពេញ ។ បើទោះបីយ៉ាងនេះក្តី បុរសមានពិការភាព រូបនេះបានត្អូញត្អែរថា បច្ចុប្បន្នមុខរបរនេះគឺបានត្រឹមតែមួយរស់ប៉ុណ្ណោះ គាត់គ្មានលទ្ធភាពព្យាបាលជំងឺប្រចាំកាយបានឡើយ ។ រូបគាត់មានជំងឺរលាកក្រពះ និងរលាកតម្រងនោមធ្ងន់ ហើយសព្វថ្ងៃគាត់ត្រូវស្ពាយថង់ទឹកនោមជាប់ជាប្រចាំបើមិនដូច្នោះទេ ផឹកទឹកប៉ុនណា ចេញវិញប៉ុណ្ណឹង ពេលខ្លះមានទាំងឈាមទៀត ។
គាត់បានព្យាយាមធ្វើការទាំងឈឺទាំងជា ពេលខ្លះអស់កម្លាំងខ្លាំងដេកលក់ភាំង ងើបវិញធ្វើការទៀត ។ គាត់គ្មានលទ្ធភាពទៅមន្ទីរពេទ្យព្យាបាលទេ ហេតុនេះហើយគាត់សូមលើកម្រាមដៃដប់ សំណូមពរដល់សប្បុ រសជនទាំងអស់ សូមមេត្តាជួយដល់គាត់ផង ឬក៏មានគ្រូពេទ្យណាសូមមេត្តាជួយព្យាបាលគាត់ផង ។ សូមបញ្ជាក់ថា គ្រួសារជនមានពិការភាពខាងលើនេះ មានសមាជិកចំនួន៦នាក់ គឺ២នាក់ប្ដីប្រពន្ធ កូន៣នាក់ និងឪពុកចាស់ជរាម្នាក់ ៕
ចែករំលែកព័តមាននេះ