ខេត្តកោះកុង ៖ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានលើកឡើងថា ការគាំទ្រម្ហូបច្នៃពីគ្រំចំពុះទា មានប្រភពមកពីតំបន់ការពរធម្មជាតិពាមក្រសោម…
ខេត្តកោះកុង ៖ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានលើកឡើងថា ការគាំទ្រម្ហូបច្នៃពីគ្រំចំពុះទា មានប្រភពមកពីតំបន់ការពរធម្មជាតិពាមក្រសោម ដែលជាការគាំទ្រការអភិរក្សដើមកោងកាង និងបង្កើនចំណូលសម្រាប់ប្រជាសហគមន៍ ។ នេះបើយោងតាមផេកក្រសួងបរិស្ថានចេញផ្សាយនាព្រឹកថ្ងៃទី២០ ខែមិថុនា ឆ្នាំ២០២០ ។
ការលើកឡើងបែបនេះ របស់មន្ត្រីជាន់ខ្ពស់ក្រសួងបរិស្ថានរូបនេះបានធ្វើឡើងនៅក្នុងឱកាសដែលលោកបានដឹកនាំគណៈប្រតិភូក្រសួងបរិស្ថាន អាជ្ញាធរខេត្តកោះកុង ចុងភៅប្រចាំសណ្ឋានគារឡឺរ៉ូយ៉ាល់មួយក្រុម ព្រមទាំងអ្នកសារព័ត៌មានចុះពិនិត្យការចិញ្ចឹមគ្រំ ឬខ្យងចំពុះទា និងការកែច្នៃផលនេសាទ នៅខេត្តកោះកុង ដើម្បីសិក្សារកទីផ្សារជូនប្រជាពលរដ្ឋក្នុងសហគមន៍ ដែលស្ថិតនៅភូមិសាស្ត្រដែនជម្រកសត្វព្រៃពាមក្រសោប ខេត្តកោះកុង។
លោក នេត្រ ភក្ត្រា បានថ្លែងថា ឱជារសដ៏ឈ្ងុយឆ្ងាញ់នៃមុខម្ហូបច្នៃប្រឌិតខ្ពស់ចេញពីគ្រំចំពុះទា ផលិតផលក្នុងស្រុកចេញពីសហគមន៍តំបន់ការពារធម្មជាតិពាមក្រសោប ទឹកដីខេត្តកោះកុង ។ ម្ហូបដ៏ចាប់ចិត្តផ្សាភ្ជាប់រវាងការលើកកម្ពស់ជីវភាពប្រជាសហគមន៍ និងការអភិរក្សដើមកោងកាង ដើម្បីនិរន្តរភាពបរិស្ថាន។
លោក នេត្រ ភក្ត្រា បានបន្ថែមថា សម្រាប់ជនជាតិអឺរ៉ុប និងបរទេសមួយចំនួនធំ បានស្គាល់ច្បាស់ពីគ្រំចំពុះទា ព្រមទាំងនិយមបរិភោគគ្រំចំពុះទានេះដែលមានតម្លៃថ្លៃ ក៏ប៉ុន្តែសម្រាប់ប្រជាពលរដ្ឋខ្មែរ មួយចំនួនធំមិនសូវស្គាល់គ្រំប្រភេទននេះប៉ុន្មានទេ ហើយគ្រំចំពុះទានេះទៀតសោត គឺត្រូវបានប្រជាពលរដ្ឋនៅក្នុងសហគមន៍ប្រកបរបរចិញ្ចឹមវាតាំងពីទស្សវត្សឆ្នាំ១៩៩០មកម្ល៉េះ ។ ដូច្នេះ លោកក៏សូមអំពាវនាវដល់ប្រជាពលរដ្ឋខ្មែរ ចូលរួមបិភោគគ្រំនេះ ដើម្បីផ្សារភ្ជាប់ជីវិតរស់នៅរបស់បងប្អូនប្រជាពលរដ្ឋ នៅក្នុងសហគមន៍ពាមក្រសោប ក៏ដូចជាផ្តល់ការងារ និងចូលរួមអភិរក្ស ព្រៃកោងកាង ជាពិសេសបានចូលរួមការពារធនធានសមុទ្រ និងជីវៈចម្រុះឱ្យកាន់តែសំបូរបែបរបស់កម្ពុជាផងដែរ។
អ្នកនាំពាក្យក្រសួងបរិស្ថានរូបនេះ បានបន្តថា ក្នុងការពង្រឹងទៅលើការអភិរក្សជាមួយការបង្កើតសដ្ឋកិច្ចមូលដ្ឋាន រដ្ឋមន្ត្រី សាយ សំអាល់ ដែលជារដ្ឋមន្ត្រីក្រសួងបរិស្ថាន បានយកចិត្តទុកដាក់ការ ផ្សារភ្ជាប់សហគមន៍ជាមួយផ្នែកទីផ្សារ ហើយសហគមន៍ពាមក្រសោបនេះ ដែលអាចចិញ្ចឹមក្នុង១ឆ្នាំៗ យ៉ាងណោចណាស់ជាង១០,០០០តោន ហើយគ្រំប្រភេទនេះ ត្រូវបាននាំចេញទៅប្រទេសថៃ និងវៀតណាម ។
ដោយឡែកក្នុងប្រទេសកម្ពុជា គឺមានប្រជាពលរដ្ឋដឹកតិចតួចនៅឡើយ ។ ដូច្នេះ ក្រសួងបរិស្ថាន បានខិតខំប្រឹងប្រែងផ្សព្វផ្សាយអំពីផលិតផល នៅក្នុងសហគមន៍ពាមក្រសោប ដល់ម្ចាស់សណ្ឋាគារ និងម្ចាស់ភោជនីយដ្ឋាន ព្រមទាំងប្រជាពលរដ្ឋទៅបានស្គាល់ និងភ្លក់រសជាតិបាន ។
លោក នេត្រ ភក្ត្រា បានបញ្ជាក់ថា សម្រាប់សហគមន៍ពាមក្រសោបនេះ មានប្រជាជន៣៥០គ្រួសារ បានប្រកបរបរចិញ្ចឹមគ្រំចំពុះទានេះ ក្រៅពីរបរនេសាទសមុទ្រ និងអាចប្រមូលផលបាន ចាប់ពីខែតុលា ដល់ខែឧសភា ដោយឡែកនៅឆ្នាំ២០២០នេះ ដោយសារតែអាកាសធាតុអំណោយផល គ្រំចំពុះទានេះ ត្រូវបានប្រមូលផលរហូតដល់ខែមិថុនា ឬខែកក្កដា ខាងមុខនេះ ។
បើតាមលោក វង់ ដារ៉ា ជាអ្នកចិញ្ចឹមគ្រំចំពុះទា ក្នុងតំបន់សហគមន៍ពាមក្រសោប ខេត្តកោះកុង បានឱ្យដឹងថា ក្រៅពីមុខរបរនេសាទសមុទ្រ ប្រជាពលរដ្ឋនៅក្នុងសហគមន៍ជាង៧០ភាគរយ បានប្រកបរបរចិញ្ចឹមគ្រំចំពុះទា ដើម្បីចូលរួមលើកស្ទួយសេដ្ឋកិច្ចគ្រួសារ។
លោកបានថ្លែងថា គ្រំចំពុះទា ចាប់ផ្តើមពងកូន រយៈពេល៣ខែ គឺចាប់ពីខែ១០ ដល់ខែ១២ ដូច្នេះ ប្រជានេសាទទាំងក្នុងសហគមន៍ ត្រូវចាប់ផ្តើមបោះបង្គោល រាយខ្សែដើម្បីឱ្យគ្រំនេះមកតោង ដើម្បីពងកូន ហើយការចិញ្ចឹមគ្រំចំពុះទានេះ គឺតាមលក្ខណៈធម្មជាតិសុទ្ធសាធ មិនប្រើប្រាស់បច្ចេកទេស ឬដាក់សារធាតុគីមីណាមួយនោះទេ ក្រោយដាក់បង្គោលបាន៣ខែ ប្រជានេសាទមើលឃើញកូនគ្រំតោងជាប់នឹងបង្គោល ឬខ្សែដែលពួកគាត់បានដាក់នៅតាមទីតាំងរៀងៗខ្លួន អ្វីដែលកាន់តែពិសេសនោះគ្រំនេះមិនអាចផ្លាស់ទីពីបង្គោលមួយ ទៅកាន់បង្គោលមួយទៀតបាននោះទេ ជាហេតុបង្កលក្ខណៈងាយស្រួលដល់ប្រជាសហគមន៍ ដែលប្រកបអាជីពចិញ្ចឹមគ្រំប្រភេទនេះ ។
សម្រាប់ការប្រមូលផលគ្រំចំពុះទានេះវិញ លោក វង់ ដារ៉ា បានបន្ថែមថា ក្រោយញាស់បានរយៈពេល៦ខែ ប្រជាសហគមន៍អាចប្រមូលគ្រំនេះបាន ដែលប្រជាពលរដ្ឋនៅទីនេះហៅថា «គ្រំក្រមុំ» ក៏ប៉ុន្តែ ទំហំរបស់គ្រំនេះនៅតូច ក៏ប៉ុន្តែ បើគ្រំធំល្អ គឺមានរយៈពេល១២ខែ នៃការចិញ្ចឹម ។ លោកថា សម្រាប់រយៈពេលនៃការប្រមូលផលគ្រំចំពុះទានេះ មានរយៈពេល៦ខែ គឺចាប់ពីខែ១០ រហូតដល់ខែ៤ មុនពិធីបុណ្យចូលឆ្នាំថ្មីប្រពៃណីជាតិខ្មែរ។
គួរបញ្ជាក់ថា គ្រំចំពុះទា ត្រូវបានប្រជាសហគមន៍នៅខេត្តកោះកុង អាចចិញ្ចឹមលក់ក្នុងមួយគីឡូក្រាមថ្លៃត្រឹមតែ២៥០០ ដល់៣០០០រៀលប៉ុណ្ណោះ ខណៈគេលក់នៅបរទេសមានតម្លៃខ្ពស់ដែលមានចាប់ពីជិត១០ដុល្លារ ឡើងទៅ ៕
ចែករំលែកព័តមាននេះ