រាជធានីភ្នំពេញ ៖ ក្រុមជនសង្ស័យមួយក្រុមបានធ្វើសកម្មភាពឆក់កាបូបក្រវាត់ចង្កេះពីស្ត្រីម្នាក់ បានសម្រេច បម្រុងថែមល្បឿនរត់គេចខ្លួន តែជិះទៅបុកនឹងរទេះលក់ពោតរបស់ប្តីស្ត្រីរងគ្រោះ បណ្តាលឲ្យដួលម៉ូតូជនសង្ស័យគេចខ្លួនបាត់។ហេតុការណ៍នេះបង្កការភ្ញាក់ផ្អើលកាលពីវេលា ម៉ោង១០ និង៣០នាទីយប់ ថ្ងៃទី១៨ ខែមិថុនា ឆ្នាំ២០២០ នៅទល់មុខវត្តស្ទឹងមានជ័យ ផ្លូវ២១៧ សង្កាត់ស្ទឹងមានជ័យ២ ខណ្ឌមានជ័យ។
ស្ត្រីរងគ្រោះនិងប្តី សុំមិនប្រាប់អត្តសញ្ញាណ បានប្រាប់ឲ្យដឹងថា មុនកើតហេតុស្ត្រីរងគ្រោះបានជិះម៉ូតូមួយគ្រឿងម៉ាកហុងដាវ៉េវ ពណ៌ខ្មៅ ពាក់ស្លាកលេខ ភ្នំពេញ 1HO-5817 តែម្នាក់ឯងមានក្រវាត់កាបូបនៅចង្កេះ នៅក្នុងកាបូបនោះ មានប្រាក់សរុបជាង ១ ០០០ដុល្លារ ដោយធ្វើដំណើរតាមបណ្តោយផ្លូវ២១៧ ទិសដៅពីត្បូងទៅជើង ស្របទិសគ្នាជាមួយប្តីរបស់គាត់បើករ៉ឺម៉កលក់ពោតធ្វើដំណើរពីមុខគាត់ឆ្ងាយពីគ្នាប្រមាណ២0ម៉ែត្រ គោលបំណងត្រឡប់ទៅផ្ទះ.
ខណៈពេលធ្វើដំណើរមកដល់កន្លែងកើតហេតុលេចមុខជនសង្ស័យម្នាក់មិនស្គាល់អត្តសញ្ញាណ ជិះម៉ូតូមួយគ្រឿងម៉ាក ហុងដា ស្កុបពី ស៊េរីឆ្នាំ២០២១ បានធ្វើសកម្មភាពឆក់ កាបូបក្រវាត់ចង្កេះគាត់បានសម្រេច បម្រុងថែមល្បឿនរត់គេចខ្លួន ភ្លាមៗគាត់មានស្មារតីរឹង ក៏ស្រែកឆោឡោថាចោរៗឮដល់ប្តីគាត់បានបត់រទេះលក់ពោតកាត់ទទឹងផ្លូវ បណ្ដាលឲ្យជនសង្ស័យ ជាជនដៃដល់ជិះម៉ូតូទៅបុកដួលម៉ូតូហើយជ្រុះកាបូបទៅលើថ្នល់។
ភ្លាមៗនោះដែរ បក្ខពួកជនសង្ស័យ ជាអ្នកបិទគូទម្នាក់ទៀត បានជិះម៉ូតូមួយគ្រឿងទៀតមិនចាំម៉ាកមកពីក្រោយ ដឹកជនសង្ស័យជិះរត់ គេចខ្លួនបាត់ស្រមោល បន្សល់ទុកតែម៉ូតូមួយគ្រឿងថ្មីសន្លាងជាមធ្យោបាយធ្វើសកម្មភាព នៅនឹងកន្លែងកើតហេតុ ទុកឲ្យសមត្ថកិច្ចស្រាវជ្រាវរកជនសង្ស័យ និងកាបូបរបស់ជនរងគ្រោះ។ ក្រោយកើតហេតុជនរងគ្រោះបានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលស្ទឹងមានជ័យទី២ ចំណែកម៉ូតូជនសង្ស័យត្រូវបានសមត្ថកិច្ចយកមករក្សាទុកនៅប៉ុស្តិ៍ និង កំណត់មុខសញ្ញាស្រាវជ្រាវ តាមរកជនសង្ស័យមកផ្តន្ទាទោសតាមផ្លូវច្បាប់៕ ដោយ ៖ យឹម ឈឿន
ចែករំលែកព័តមាននេះ