សិរីជាសិស្សរៀនថ្នាក់ទី៦ នៅសាលាឯកជនមួយ គាត់ផ្តើមរអ៊ូថា អផ្សុក និងចង់វិលទៅសាលារៀនវិញ ។ សិស្សអាយុ១២ឆ្នាំម្នាក់នេះនិយាយថា គាត់ខានបានទៅសាលាតាំងពីចុងខែមករាមក ។ ចាប់ពីពេលនោះមកគាត់មិនបានជួបមិត្តភ័ក្ត…
សិរីជាសិស្សរៀនថ្នាក់ទី៦ នៅសាលាឯកជនមួយ គាត់ផ្តើមរអ៊ូថា អផ្សុក និងចង់វិលទៅសាលារៀនវិញ ។ សិស្សអាយុ១២ឆ្នាំម្នាក់នេះនិយាយថា គាត់ខានបានទៅសាលាតាំងពីចុងខែមករាមក ។ ចាប់ពីពេលនោះមកគាត់មិនបានជួបមិត្តភ័ក្ត និងគ្រូរបស់គេឡើយ ។
សិរីនិយាយថា «ពេលនេះខ្ញុំចង់វិលទៅសាលារៀនវិញ»។ គាត់បាននិយាយបន្តដោយទឹកមុខមាំថា «សាលាខ្ញុំបានផ្ញើមេរៀនឲ្យធ្វើតាមតេឡេក្រាម ។ ខ្ញុំបានធ្វើកិច្ចដែលសាលាឲ្យហើយបានផ្ញើទៅលោកគ្រូវិញ។ » ក្រៅពីមិនបានចេញទៅរៀន កូនសិស្សរូបនេះក៏មិនសូវបានចេញទៅក្រៅដែរ គាត់បាននិយាយថា ទោះបីឪពុកម្តាយគេបបួលគាត់ចេញក្រៅ ដើម្បីទទួលទានអាហារក៏គាត់មិនចង់ទៅដែរ។
«កាលពីប៉ុន្មានខែមុន ខ្ញុំមិនចង់ចេញទេ ដោយសារពេលខ្ញុំចេញទៅម្តងៗដូចជា តឹងតែងណាស់ យើងប្រយ័ត្នណាស់ ត្រូវលាងដៃភ្លាម ក្រោយកាន់អ្វីបន្តិច តែពេលចុងក្រោយនេះខ្ញុំឃើញមនុស្សទូទៅមិនសូវប្រយ័ត្នទេ ។ គេនៅជិតៗ គ្នាពេលអង្គុយទទួលទានអាហារ» ។
សិរីជាសិស្សម្នាក់ក្នុងចំណោមសិស្សជាច្រើននាក់ទៀត ដែលមានអារម្មណ៍នឹងសាលារៀន និងមិត្តភក្តិ ។ ចាប់តាំងពីពីពាក់កណ្តាលខែមករា មករដ្ឋាភិបាលកម្ពុជាបានប្រកាសបិទសាលារៀននៅទូទាំងប្រទេស ដើម្បីទប់ស្កាត់ការរីករាលដាលជំងឺកូវីដ១៩ ។ ការបិទសាលាទំនងត្រូវអូសបន្លាយយូរទៀតព្រោះកន្លងមកធ្លាប់មានការស្នើសុំបើកសាលាវិញ ពីគ្រឹះស្ថានសិក្សាឯកជនខ្លះដែរ តែលោករដ្ឋមន្ត្រីក្រសួងអប់រំ បានបដិសេធ ។
លោកហង់ជួន ណារ៉ុន រដ្ឋមន្ត្រីក្រសួងអប់រំ យុវជននិងកីឡា បានលើកឡើងថា ការបើកសាលារៀនឡើងវិញ គឺជាការប្រថុយមួយ ហើយថា ក្រសួងមិនគួរយកអាយុជីវិតសិស្ស និងបុគ្គលិកអប់រំទៅលេងសើចបានឡើយ ។ លោករដ្ឋមន្ត្រីបានបញ្ជាក់ថា ដរាបណាកូវីដ១៩ គ្មានថ្នាំព្យាបាល និងវ៉ាក់សាំងទេនោះ វាតែងជាបញ្ហាប្រឈម ។
ជាមួយការបិទទ្វារសាលារៀន ក្រសួងអប់រំបានជំរុញឲ្យមានការបង្រៀនតាមអនឡាញ ដើម្បីធានាពីការផ្តល់ការអប់រំដល់សិស្សនៅគ្រាលំបាកនេះ ប៉ុន្តែសេវាអប់រំពីចម្ងាយនោះត្រូវគេមើលឃើញថា មិនសូវទទួលផលឡើយ ។ មិនទទួលផលដោយសារសិស្សជាច្រើនទំនងមិនបានទទួលសេវាអប់រំនោះ ដោយសារ គ្មានឧបករណ៍ សម្ភារៈ ដូចជា ទូរស័ព្ទដៃទំនើបដែលភ្ជាប់អ៊ិនធឺណែតនោះ ។
លោកគ្រូបង្រៀននៅជនបទម្នាក់ បាននិយាយថា កូនសិស្សថ្នាក់ទី១០ ដល់ថ្នាក់ទី១២ នៅជនបទមួយក្នុងខេត្តបាត់ដំបង មានទូរស័ព្ទទំនើបប្រើអាចមើលការបង្រៀនតាមអនឡាញបាន មានចំនួនប្រហែល៣០%ប៉ុណ្ណោះ ។
ចំណែកអ្នកស្រី សុផល រស់នៅភ្នំពេញ មានកូនពីរនាក់នៅក្នុងបន្ទុកបាននិយាយថា ការបង្រៀនតាមអនឡាញ មើលទៅកូនរបស់គាត់ហាក់មិនចង់រៀនទេ ។
ស្ត្រីជាម្តាយរូបនេះបានព្រួយបារម្ភពីការសិក្សារបស់កូន និងចង់ឲ្យសាលាបើកបង្រៀនឡើងវិញដែរ ។ «ពេលកូនខ្ញុំកាន់ទូរស័ព្ទដៃភាគច្រើនគេលេងហ្គេម ច្រើនជាងរៀន ។ ខ្ញុំដាស់តឿនគេឲ្យរៀន តែគេឆ្លើយថា ពិបាករៀនពីព្រោះសួរគ្រូមិនកើត» ៕
ចែករំលែកព័តមាននេះ