ធនាគារជាតិនៃកម្ពុជាបានកំពុងជំរុញឲ្យមានការប្រើប្រាស់ប្រាក់រៀលរបស់កម្ពុជា និងប្រាក់យ៉ន់របស់ចិនក្នុងការទូទាត់ពាណិជ្ជកម្មប្រទេសទាំងពីរ ។
ប្រាក់រៀលប្រើសម្រាប់ទិញកសិផលពីកសិករ ហើយប្រាក់យ៉ន់ទូទាត់ការបង់ប្រាក់របស់ឈ្មួញចិនមកកម្ពុជា ។
ដំបូងគេ ការទូតទាត់រូបិយវត្ថុប្រទេសកម្ពុជា និងចិនក្នុងជំនួញនេះធ្វើឡើងក្នុងវិស័យស្រូវអង្ករ ដោយសារចិនបានទទួលទិញអង្ករកម្ពុជាកើនឡើងគួរឲ្យកត់សម្គាល់នៅដើមឆ្នាំ២០២០នេះ ។
តំណាងធនាគារជាតិកម្ពុជា និងតំណាងសហព័ន្ធស្រូវអង្ករកម្ពុជាបានជួបពិភាក្សាគ្នាលើការប្រើប្រាស់រូបិយវត្ថុ សម្រាប់ទូទាត់ពាណិជ្ជកម្មកម្ពុជា និងចិន កាលពីពេលថ្មីៗនេះ ។
លោកឧកញ៉ា ចាន់ សុឃាំង អនុប្រធានសហព័ន្ធស្រូវអង្ករកម្ពុជា (ស.អ.ក) បានគាំទ្រលើការចាយវាយប្រាក់រៀល និងប្រាក់យ៉ន់ក្នុងជំនួញប្រទេសទាំងពីរ ។
អនុប្រធានសហព័ន្ធស្រូវអង្ករកម្ពុជាបន្តថា «ការជំរុញការទូទាត់ជាប្រាក់យ៉ន់ចិនដោយផ្ទាល់នេះនឹងជួយសម្រួលដល់ដំណើរការក៏ដូចជា ផ្តល់នូវភាពចំណេញ និងងាយស្រួលដល់ពាណិជ្ជករកម្ពុជា និងចិន និងអាចជួយពង្រីកទីផ្សារអង្ករ កម្ពុជាទៅប្រទេសចិនបន្ថែមទៀតផងដែរ ។ ចំពោះការជំរុញការទូទាត់ជាប្រាក់រៀល គឺជាយន្តការបន្ទាប់សម្រាប់ទូទាត់ការទិញលក់ស្រូវអង្ករក្នុងស្រុក ជាពិសេសជាមួយកសិករ» ។
ពាណិជ្ជកម្មស្រូវអង្ករ កម្ពុជានិងចិន រយៈពេល៥ខែដើមឆ្នាំ២០២០ កម្ពុជាបាននាំចេញអង្ករទៅប្រទេសចិនក្នុងរង្វង់ទឹកប្រាក់ប្រមាណជាជាង ៧១លានដុល្លារ អាមេរិក ។ នេះតាមការឲ្យដឹងពីសហព័ន្ធស្រូវអង្ករកម្ពុជា ។ កម្ពុជា និងចិនគ្រោងចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយគ្នានៅចុងឆ្នាំ២០២០នេះដែរ ៕
ចែករំលែកព័តមាននេះ