ប្រទេសអ៊ីរ៉ង់ ៖ អ៊ីរ៉ង់អះអាងថាបានបាញ់សាកល្បងប្រកបដោយជោគជ័យ កាលពីថ្ងៃទី១៨ មិថុនា បណ្ដាមីស៊ីលបណ្ដែតជំនាន់ថ្មី ក្នុងឱកាសនៃសមយុទ្ធយោធាជើងទឹកក្នុងសមុទ្រអូម៉ង់ បន្ទាប់ពីសមយុទ្ធដែលបណ្ដាលឲ្យទាហានជើងទឹកអ៊ីរ៉ង់ស្លាប់១៩នាក់ ដោយសារការបាញ់ច្រឡំពេលធ្វើសមយុទ្ធជើងទឹកកាលពីខែឧសភា។
កងទ័ពអ៊ីរ៉ង់បានចេញផ្សាយតាមអ៊ីនធើរណែតបណ្ដារូបភាព បង្ហាញពីការបាញ់មីស៊ីលលេញពីនាវាមួយគ្រឿង និងមីស៊ីលដែលបាញ់ចេញពីរថយន្តកាំមីញ៉ុង១គ្រឿង ព្រមទាំងបណ្ដារូបភាពដែលបង្ហាញការហោះហើរនៃកាំជ្រួចពីលើផ្ទៃទឹកមុនពេលធ្លាក់ក្នុងសមុទ្រ ។
តាមសេចក្ដីប្រកាសមួយរបស់សេនាធិការដ្ឋានកងទ័ពអ៊ីរ៉ង់ថា បណ្ដាមីស៊ីលដី-សមុទ្រ និងមីស៊ីលសមុទ្រ-សមុទ្ររយៈខ្លីនិងរយៈឆ្ងាយ ផលិតដោយកងម៉ារីន និងក្រសួងការពារប្រទេសត្រូវបានបាញ់សាកល្បងក្នុងសមយុទ្ធនេះ ។ បណ្ដាមីស៊ីលបណ្ដែតពេលបាញ់សាកបានកម្ទេចបណ្ដាគោលដៅដែលគ្រោងទុក ស្ថិតនៅចម្ងាយ២៨០គីឡូម៉ែត្រ ហើយចម្ងាយហោះហើររបស់មីស៊ីលទាំងនេះអាចបង្កើនថែមទៀត ។
តាមទូរទស្សន៍រដ្ឋអ៊ីរ៉ង់ថា មីស៊ីលមួយចំនួនដែលបានធ្វើការបាញ់សាក កាលពីថ្ងៃទី១៨
មិថុនា ជាមីស៊ីលម៉ូដែលចាស់ដែលយកមកកែលម្អឲ្យទំនើប ។
កាលពីថ្ងៃទី១០ ឧសភា ទាហានជើងទឹកអ៊ីរ៉ង់១៩នាក់ដែលស្ថិតលើនាវាជួយទ្រទ្រង់១គ្រឿង របស់កងទ័ពអ៊ីរ៉ង់ បានត្រូវស្លាប់និង១៥នាក់ទៀតរងរបួសដោយចៃដន្យក្នុងឱកាសនៃសមយុទ្ធជើងទឹកមួយក្នុងឈូងសមុទ្រពែរ្ស៍ ខណៈកំពុងមានភាពតានតឹងខ្លាំងរវាងក្រុងតេហេរ៉ង់និងក្រុងវ៉ាស៊ិនតោនក្នុងតំបន់សមុទ្រសំខាន់នោះសម្រាប់ផ្គត់់ផ្គង់ប្រេងលើពិភពលោក ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ