ពេលដែលកូវីដ ១៩ បានមកដល់ប្រទេសកម្ពុជា និងប្រទេសទៃជុំវិញពិភពលោក មនុស្សជាច្រើនចាប់ផ្តើមព្រួយបារម្ភពីផលប៉ះពាល់របស់វាលើសេដ្ឋកិច្ច និងប្រាក់ចំណូល ។ ប៉ុន្តែសម្រាប់មនុស្សមួយក្រុមតូច វាបែរជាជួយបង្កើនទ្រព្យសម្បត្តិរបស់ពួកគេទៅវិញ ។
ដោយប្រើប្រាស់ Real-Time Billionaire List របស់ Forbes គេហទំព័រ GoBankingRates.com បានប្រទះឃើញថា មហាសេដ្ឋីចំនួន ៧នាក់ក្នុងចំណោមមនុស្សទាំង ៥០នាក់ដែលមានជាងគេលើលោកបានបង្កើនទ្រព្យសម្បត្តិរបស់ខ្លួនច្រើនជាង ៥០% ទៅទៀតរវាងថ្ងៃទី ១៨ខែមិនាដល់ថ្ងៃទី ៤ខែមិថុនា ។
បុរសដែលបង្កើនទ្រព្យបានច្រើនជាងគេក្នុងកំឡុងពេលនោះ គឺលោកមហាសេដ្ឋី អ៊ីឡុន ម៉ាស (Elon Musk) ដែលជានាយកប្រតិបត្តិរបស់ Tesla និង SpaceX ដែលមើលឃើញទ្រព្យកើនឡើង ៥៥% មកស្មើច្រើនជាង ៣៨ប៊ីលានដុល្លារទៅទៀតព្រោះតែតម្លៃភាគហ៊ុនរបស់ Tesla បានកើនឡើងវិញ ។ យោងទៅតាម Forbes បានឲ្យដឹងទៀតថា បច្ចុប្បន្ននេះលោកមានទ្រព្យសម្បត្តិប្រមាណ ៤២ប៊ីលានដុល្លារទៅហើយ ។
ក្រៅពីនេះហើយ លោកមហាសេដ្ឋី ម៉ាក ហ្សាក់កាបឺក (Mark Zuckerberg) របស់ Facebook ក៏មើលឃើញទ្រព្យកើនឡើងបាន ៥២% ដែរមកស្មើសរុបប្រមាណ ៨៣ប៊ីលានដុល្លារ ។ លោក ហ្សាក់កាបឺកបានបរិច្ចាគច្រើនជាង ១៥០លានដុល្លារទៅទៀតទៅអង្គការសប្បុរសធម៌ដែលឆ្លើយតបនឹងកូវីដ ១៩ ។ ខាងក្រោម គឺជាមហាសេដ្ឋីដែលមើលឃើញទ្រព្យសម្បត្តិច្រើនជាងគេក្នុងកំឡុងពេលនោះ ៖
១. លោក អ៊ីឡុន ម៉ាស នាយកប្រតិបត្តិរបស់ Tesla, SpaceX និង The Boring Company
ទ្រព្យសម្បត្តិរបស់លោកកើនឡើងបាន ១៣.៦ប៊ីលានដុល្លារ ឬ ៥៥% មកស្មើសរុប ៣៨.២ប៊ីលានដុល្លារនៅថ្ងៃទី ៤ខែមិថុនា ។
២. លោក ម៉ាក ហ្សាក់កាបឺក នាយកប្រតិបត្តិរបស់ Facebook
លោកបង្កើនទ្រព្យបាន ២៨.៧ប៊ីលានដុល្លារ ឬ ៥២% មកស្មើសរុប ៨៣.៤ប៊ីលានដុល្លារ និងបានបរិច្ចាគ ១៥០លានដុល្លារទៅសប្បុរសធម៌ ។
៣. លោក មូគេស អាំបានី (Mukesh Ambani) អគ្គនាយក Reliance Industries
ទ្រព្យសម្បត្តិរបស់លោកបានកើនឡើងពី ៣៦.៨ប៊ីលានដុល្លារនៅថ្ងៃទី ១៨ខែមិនាដល់ ៥៨ប៊ីលានដុល្លារនៅថ្ងៃទី ៤ខែមិថុនា និងបានបរិច្ចាគ ៦៨.៣លានដុល្លារទៅសប្បុរសធម៌ ។
៤. លោក ដៃធើ ហ្ស្វាស (Deiter Schwarz) ម្ចាស់ក្រុមហ៊ុន Schwarz Group
លោកមើលឃើញទ្រព្យសម្បត្តិកើនឡើង ៦៧% ឬ ១៣.៣ប៊ីលានដុល្លារមកស្មើសរុប ៣៣.១ប៊ីលានដុល្លារ ។
៥. លោក ថាដាស៊ី យ៉ាណៃ និងក្រុមគ្រួសារ ស្ថាបនិក និងប្រធានក្រុមហ៊ុន Fast Retailing
ទ្រព្យសម្បត្តិសរុបបានកើនឡើងពី ១៩.៧ប៊ីលានដុល្លារដល់ ២៩.៦ប៊ីលានដុល្លារ ឬកើនឡើងប្រមាណពាក់កណ្តាល ៕
ចែករំលែកព័តមាននេះ