ខេត្តឧត្តរមានជ័យ ៖ បើតាមសេចក្តីរាយការណ៍បឋមបានឲ្យដឹងថា កាលពីព្រលប់ថ្ងៃទី១៨ ខែមិថុនា ឆ្នាំ២០២០ មានករណីចោរលួចគោអ្នកស្រុក១ក្បាលយកទៅកាប់ពន្លះយកសាច់នៅក្បែរមាត់ស្ទឹង តែគេចមិនផុតពីកម្លាំងជំនាញព្រហ្មទណ្ឌនៃអធិការដ្ឋាននគរបាលស្រុកត្រពាំងប្រាសាទ ខេត្តឧត្តរមានជ័យនោះទេ ។
ដែលនោះអ្នកស្រុកតែងតែមានជំនឿថា នេះជាព្រលឹងសត្វគោបានអន្ទងហៅម្ចាស់ឱ្យមកចាប់ជនសង្ស័យ ជាចោរដែលមានគំនិតអាក្រក់លួចទ្រព្យសម្បត្តិគេ និងប្រល័យជីវិតសត្វដែលមានប្រយោជន៍ដល់មនុស្សលោកទៀត ដើម្បីប្រគល់ឲ្យសមត្ថកិច្ចចាត់ការតាមច្បាប់ដាក់ទម្ងន់ទោសតាមបទល្មើសដែលគេប្រព្រឹត្ត ។
សេចក្តីរាយការណ៍បន្តថា ជនសង្ស័យឈ្មោះ អុន ទក ភេទប្រុស អាយុ២៤ឆ្នាំ រស់នៅភូមិចារថ្មី ឃុំទំនប់ដាច់ ស្រុត្រពាំងប្រាសាទ ខេត្តឧត្តរមានជ័យ ចំណែកម្ចាស់គោឈ្មោះ សំ ណំ ភេទប្រុស អាយុ៥៧ឆ្នាំ ជាមនុស្សរស់នៅក្នុងភូមិជាមួយគ្នា ។
សេចក្តីរាយការណ៍បន្តថា កាលពីព្រលប់ថ្ងៃខែខាងលើ ជនរងគ្រោះដែលជាម្ចាស់គោបានបាត់គោមួយក្បាលដែលលែងឲ្យស៊ីស្មៅនៅខាងក្រោយភូមិ មិនឃើញចូលគ្រោលដូចសព្វថ្ងៃ ។ ពេលនោះម្ចាស់គោមានការសង្ស័យក៏បានដើររក រហូតយប់បន្តិចស្រាប់តែឃើញជនសង្ស័យជាមនុស្សរស់នៅភូមិជាមួយគ្នា កំពុងព្រលះយកសាច់នៅមាត់ស្ទឹង ជាហេតុធ្វើឲ្យម្ចាស់គោចាប់ខ្លួនជនសង្ស័យ រួចប្រគល់ឲ្យសមត្ថកិច្ចចាត់ការតាមផ្លូវច្បាប់ ។
បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅតុលាការ ចំណែកសត្វគោ សមត្ថកិច្ចប្រគល់ឲ្យម្ចាស់គោយកទៅធ្វើម្ហូបបាត់ទៅហើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ