ខេត្តព្រះសីហនុៈ នៅព្រឹកថ្ងៃទី១៩ ខែមិថុនា ឆ្នាំ២០២០ លោកបណ្ឌិត ប៉ែន ស៊ីម៉ន ប្រធានក្រុមការងារគណបក្សប្រជាជនកម្ពុជាចុះជួយខេត្តកំពត អមដំណើរដោយ លោក ជឹង ផល្លា លោក ជាវ តាយ ព្រមទាំងថ្នាក់ដឹកនាំគណៈកម្មការអចិន្ត្រៃយ៍គណបក្សប្រជាជនកម្ពុជាខេត្តកំពត បានអញ្ជើញទៅគោរពវិញ្ញាណក្ខន្ធលោកព្រឹទ្ធាចារ្យ លឹម ណៃ ដែលជាអតីតសមាជិកគណ:កម្មាធិការមជ្ឈឹមបក្សនៃគណបក្សប្រជាជនកម្ពុជា និងជា ប្រធានខុទ្ទកាល័យមជ្ឈឹមបក្ស លេខាគណ:កម្មាធិការគណបក្សប្រជាជនកម្ពុជាក្រុងកំពង់សោម បានទទួលមរណភាព នៅថ្ងៃ ទី១៦ ខែមិថុនា ឆ្នាំ២០២០ (វេលាម៉ោង០១៖១២នាទី រំលងអាធ្រាត្រ) ក្នុងជន្មាយុ៨៥ឆ្នាំ ដោយជរាពាធ។
ក្នុងការចូលរួមរំលែកទុក្ខនោះដែរ លោកបណ្ឌិត ប៉ែន ស៊ីម៉ន បានសម្តែងនូវការសោកសង្រេងស្រណោះអាឡោះអាល័យរកទីបំផុតគ្មាន ជាមួយភរិយា ព្រមទាំងក្រុមគ្រួសារ ព្រោះការបាត់បង់ លោកព្រឹទ្ធាចារ្យ លឹម ណៃ គឺជាការបាត់បង់នូវស្វាមី ឪពុក ឳពុកក្មេក ជីតា ជីតាទួតប្រកបដោយព្រហ្មវិហារធម៌ដ៏ប្រពៃចំពោះកូនចៅ ក៏ដូចជាការបាត់បង់អតីតថ្នាក់ដឹកនាំដ៏ល្អមួយរួប ដែលពោរពេញទៅដោយឆន្ទៈមនសិការខ្ពស់ និងបានបូជាអស់កម្លាំងកាយចិត្ត បញ្ញា ស្មារតី ដោយមិនខ្លាចនឿយហត់ ព្រមទាំងបានចូលរួមក្នុងកិច្ចការកសាង និង អភិវឌ្ឍន៍នូវសមទ្ធិផលនានា ចំពោះប្រទេសជាតិ និងប្រជាជន។
ក្នុងនោះដែរ លោកបណ្ឌិត បានចូលបច្ច័យចំនួន ៤១លានរៀល និង គណបក្សប្រជាជនកម្ពុជាខេត្តកំពតបច្ច័យចំនួន ២លានរៀល សរុបចំនួន ៤៣លានរៀល ដើម្បីចូលរួមជាមួយក្រុមគ្រួសារនៃសពលោកព្រឹទ្ធាចារ្យ លឹម ណៃ យកទៅប្រើប្រាស់ក្នុងពិធីធ្វើបុណ្យសពទៅតាមគន្លងប្រពៃណីព្រះពុទ្ធសាសនាផងដែរ ។
ចែករំលែកព័តមាននេះ