គ្រូសៅលីងចែករំលែកផ្នត់គំនិតដែលរារាំងអ្នកពីភាពជោគជ័យ
លោក ស៊ី ហេងអ៊ី (Shi Heng Yi) ដែលជាគ្រូសៅលីងប្រចាំ Shaolin Temple Europe…
លោក ស៊ី ហេងអ៊ី (Shi Heng Yi) ដែលជាគ្រូសៅលីងប្រចាំ Shaolin Temple Europe បានចែករំលែក្នុងអត្ថបទមួយដែលបានផ្សាយក្នុង CNBC Make It ថា លោកបានចំណាយ ៣០ឆ្នាំដើម្បីរៀនសូត្រនិងអនុវត្តការប្រាស្រ័យទាក់ទងរវាងសតិមនុស្ស និងរាងកាយ ។
ហើយមេរៀនសំខាន់មួយ គឺទាក់ទិននឹងឧបសគ្គទាំង ៥ដែលរារាំងមនុស្សមិនឲ្យមមើលឃើញអ្វីជុំវិញខ្លួនឲ្យបានច្បាស់ ធ្វើការសម្រេចចិត្តដែលឆ្លាតវៃ សម្រេចគោលដៅរបស់ខ្លួន និងរស់នៅជីវិតដែលមានសុភមង្គលជាដើម ។ ខាងក្រោមគឺជាឧបសគ្គដែលលោកបានចែករំលែក ៖
១. ចំណង់
ចំណង់ដែលទាក់ទិននឹងវិញ្ញាណទាំងប្រាំរបស់មនុស្សអាចជាឧបស្គដ៏ធំមួយក្នុងការសម្រេចគោលដៅ ។ ឧទាហរណ៍ដូចជាអ្នកកំពុងព្យាយាមបញ្ចប់កិច្ចការអ្វីមួយ ប៉ុន្តែអ្នកត្រូវបានរំខានដោយស្មាតហ្វូនរបស់អ្នកដែលទាមទារចំណាប់អារម្មណ៍របស់អ្នកជាដើម ។ ប្រសិនបើអ្នកឈោងរកស្មាតហ្វូនតាមចំណង់របស់អ្នក អ្នកប្រហែលជាត្រូវខាតពេលអស់ជាច្រើនម៉ោងលើវាហើយ ។
២. ការមិនចង់ធ្វើអ្វី
ចំណុចនេះផ្ទុយពីចំណុចខាងលើ ។ វាកើតមានឡើងពេលដែលមនុស្សម្នាក់មិនចង់ធ្វើអ្វីទាល់តែសោះព្រោះតែមូលហេតុមួយចំនួនដូចជាមិនចូលចិត្តធ្វើវាជាដើម ។ ឧទាហរណ៍ដូចជាអ្នកមានជម្លោះជាមួយមិត្ត ឬដៃគូពាណិជ្ជកម្ម តែអ្នកមិនចូលចិត្តការឈ្លោះវែកញែកហេតុ និងផលជាដើម ។ ជាលទ្ធផល អ្នកអាចនឹងបាត់បង់ទំនាក់ទំនងដែលនាំយកភាពជោគជ័យដល់អ្នក ។
៣. ការគ្មានកម្លាំងកំហែង
វាកើតមានឡើងពេលដែលមនុស្សម្នាក់មិនមានកម្លាំងកាយ និងចិត្តក្នុងការធ្វើអ្វីមួយ ។ វាក៏អាចកើតមានឡើងពេលដែលមនុស្សម្នាក់មិនអាចក្រោកឈរពីការបរាជ័យ និងផ្នត់គំនិតអាណិតខ្លួនឯង ឬគិតថាខ្លួនមិនល្អគ្រប់គ្រាន់ដែរ ។ វាប្រៀបបានដូចជាការឃុំខ្លួនឯងក្នុងគុក ហើយវានឹងប៉ះពាល់ដល់ឱកាសជោគជ័យអ្នក ។
៤. ការមិនស្ងប់អារម្មណ៍
ចំណុចនេះទាក់ទិននឹងពេលដែលមនុស្សម្នាក់ព្រួយបារម្ភពីអនាគទ ឬមនុស្សដែលចូលចិត្តវាយតម្លៃលើខ្លួនឯង ឬអ្នកដទៃច្រើន ។ ពេលដែលមនុស្សមានអារម្មណ៍មិនស្ងប់ ពួកគេមិនអាចធ្វើការសម្រេចចិត្តបានល្អទេ និងភាគច្រើនធ្វើឲ្យពួកគេធ្វើអ្វីដែលខ្លួននឹងស្តាយក្រោយនៅថ្ងៃអនាគត ។
៥. គំនិតអវិជ្ជមាន
មនុស្សដែលមានតែគំនិតអវិជ្ជមានភាគច្រើនជាមនុស្សដែលស្ទាក់ស្ទើរច្រើន ។ លើសពីនេះទៅទៀត វាធ្វើឲ្យមនុស្សមិនជឿជាក់លើសមត្ថភាពរបស់ខ្លួន ឬអ្នកដទៃ និងព្រមទាំងការសម្រេចចិត្តរបស់ខ្លួនដែរ ។ គំនិតនេះអាចនឹងប៉ះពាល់ដល់លទ្ធផលការងារអ្នកនិងការរាំងអ្នកមិនឲ្យធ្វើអ្វីដែលអាចនាំភាពជោគជ័យផងដែរ ៕
ចែករំលែកព័តមាននេះ