ត្រៀមរៀបចំបុណ្យសមុទ្រនៅខេត្តព្រះសីហនុ
- ព្រះសីហនុ
ខេត្តព្រះសីហនុ ៖ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងលោក គួច ចំរើន អភិបាលខេត្ត…
ខេត្តព្រះសីហនុ ៖ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងលោក គួច ចំរើន អភិបាលខេត្ត…
ខេត្តព្រះសីហនុ ៖ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងលោក គួច ចំរើន អភិបាលខេត្ត ព្រះសីហនុ ដឹកនាំកិច្ចប្រជុំពិភាក្សា ការងារគ្រប់គ្រងឆ្នេរខ្សាច់ និងការត្រៀមរៀបចំបុណ្យសមុទ្រនៅខេត្ត ព្រះសីហនុ ដោយមានការចូលរួមពីប្រតិភូក្រសួងទេសចរណ៍ អភិបាលរងខេត្ត អភិបាលក្រុង ស្រុក និង មន្ទីរអង្គភាពពាក់ព័ន្ធក្នុងខេត្តព្រះសីហនុ។
លោកថោង ខុន រដ្ឋមន្ត្រីក្រសួងទេសចរណ៍ បានបើកកិច្ចប្រជុំ ដោយគូសបញ្ជាក់ថា ឆ្នាំ២០២០នេះ ខេត្ត ព្រះសីហនុ និងធ្វើជាម្ចាស់ផ្ទះរៀបចំបុណ្យសមុទ្រលើកទី៩ ជុំទី៣ ដែលយើងបានរៀបចំគណៈកម្មការអន្តរក្រសួងរៀបចំបុណ្យសមុទ្រនៅចុងខែធ្នូ។ ក្នុងនោះ យើងមានព្រឹត្តិការណ៍២ គឺទី១-រៀបចំបុណ្យសមុទ្រនៅ ខេត្តព្រះសីហនុ ទី២-រៀបចំព្រឹត្តិការណ៍ទេសចរណ៍អាស៊ាននៅខេត្តសៀមរាប នៅដើមឆ្នាំ២០២១។
លោករដ្ឋមន្ត្រីក្រសួងទេសចរបានបន្តថា បុណ្យសមុទ្រនៅខេត្តព្រះសីហនុ មានជម្រើស២ ទី១-ធ្វើផ្ទៃក្នុង ទី២-ជាលក្ខណៈបើកទូលាយ ដោយមានការចូលរួមពីបណ្តាប្រទេសនានា ដែលរង់ចាំការសម្រេចពីក្រសួងសុខាភិបាល និងប្រមុខរាជរដ្ឋាភិបាល ព្រោះពិភពលោកកំពុងជួបវិបត្តិជំងឺកូវីដ-១៩ ។
លោករដ្ឋមន្ត្រីក្រសួងទេសចរបានបន្តថា ខេត្តព្រះសីហនុមានការអភិវឌ្ឍន៍យ៉ាងមមាញឹកមានផ្លូវ៣៤ខ្សែ និងឆ្នេរខ្សាច់ជាង៩គីឡូម៉ែត្រ ដែលប្រជាពលរដ្ឋនៅទូទាំងប្រទេសមានការកោតសរសើរអបអរសាទរ ដែលជាស្នាដៃកូនខ្មែរ ជាអ្នកគូសប្លង់ និងសាងសង់ ហើយខ្មែរធ្វើបានដែលសមិទ្ធផលទាំងនេះ ឆ្លើយតបទៅនឹង ការអភិវឌ្ឍន៍របស់ខេត្តព្រះសីហនុ ជម្រុញកំណើនទេសចរណ៍ និងសេដ្ឋកិច្ច បច្ចុប្បន្នភ្ញៀវក្នុងស្រុកមានប្រមាណ៦០ម៉ឺននាក់ ក្នុងមួយខែ កាលមិនទាន់មានជំងឺកូវីដ -១៩ ភ្ញៀវក្នុងស្រុកមានជាង១លាននាក់ក្នុងមួយខែ។
លោករដ្ឋមន្ត្រីក្រសួងទេសចរបានបន្តទៀតថា ទេសចរក្នុងស្រុកដំណើរការបានជួយដល់សេដ្ឋកិច្ចក្នុងស្រុកបានមួយផ្នែក យើងបានលើកទឹកចិត្ត និងធ្វើការណែនាំអំពីសុវត្ថិភាព និងសុខុមាលភាពដល់ភ្ញៀវក្នុងស្រុកធ្វើឱ្យវិស័យទេសចរណ៍រក្សាបាននូវគុណភាព និងសេវាកម្ម ដោយធានាថា មិនមានផលប៉ះពាល់ដល់ភ្ញៀវ ទេសចរ ដោយតម្រូវពាក់ម៉ាស់ លៀងសម្អាតដៃ រក្សាគម្លាតពីគ្នា និងការធ្វើអនាម័យជាដើម។ ខេត្តព្រះសីហនុជាគោលដៅទេសចរណ៍ ដែលមានផ្លូវ ឆ្នេរសមុទ្រ កោះ យើងក៏ត្រូវរៀបចំកន្លែងចតរថយន្ត បង្គន់អនាម័យ បញ្ជរព័ត៌មាន ដើម្បីក្លាយជាគោលដៅទេសចរណ៍ទាក់ទាញ។
លោក គួច ចំរើន អភិបាលខេត្តព្រះសីហនុ បានមានប្រសាសន៍ថា ខេត្តព្រះសីហនុមានកិត្តិយសធ្វើជាម្ចាស់ផ្ទះរៀបចំបុណ្យសមុទ្រលើកទី៩ ជុំទី៣ ហើយយើងបានជ្រើសរើសយកទីតាំងរង្វង់មូលព្រះថោង នាងនាគ ស្ថិតនៅផ្លូវប្រសព្វ មហាវិថីរាម និងមហាវិថីជំទាវម៉ៅ ឃុំបិតត្រាំង ស្រុកព្រៃនប់ ខេត្តព្រះសីហនុ ដើម្បី រៀបចំព្រឹត្តិការណ៍បុណ្យសមុទ្រជុំទី៣នេះ ដោយមានរៀបចំពិព័ណ៌ពាណិជ្ជកម្ម និងផលិតផលខ្មែរ ដូច្នេះកងកម្លាំងមានសមត្ថកិច្ចត្រូវចុះទៅសិក្សាទីតាំង ដើម្បីការពារសន្តិសុខសុវត្ថិភាពសម្រាប់ប្រជាពលរដ្ឋ ភ្ញៀវទេសចរ និងថ្នាក់ដឹកនាំ រាជរដ្ឋាភិបាល។ មន្ទីរអង្គភាពពាក់ព័ន្ធ ត្រូវត្រៀមរៀបចំប្រព័ន្ធទឹកភ្លើង ដើម្បី ឱ្យពិធីបុណ្យសមុទ្រនៅខេត្តព្រះសីហនុ ប្រព្រឹត្តទៅដោយរលូននាពេលខាងមុខ ៕ (កែសម្រួលដោយ ៖ ធីតា)
ចែករំលែកព័តមាននេះ