លោកសុខ ទូច ៖ បើលុបបឹងតទៅទៀត និងលិចក្រុងហើយព្រោះគ្មានកន្លែងបង្ហូរទឹកចេញ
- ភ្នំពេញ
រាជធានីភ្នំពេញ ៖ លោក បណ្ឌិត សុខ ទូច បាននិយាយយ៉ាងចំៗថា បើបន្តលុបបឹងនានាមួយចំនួនទៀតនឹងលិចក្រុងហើយ ដូច្នេះសុំអង្វរឈប់លុបបឹងទៀតទៅ ។…
រាជធានីភ្នំពេញ ៖ លោក បណ្ឌិត សុខ ទូច បាននិយាយយ៉ាងចំៗថា បើបន្តលុបបឹងនានាមួយចំនួនទៀតនឹងលិចក្រុងហើយ ដូច្នេះសុំអង្វរឈប់លុបបឹងទៀតទៅ ។ ការលើករបស់លោក បណ្ឌិតក្រោយពីសង្កេតឃើញជាក់ស្ដែង កាលពីពេលថ្មីៗនេះមានការលុបបឹងជាច្រើនកន្លែងពីសំណាក់ជនខិលខូចមួយចំនួនក៏ដូចជា ពីសំណាក់អ្នកមានអំណាចធ្វើឲ្យមានការកកស្ទះទឹក ។
លោក បណ្ឌិត សភាចារ្យ សុខ ទូច ប្រធានរាជបណ្ឌិត្យសភាកម្ពុជា សូមអង្វរក៏ដូចជា អំពាវនាវកុំឲ្យមានការលុបបឹងតទៅទៀត ។ នេះបើតាមការថ្លែងរបស់លោក ក្នុងវេទិកាតុមូលពិភាក្សាពីការរៀបចំខ្លួនរបស់កម្ពុជា ដើម្បីស្តាសេដ្ឋកិច្ចឡើងវិញ ក្រោយពេលបញ្ចប់ការរីករាតត្បាតជំងឺកូវីដ១៩ នៅថ្ងៃទី១៩ ខែមិថុនា ឆ្នាំ២០២០ នៅរាជបណ្ឌិតសភាកម្ពុជា ។
លោកបណ្ឌិត សុខ ទូច បានលើកឡើងថា កាលពីឆ្នាំ១៩៨២ និងឆ្នាំ១៩៨៣ មកខាងជលផលកម្ពុជា បានឲ្យឈ្មួលវៀតណាមដែលដឹកត្រីទៅប្រទេសរបស់គេ តែបច្ចុប្បន្នមិនចាំបាច់ឡើយឲ្យតែមានលុយយកឲ្យគេគេដឹកឲ្យដល់កន្លែង ។ លោកបន្តថា «ត្រីពោ ត្រីរស ត្រីអីជាដើម យកពីខ្មែរទៅទេ យើងត្រូវមើលកន្លែងហ្នឹង! តែឥលូវគេបានយកមកចូលដូច្នេះ យើងត្រូវមើលកន្លែងហ្នឹងឈប់លុបបឹងទៅ ។ យើងមើលប្រទេសកូរ៉េ មានផ្ទៃដីតូចជាងខ្មែរ មានប្រជាជនដល់ទៅ៥២លាននាក់ គេមិនទាន់មានលុបបឹងទេ ខ្ញុំជិះកាត់បឹងកប់ស្រូវមកឃើញតែចាក់ដី តើយើងអាចទុកបឹងសម្រាប់កែច្នៃវិស័យទេសចរណ៍បានដែរឬទេ?»។
លោកឲ្យដឹងទៀតថា ការលើកឡើងរបស់លោកនាពេលនេះ គឺដឹងថាមានការប៉ះដល់បុគ្គលមួយចំនួនប៉ុន្តែត្រូវតែទទួលការឈឺចាប់ ប្រសិនបើមិនទទួលយកទេ នៅតែបន្តលុបបឹងតទៅទៀតនោះ ពេលមានភ្លៀងធ្លាក់ខ្លាំងនឹងធ្វើឲ្យមានការប៉ះពាល់ដូចជា លិចទីក្រុងភ្នំពេញដោយហេតុអត់មានកន្លែងហូរចេញ ។
ដើម្បីឲ្យប្រទេសរីកចម្រើនលោកបណ្ឌិតក៏បានសង្កត់ធ្ងន់ថា ត្រូវតែមានការកែសង្គមកម្ពុជា ព្រោះប្រទេសកម្ពុជា ជាប្រទេសរបស់ប្រជាពលរដ្ឋខ្មែរទាំអស់គ្នាផងដែរ មិនមែនរបស់អ្នកណាម្នាក់ ហើយសម្តេចតេជោ ហ៊ុន សែន ក៏មិនអាចធ្វើការងារតែឯង ដោយគ្មានចូលរួមពីពលរដ្ឋម្នាក់ៗនោះទេ ៕
ចែករំលែកព័តមាននេះ