រាជធានីភ្នំពេញ ៖ ក្មេងប្រុសអាយុ១៤ម្នាក់សង្ស័យធ្វើសកម្មភាពឡើងលើផ្ទះប្រជាពលរដ្ឋប៉ុនប៉ងលួចទ្រព្យសម្បត្តិ ប៉ុន្តែត្រូវម្ចាស់ផ្ទះឃើញទាន់ស្រែក «ចោរៗ» ក៏ភ័យស្លន់ស្លោស្ទុះរត់ទៅបំបុកទម្លុះសំណាញ់ដែកជាប់ជញ្ជាំង បណ្ដាលឱ្យធ្លាយសំណាញ់ហើយធ្លាក់ពីលើផ្ទះជាន់ទី២មកដល់ដីបាក់.ក បាត់បង់ជីវិតភ្លាមៗនៅនឹងកន្លែងតែម្ដង ។
ហេតុការណ៍ខាងលើនេះកើតឡើងកាលពីវេលាម៉ោង១រំលងអធ្រាត្រឈានចូលថ្ងៃទី១៩ ខែមិថុនា ឆ្នាំ២០២០ ប៉ុន្តែទើបតែបង្កអោយមានការភ្ញាក់ផ្អើលខ្លាំងនៅវេលាម៉ោង៦ព្រឹកថ្ងៃដដែល នៅចំណុចផ្ទះល្វែងមួយកន្លែង ស្ថិតក្នុងភូមិឫស្សីទី៣ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
ក្មេងប្រុសម្នាក់ដែលបាត់បង់ជីវិតខាងលើឈ្មោះ ឈន វីត អាយុ១៤ឆ្នាំ មានទីលំនៅផ្ទះជួល ក្នុងភូមិដំណាក់ធំ សង្កាត់ស្ទឹងមានជ័យទី២ ខណ្ឌមានជ័យ ដោយរូបគេស្នាក់នៅជាមួយនឹងឪពុកម្ដាយ ។ ក្មេងប្រុសម្នាក់នេះមានបងប្អូនប្រុសស្រីចំនួន៤នាក់ ប៉ុន្តែបងប្រុសស្រីចំនួន៣នាក់ផ្សេងទៀតមានគ្រួសារអស់ទៅហើយ ហើយពួកគេក៏រស់នៅបែកលំនៅឋានពីឪពុកម្ដាយអស់ហើយដែរ នៅឡើយតែរូបគេស្នាក់នៅជាមួយនឹងឪពុកម្ដាយ ។
យោងតាមប្រភពព័ត៌មានពីអ្នកស្នាក់នៅផ្ទះជួលក្បែរកន្លែងកើតហេតុបានឱ្យដឹងថា មុនកើតហេតុ គេបានឮសំរឹបជើងមនុស្សនៅសំយ៉ាបមុខផ្ទះកើតហេតុខាងលើនោះ លុះមានការសង្ស័យ ម្ចាស់ផ្ទះក៏បានស្រែកខ្លាំងៗចេញពីក្នុងផ្ទះថា «ចោរៗ» ។ ភ្លាមនោះក្មេងប្រុសជាជនសង្ស័យមានការភ័យស្លន់ស្លោក៏ស្ទុះរត់ទៅបំបុកទម្លុះសំណាញ់ដែកជាប់ជញ្ជាំង បណ្ដាលឱ្យធ្លាយសំណាញ់ហើយធ្លាក់ពីលើផ្ទះជាន់ទី២មកដល់ដីបាក់.ក បាត់បង់ជីវិតភ្លាមៗនៅនឹងកន្លែងតែម្ដង ។
តាមប្រភពដដែលបានបន្តថា បន្ទាប់ពីកើតហេតុភ្លាមៗ ពំុមាននណាម្នាក់រាយការណ៍ជូនសមត្ថកិច្ចឡើយ លុះវេលាព្រឹកឡើង ម្ចាស់ផ្ទះរួមជាមួយបងប្អូនប្រជាពលរដ្ឋបានរាយការណ៍ជូនសមត្ថកិច្ច ទើបនគរបាលមូលដ្ឋានសហការជាមួយនគរបាលជំនាញបានចុះដល់ទីតាំងកើតហេតុ ដើម្បីពិនិត្យ និងធ្វើកោសល្យវិច្ច័យទៅលើសពជាក់ស្ដែងតែម្ដង។ ក្រោយការពិនិត្យយ៉ាងល្អិតល្អន់លើសពរួចមក នគរបាលជំនាញបញ្ជាក់ថា ក្មេងប្រុសខាងលើពិតជាបានបាត់បង់ជីវិត ដោយសារការលោតពីលើផ្ទះជាន់ទី២ ធ្លាក់មកក្រោម បណ្ដាលឲ្យបាក់កប្រាកដមែន ។
តាមប្រភពពីនាយប៉ុស្តិ៍នគរបាលស្ទឹងមានជ័យទី២ លោកអនុសេនីយ៍ឯក ណេង សាមឿន បានប្រាប់ឲ្យដឹងថា ក្មេងប្រុសជាជនសង្ស័យបានធ្វើសកម្មភាពតោងឡើងតាមផ្ទះប្រជាពលរដ្ឋដែលនៅជាប់ផ្ទះជួលខាងលើ (ចំណុចកើតហេតុ) ហើយបានតោងឡើងតាមចំរឹងដែកដែលមាននៅជាប់ផ្ទះនីមួយៗក្បែរនោះ ឡើងជាបន្តបន្ទាប់រហូតឡើងដល់ជាន់លើបង្អស់ដោយប៉ុនប៉ងលួចទ្រព្យសម្បត្តិ ប៉ុន្តែត្រូវម្ចាស់ផ្ទះជួលឃើញទាន់ក៏ស្រែកឆោឡោបង្កឲ្យរូបគេភ័យស្លន់ស្លោខ្លាំងក៏សម្រេចចិត្តហក់ធាក់សំណាញ់ដែកជាប់នឹងជញ្ជាំងទម្លុះបម្រុងរត់គេចខ្លួន ប៉ុន្តែជាអកុសលក៏ត្រូវធ្លាក់ពីលើចុះមកក្រោម បណ្តាលឱ្យបាក់កបាត់បង់ជីវិតនៅនឹងកន្លែងកើតហេតុតែម្ដង ។
តាមការអះអាងរបស់បុរសម្នាក់ឈ្មោះ ឈន ហ៊ុយ អាយុ៦៤ឆ្នាំ ត្រូវជាឪពុកបង្កើតរបស់ក្មេងប្រុសខាងលើ បានឱ្យដឹងថា កូនប្រុសរបស់គាត់ទើបតែចេញពីមណ្ឌលកែប្រែអប់រំ កាលពីល្ងាចថ្ងៃទី១៨ ខែមិថុនា ឆ្នាំ២០២០ ដោយរូបគេត្រូវកម្លាំងកងរាជអាវុធហត្ថចាប់ខ្លួនពីបទ « លួចទ្រព្យសម្បត្តិអ្នកដទៃ » ។ នៅពេលដែលរូបគេចេញពីមណ្ឌលកែប្រែ គេបានមកដល់ផ្ទះហើយបានមកអង្គុយហូបបាយជាមួយស្ត្រីជាម្ដាយ ។ ក្រោយហូបបាយរួច កូនប្រុសបានដើរចេញទៅក្រៅបាត់ ដោយពុំបានប្រាប់អ្នកផ្ទះថាទៅណានោះទេ ។
តាមប្រភពដដែលបានបន្តថា ភ្លាមៗនោះផងដែរ គាត់បានព្យាយាមដើរតាមរកកូន ដោយបារម្ភខ្លាចកូនដើរទៅប្រព្រឹត្តអំពើអបាយមុខលួចសម្ភារៈ ឬទ្រព្យសម្បត្តិរបស់អ្នកដទៃដូចកាលពីពេលមុនៗទៀត ប៉ុន្តែព្យាយាមរកអស់មួយល្ងាចទៅហើយ តែរកពុំឃើញកូនប្រុសទាល់តែសោះ ។ លុះរហូតដល់វេលាម៉ោង៦ព្រឹកថ្ងៃកើតហេតុ ស្រាប់តែមានគេដើរមកប្រាប់គាត់ថា កូនរបស់គាត់បានបាត់បង់ជីវិតទៅហើយ ដោយសារឡើងទៅលួចទ្រព្យសម្បត្តិរបស់គេ រួចធ្លាក់ពីលើផ្ទះមកក្រោម បណ្តាលឱ្យបាត់បង់ជីវិត ។
បើតាមការអះអាងអោយដឹងពីប្រជាពលរដ្ឋក្នុងតំបន់ខាងលើនោះ ពិសេសនគរបាលមូលដ្ឋានប៉ុស្តិ៍ស្ទឹងមានជ័យទី២ បានឲ្យដឹងថា ក្មេងប្រុសជាជនសង្ស័យម្នាក់ខាងលើនោះ គឺជាមុខសញ្ញាយ៉ាងសកម្ម ដែលតែងតែធ្វើសកម្មភាពលួចសម្ភារៈ និងទ្រព្យសម្បត្តិអ្នកដទៃ ពិសេសគឺនៅពេលយប់ ដោយរូបគេតែងតែដើរចូលក្នុងផ្ទះប្រជាពលរដ្ឋ ហើយបន្លំលួចទ្រព្យសម្បត្តិជាញឹកញាប់ ហើយកាលពីពេលកន្លងមក រូបគេក៏ត្រូវបានសមត្ថកិច្ចនគរបាល រួមទាំងកម្លាំងកងរាជអាវុធហត្ថខណ្ឌមានជ័យធ្វើការឃាត់ខ្លួនជាច្រើនលើកច្រើនសារផងដែរ ព្រមទាំងធ្លាប់ធ្វើការបញ្ជូនខ្លួនទៅកាន់មណ្ឌលអប់រំកែប្រែជាច្រើនលើកមកហើយ ដើម្បីអប់រំណែនាំរួបគេឱ្យដើរក្នុងផ្លូវល្អឡើងវិញ ព្រោះតែរូបគេពុំទាន់គ្រប់អាយុនៅឡើយទេ ដូច្នេះហើយរាល់ពេលគេប្រព្រឹត្តបទល្មើសម្ដងៗ នគរបាលពំុដែលអនុវត្តទោសទណ្ឌលើរូបគេឡើយ បានត្រឹមតែបញ្ជូនទៅកន្លែងអប់រំតែប៉ុណ្ណោះ ។
ក្រោយពីពិនិត្យរួច សពត្រូវបានសមត្ថកិច្ចនគរបាលបញ្ជូនតាមរថយន្តសាមុយដឹកយកទៅតម្កល់ទុកនៅវត្តសំបួរមាស ដើម្បីប្រគល់ជូនសាច់ញាតិនៅទីនោះរៀបចំធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ