ខេត្តកំពង់ឆ្នាំង ៖ តបតាមការអំពាវនាវរបស់បុរសម្នាក់មានពិការភាពឈ្មោះជា សាវុធ អាយុ៣៨ឆ្នាំ ដែលប្រកបរបរដុតក្រឡានលក់ នៅភូមិចន្លោះរ៉េន ឃុំស្វាយជ្រុំ ស្រុករលាប្អៀរ គ្មានលទ្ឋភាពព្យាបាលជំងឺរលាកក្រពះ…
ខេត្តកំពង់ឆ្នាំង ៖ តបតាមការអំពាវនាវរបស់បុរសម្នាក់មានពិការភាពឈ្មោះជា សាវុធ អាយុ៣៨ឆ្នាំ ដែលប្រកបរបរដុតក្រឡានលក់ នៅភូមិចន្លោះរ៉េន ឃុំស្វាយជ្រុំ ស្រុករលាប្អៀរ គ្មានលទ្ឋភាពព្យាបាលជំងឺរលាកក្រពះ និងរលាកតម្រងនោម ដែលគេហទំព័រកោះសន្តិភាពចុះផ្សាយមិនបានប៉ុន្មានម៉ោងផង នៅរសៀលថ្ងៃទី១៨ ខែមិនា ឆ្នាំ២០២០នេះ លោកវេជ្ជបណ្ឌិត ទុំ សម្បត្តិ ប្រធានមន្ទីរពេទ្យបង្អែកខេត្តកំពង់ឆ្នាំង ក៏បានអោយរថយន្តសាមុយរបស់មន្ទីរពេទ្យខេត្ត ចុះទៅដឹកបុរសពិការរូបនោះដល់លំនៅដ្ឋាន ដើម្បីយកមកពិនិត្យ និងព្យាបាលនៅក្នុងមន្ទីរពេទ្យបង្អែកខេត្តកំពង់ឆ្នាំងដោយឥតគិតថ្លៃ ។
អ្វីដែលគួរអាណិតជាងនេះទៅទៀតនោះ ពេលក្រុមគ្រូពេទ្យចុះទៅដល់ផ្ទះ គ្រួសារបុរសពិការខាងលើ បានប្រាប់គ្រូពេទ្យថា ពួកគាត់មានប្រាក់តែ២ម៉ឺនរៀលប៉ុណ្ណោះ ។
នៅក្នុងមន្ទីរពេទ្យ លោកវេជ្ជបណ្ឌិត ទុំ សម្បត្តិ បានបញ្ជាក់ថា ក្រោយពីពិនិត្យអ្នកជំងឺដែលជាជនពិការរូបនោះហើយ ជាលទ្ធផលរកឃើញថា អ្នកជំងឺរូបនោះមានដុំក្នុងពោះ១ដុំធំ ដោយមិនដឹងថាដុំនោះជាសាច់កាចឬស្លូតឡើយ ហើយអ្នកជំងឺមានសំពាធឈាមឡើងខ្ពស់គឺ១៦/៨។ ចំណែកការហូរទឹកនោមមករហូតអស់រយៈពេល១២ឆ្នាំមកហើយដោយមិនដឹងខ្លួននេះ គឺមកពីការរលាកតម្រងនោមធ្ងន់ធ្ងរ គឺតម្រងនោមធ្លុះធ្លាយទៅហើយ ។ ចំណែកការពិការជើងទាំង២នេះ គឺដោយសារការប៉ះទង្គិចឆ្អឹងជំនីរគឺបណ្តាលមកពីរបួសសរសៃខួរឆ្អឹងខ្នង គឺស្ពៀតសរសៃណាមួយមិនបានព្យាបាលទាន់ពេលវេលា ទើបបណ្តាលអោយពិការជើងទាំង២បែបនេះ។
លោកវេជ្ជបណ្ឌិតបានបញ្ជាក់បន្តថា ដូច្នេះអាការៈជំងឺទាំងអស់ខាងលើនេះ ក្រុមគ្រូពេទ្យជំនាញនឹងត្រូវបូមឈាម ធ្វើអេកូ និងថតកាំរស្មីមើលសរសៃប្រសាទខួរក្បាល មើលសាច់ក្នុងដុំពោះបន្ថែមទៀត ទើបសន្និដ្ឋានប្រភេទជំងឺទាំងអស់នេះបាន ដើម្បីធ្វើការព្យាបាល ។ លោកវេជ្ជបណ្ឌិតបានបន្តថា ចំពោះអ្នកជំងឺជាជនពិការរូបនេះ ខាងក្រុមគ្រូពេទ្យខេត្តនឹងយកចិត្តទុកដាក់ព្យាបាលអោយអស់លទ្ធភាពដែលមាន ចំណែកការខ្វះខាតមួយចំនួនផ្នែកជីវភាពអ្នកជំងឺ គឺខាងមន្ទីរពេទ្យនឹងជួយឧបត្ថម្ភ ដោយមិនរើសអើងអ្នកក្រីក្រនោះឡើយ។
សូមរំឮកថា បុរសជាជនមានពិការភាពឈ្មោះជា សាវុធ អាយុ៣៨ឆ្នាំ បានធ្លាក់ខ្លួនពិការដោយសារ ធ្វើកម្មករសំណង់ ហើយត្រូវថ្មធ្លាក់បុកឆ្អឹងជំនីរ បណ្តាលឱយរងរបួស និងធ្លាក់ខ្លួនពិការជាង១២ឆ្នាំហើយ ។
ដោយសារបានការលើកទឹកចិត្តពីស្ត្រីជាប្រពន្ឋឈ្មោះ ឆិន ធារី អាយុ៣៩ឆ្នាំ ទើបរូបគាត់បានទ្រាំរស់ដើម្បីចិញ្ចឹមកូន៣នាក់ និងឪពុកចាស់ជរាម្នាក់ទៀត ដោយប្រកបមុខរបរដុតក្រឡានដោយខ្លួនឯងរួមជាមួយកូនៗ ចំណែកប្រពន្ឋជាអ្នកជិះកង់ដឹកដើរលក់ដល់ផ្សារក្រោម ។
ក្រោយពីឃើញទុក្ខលំបាករបស់បុរសជាជនមានពិការភាពរូបនោះ និងតបតាមការអំពាវចង់ព្យាបាលជម្ងឺផងនោះ ទើបលោកប្រធានមន្ទីរពេទ្យបង្អែកខេត្តកំពង់ឆ្នាំង មានចិត្តសប្បុរសដឹកយកអ្នកជំងឺរូបនោះមកព្យាបាលនៅមន្ទីរពេទ្យបង្អែកខេត្តកំពង់ឆ្នាំងដោយពុំគិតថ្លៃឡើយ ។
ក្នុងនាមអ្នកសារព័ត៌មាន ជំនួសមុខឱ្យក្រុមគ្រួសារបុរសជាជនមានពិការភាពខាងលើសូមថ្លែងអំណរគុណយ៉ាងជ្រាលជ្រៅ ចំពោះលោកវិជ្ជបណ្ឌិតប្រធានមន្ទីរពេទ្យខេត្តកំពង់ឆ្នាំង និងក្រុមគ្រូពេទ្យទាំងអស់ ដែលបានយកចិត្តទុកដាក់ព្យាបាលអ្នកជំងឺពិការដ៏កំសត់ម្នាក់នេះ ៕ (កែសម្រួលដោយ ៖ ធីតា)
ចែករំលែកព័តមាននេះ