បុគ្គលិកសណ្ឋាគារ ផ្ទះសំណាក់ និងសេវាកម្សាន្តមួយចំនួនបានកំពុងស្វែងរកប្រាក់ឧបត្ថម្ភពីរាជរដ្ឋាភិបាល និងក្រុមហ៊ុន នៅពេលពួកគេត្រូវបានព្យួរការងារអំឡុងពេលមានវិបត្តិកូវីដ១៩ ។
លោក ទូច កុសល ប្រធានសព័ន្ធសហជីពកម្មករនិយោជិត វិស័យទេសចរណ៍បានឲ្យដឹងថា មានកម្មករនិយោជិតច្រើនជាង១ពាន់នាក់ ដែលស្ថិតនៅក្រោមសហព័ន្ធរបស់លោក ត្រូវបានព្យួរការងារ មាននៅភ្នំពេញ និងខេត្តសៀមរាប ។ កម្មករនិយោជិតទាំងនោះ មានធ្វើការនៅតាមសណ្ឋាគារ អាជីវកម្មកម្សាន្ត និងក្រុមហ៊ុនសំអាតជាដើម ។
លោកកុសលបានបញ្ជាក់ថា ក្នុងចំណោមអ្នកព្យួរការងារទាំងនោះមាន កម្មករ និយោជិត ខ្លះបានទទួលប្រាក់ឧបត្ថម្ភ និងមានករណីខ្លះទៀតមិនទាន់ទទួលបានប្រាក់ឧបត្ថម្ភទេ ដោយកំពុងស្ថិតនៅក្នុងដំណាក់ការចរចាជាមួយមន្ទីរ និងក្រសួងការងារ ។
លោកថោង ខុន រដ្ឋមន្ត្រីក្រសួងទេសចរណ៍ធ្លាប់បានលើកឡើងថា កាលពីដើម ខែមិថុនាកន្លងមកនេះថា គ្រាន់តែដើម៤ខែដើម ឆ្នាំ២០២០ភ្ញៀវទេសចបរទេសមកកម្ពុជាបានធ្លាក់ចុះ៧០% និងបានធ្វើប៉ះពាល់អាជីវកម្មទេសចរណ៍ ២៩៥៦ ទីតាំង បិទប៉ះពាល់ការងារជាង៤ម៉ឺន ។
សណ្ឋាគារ ៣២៤ បានបិទទ្វា មានបុគ្គលិកជាង១៤ ០០០បានបង់ការងារ ផ្ទះសំណាក់ ៤០៥ ប៉ះពាល់ការងារជាង២ពាន់ ហើយ ភោជនីដ្ឋាន៣៨៥ទីតាំងបានបិទដែរ ។ រដ្ឋាភិបាលកំពុងព្យាយាមដោះស្រាយការកលំបាករបស់អ្នករងផលប៉ះពាល់ការងារដោយសារកូវីដ១៩ នេះ ៕
ចែករំលែកព័តមាននេះ