ខេត្តកំពត ៖ ប្រជាពលរដ្ឋនៅតាមភូមិនីមួយៗនៅក្នុងឃុំភ្នំកុង ស្រុកអង្គរជ័យ បានទទួលម៉ាស់ និងសាប៊ូលាងដៃ ដើម្បីការពារឆ្លងជំងឺកូវីដ១៩ ដោយក្រុមហ៊ុនជីបម៉ុង អិុនសុីសុីមេន បានចុះចែកជូនប្រជាពលរដ្ឋកាលពីរសៀលថ្ងៃទី១៧ ខែមិថុនា ឆ្នាំ២០២០ នៅលើវត្តភ្នំត្រែល ឃុំភ្នំកុង ស្រុកអង្គរជ័យ ខេត្តកំពត។
ក្នុងការចែកម៉ាស់ និងសាប៊ូលាងសម្អាតដៃការពារឆ្លងមេរោគកូវីដ១៩ខាងលើនេះដែរ ក៏មានលោកដាំមុនី សុដា អភិបាលរងស្រុកអង្គរជ័យ បានចូលរួមផងដែរ។
លោកប៉ុន សុភា ជាអ្នកសម្របសម្រួលក្រុមហ៊ុនជីបម៉ុងអិុនសុីសុីមេន បានឱ្យដឹងថា ការចុះចែកម៉ាស់ និងសាប៊ូលាងដៃជូនប្រជាពលរដ្ឋនៅក្នុងឃុំភ្នំកុងនាថ្ងៃនេះ គឺដើម្បីចូលរួមទប់ស្កាត់ការឆ្លងជំងឺកូវីដ១៩ ជាជំងឺកាចសាហាវកំពុងរីករាលដាលនៅលើពិភពលោក ហើយជំងឺប្រភេទនេះឆ្លងឆាប់រហ័សពីមនុស្សម្នាក់ទៅមនុស្សម្នាក់ទៀត រហូតមកដល់ពេលនេះនៅលើពិភពលោកមិនទាន់មានថ្នាំព្យាបាលនៅឡើយទេ។
លោកប៉ុន សុភា បានបន្តទៀតថា នៅប្រទេសកម្ពុជាក៏មានអ្នកផ្ទុកជំងឺកូវីដ១៩នេះដែរ ប៉ុន្តែមិនមានអ្នកបាត់បង់ជីវិតនោះទេ ព្រោះអ្នកកើតជំងឺប្រភេទនេះត្រូវបានព្យាបាលជាសះស្បើយអស់ទៅហើយ។ លោកបានបន្តថា ទោះបីជានៅប្រទេសកម្ពុជាមិនមានអ្នកបាត់បង់ជីវិតដោយសារជំងឺប្រភេទនេះក៏ដោយ ប៉ុន្តែប្រជាពលរដ្ឋគ្រប់រូបត្រូវមានការប្រុងប្រយត្ន័ខ្ពស់ ដោយធ្វើអនាម័យជាប្រចាំ និងមិនត្រូវប្រមូលផ្តុំគ្នាច្រើននោះទេ ព្រោះខ្លាចមានរលកទី២នៃជំងឺកូវីដ១៩នេះកើតឡើងម្ដងទៀត។
លោកប៉ុន សុភា អ្នកសម្របសម្រួលក្រុមហ៊ុនជីបម៉ុង បានឱ្យដឹងបន្តទៀតថា ការចែកសម្ភារជូនប្រជាពលរដ្ឋនាថ្ងៃនេះ គឺម្នាក់ៗទទួលបានម៉ាស់ចំនួន៥ និងសាប៊ូលាងដៃ១ដប ព្រមទាំងចែកខិត្តបណ្ណ័ផ្សព្វផ្សាយផងដែរ។
នៅរសៀលថ្ងៃដដែលនោះដែរ ក្រុមហ៊ុនជីបម៉ុងបន្តចែកម៉ាស់និងសាប៊ូលាងដៃ ព្រមទាំងខិត្តប័ណ្ណផ្សព្វផ្សាយដល់ប្រជាពលរដ្ឋនៅភូមិព្រៃផ្ដៅ ឃុំភ្នំកុង ស្រុកអង្គរជ័យ រួចបន្តចែកជូនដល់ប្រជាពលរដ្ឋនៅឃុំផ្សេងទៀតក្នុងស្រុកអង្គជ័យ ខេត្តកំពតផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ