រាជធានីភ្នំពេញ ៖ បុរសម្នាក់ ខណៈកំពុងឈប់ម៉ូតូរង់ចាំភ្លើងស្តុប ស្រាប់តែត្រូវរថយន្ដមួយគ្រឿងបុក បណ្ដាលឲ្យបាត់បង់អាយុជីវិតនៅកន្លែងកើតហេតុ ។
ហេតុការណ៍ខាងលើនេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី១៨ ខែមិថុនា ឆ្នាំ២០ ២០ នៅចំណុចស្ដុបបំបែកជា៤ តាមបណ្តោយផ្លូវ៦០ម៉ែត្រ សង្កាត់ចាក់អង្រែលើ ខណ្ឌមានជ័យ ។
ជនរងគ្រោះឈ្មោះ រស់ សារុន ភេទប្រុស អាយុ៣៣ឆ្នាំ មុខរបរជាងម៉ាស៊ីន ស្នាក់ភូមិវាលស ឃុំវាល.ស ស្រុកល្វាឯម ខេត្ដកណ្ដាល ជាអ្នកបើកបរម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ កណ្ដាល 1R-0440។ ចំណែករថយន្តបង្កមិនស្គាល់ម៉ាក អ្នកបើកបរមិនស្គាល់អត្តសញ្ញាណ បានបើកគេចបាត់ស្រមោល ។
តាមប្រភពព័ត៌មានពីកន្លែងកើតហេតុបានប្រាប់ឱ្យដឹងថា មុនពេលកើតហេតុ ជនរងគ្រោះជិះម៉ូតូមួយគ្រឿងធ្វើដំណើរក្នុងទិសដៅពីត្បូងមកជើង លុះមកដល់ចំណុចកើតហេតុខាងលើ ជនរងគ្រោះក៏បានឈប់រង់ចាំភ្លើងស្ដុប ស្រាប់តែត្រូវរថយន្ដមិនស្គាល់ម៉ាកបុក បណ្ដាលឱ្យជនរងគ្រោះបាត់បង់ជីវិតភ្លាមៗនៅនឹងកន្លែងកើតហេតុ ។ បន្ទាប់ពីកើតហេតុ រថយន្ដបង្កបានបើកគេចបាត់ស្រមោលដោយមិនមានអ្នកឃើញថា ជារថយន្ដប្រភេទអ្វីឡើយ ។
ក្រោយពេលកើតហេតុ សមត្ថកិច្ចមូលដ្ឋានបានចុះទៅដល់កន្លែងកើតហេតុ រួចទាក់ទងទៅសមត្ថកិច្ចជំនាញ ដើម្បីពិនិត្យនៅកន្លែងកើតហេតុ និងកាមេរ៉ាសុវត្ថិភាព ដើម្បីឈានទៅស្វែងរករថយន្ដបង្កចាត់ការតាមច្បាប់ ។ ចំណែកសពជនរងគ្រោះ ត្រូវបានសមត្ថកិច្ចធ្វើកំណត់ហេតុប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ