រាជធានីភ្នំពេញ ៖ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោកបានថ្លែងថា រថយន្តយោធាទាំង២៩០គ្រឿង ដែលត្រូវចែកជូនទៅតាមអង្គ ភាពនៃកងយោធពលខេមរភូមិន្ទ…
រាជធានីភ្នំពេញ ៖ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោកបានថ្លែងថា រថយន្តយោធាទាំង២៩០គ្រឿង ដែលត្រូវចែកជូនទៅតាមអង្គ ភាពនៃកងយោធពលខេមរភូមិន្ទ និងអគ្គស្នងការដ្ឋាននគរបាលជាតិនាពេលនេះ មិនមែនជាជំនួយរបស់ភាគីចិនទេ ហើយក៏មិនប្រើថវិកាជាតិដែរ ពោលគឺរាជរដ្ឋាភិបាលបានប្រើប្រាស់ថវិកាដែលប្រមូលបានពីសប្បុរសជនទាំងអស់ ដើម្បីទិញពីប្រទេសចិន ។
នៅថ្ងៃទី១៨ ខែមិថុនា ឆ្នាំ២០២០ ឧត្តមសេនីយ៍ឯក ហ៊ុន ម៉ាណែត បានប្រគល់រថយន្តយោធាទាំង២៩០គ្រឿងដែលទិញពីប្រទេសចិននេះ ជូនដល់អង្គភាពនៃកងយោធពលខេមរភូមិន្ទ និងអគ្គស្នងការដ្ឋាននគរ បាលជាតិសរុបចំនួន២៤អង្គភាព ដែលបានប្រារព្ធធ្វើនៅពហុកីឡដ្ឋានជាតិអូឡាំពិក ។ ថ្លែងនាឱកាសនោះ ឧត្តមសេនីយ៍ឯក ហ៊ុន ម៉ាណែត បានប្រាប់ទៅក្រុមប្រឆាំងក៏ដូចជាអ្នកវិភាគមួយចំនួនដែលមាននិន្នាការប្រឆាំងរាជរដ្ឋាភិបាល កុំមើលកងកម្លាំងប្រដាប់អាវុធក្នុងផ្លូវមិនល្អ និងត្រូវមានទស្សនៈជាតិនិយមចំពោះជាតិខ្លួនឯង ជាពិសេសពាក់ព័ន្ធនឹងវិស័យការពារជាតិ ។ ជាមួយគ្នានេះ ឯកឧត្តមក៏បានថ្លែងដែរថា ប្រសិន បើអ្នកវិភាគមិនដឹងព័ត៌មានច្បាស់ពាក់ព័ន្ធនឹងរថយន្តយោធាទាំងអស់នេះ សូមកុំធ្វើការវែកញែកដោយគ្មានមូលដ្ឋាន ព្រោះវាក៏មិនមែនជារឿងថ្មីនោះដែរ។
ឯកឧត្តម ហុ៊ន ម៉ាណែត បានលើកឡើងថា៖ «អ្នកខ្លះមើលកងកម្លាំងប្រដាប់អាវុធខ្មៅ សូមឱ្យមើលក្នុងផ្លូវល្អខ្លះផង មានទស្សនៈជាតិនិយមខ្លះផង ហើយអ្នកវិភាគហុយដី ត្រូវមានមូលដ្ឋានឱ្យច្បាស់ចាំនិយាយ ។ អ្នកជេរដែលអត់វិភាគកុំជេរកងកម្លាំងខ្លាំងពេក កុំមើលកងកម្លាំងអាក្រក់ពេក» ។សូមជម្រាបថា ថវិកាទាំងនេះគឺជាថវិកាសប្បុរសជនរបស់កម្ពុជាយើង ដែលផ្តល់ជូនសម្តេចតេជោនាយករដ្ឋមន្ត្រី ហ៊ុន សែន ដើម្បីជួយឧបត្ថម្ភដល់អង្គភាពកងយោធពលខេមរភូមិន្ទ និងនគរបាលជាតិ ៕
ចែករំលែកព័តមាននេះ