ប្រទេសអង់គ្លេស ៖ កីឡាករ Timo Werner បានធ្វើការផ្ញើសារទៅកាន់អ្នកគាំទ្រក្រុមតោខៀវ Chelsea បន្ទាប់ពីសម្រេចការផ្ទេរមកចូលរួមជាផ្លូវការ ជាមួយក្លិបមានមូលដ្ឋានក្នុងទីក្រុងឡុងដ៍ ចក្រភពអង់គ្លេសមួយនេះ។…
ប្រទេសអង់គ្លេស ៖ កីឡាករ Timo Werner បានធ្វើការផ្ញើសារទៅកាន់អ្នកគាំទ្រក្រុមតោខៀវ Chelsea បន្ទាប់ពីសម្រេចការផ្ទេរមកចូលរួមជាផ្លូវការ ជាមួយក្លិបមានមូលដ្ឋានក្នុងទីក្រុងឡុងដ៍ ចក្រភពអង់គ្លេសមួយនេះ។
បើទោះបីជាការផ្ទេរបានសម្រេចជាផ្លូវការក៏ពិតមែន ប៉ុន្តែខ្សែប្រយុទ្ធអាល្លឺម៉ងវ័យ ២៤ឆ្នាំរូបនេះ ត្រូវបន្តលេងឱ្យក្រុម RB Leipzig រហូតដល់បញ្ចប់រដូវកាលនេះ។
ក្លិប Chelsea ពុំបានបញ្ជាក់លម្អិតអំពីដំណើការនៃការផ្ទេរនេះឡើយ។ ប៉ុន្តែបើតាមការចុះផ្សាយពីសារព័ត៌មានរបស់អង់គ្លេសជាច្រើន បានឱ្យដឹងថា Timo Werner បានសម្រេចចុះកុងត្រារយៈពេល ៥ឆ្នាំក្នុងតម្លៃ ៥០លានអឺរ៉ូ ដែលធ្វើឱ្យរូបគេទទួលបានថ្លៃនឿយហត់ចំនួន ១០លានអឺរ៉ូក្នុងមួយរដូវកាលជាមួយក្លិបថ្មី Chelsea។
Timo Werner បានធ្វើបង្ហោះវីដេអូក្នុងបណ្តាញ Twitter ដោយបានបញ្ជាក់ថា «ខ្ញុំពិតជារីករាយណាស់ ដែលបានចូលរួមជាមួយក្រុមតោខៀវ Chelsea នៅរដូវកាលក្រោយ។ វាមានអារម្មណ៍ថាជាការជ្រើសរើសដ៏ត្រឹមត្រូវសម្រាប់ខ្ញុំ ហើយខ្ញុំរីករាយដែលបានក្លាយជាផ្នែកមួយនៃក្លិប Chelsea FC ។ ពិតណាស់ខ្ញុំកំពុងទន្ទឹងរង់ចាំលេងសម្រាប់ក្លិបដ៏អស្ចារ្យ និងជាប្រវត្តិសាស្ត្រ»។
សូមបញ្ជាក់ជូនថា ខ្សែប្រយុទ្ធដែលរកគ្រាប់បាល់បាន ៩៣គ្រាប់ពីការបង្ហាញខ្លួនចំនួន ១៥៧លើកសម្រាប់ក្រុម RB Leipzig បានក្លាយជាសមាជិកទីពីរ បន្ទាប់ពីខ្សែបម្រើប្រយុទ្ធ Hakim Ziyech របស់ក្រុម Ajax ដែលត្រូវ Chelsea នាំចូលក្នុងរដូវកាលនេះ ក្រោមការដឹកនាំរបស់គ្រូបង្វឹក Frank Lampard ៕ (ដកស្រង់ចេញពី៖ Chelsea)
ចែករំលែកព័តមាននេះ