ខេត្តកំពង់ឆ្នាំង ៖ ទោះបីធ្លាក់ខ្លួនពិការយ៉ាងណាក្តី បានការលើកទឹកចិត្តរបស់ស្ត្រីជាភរិយា បុរសជាជនពិការ ម្នាក់ដែលជិះលើតែរទេះរុញ បានតស៊ូរស់ចិញ្ចឹមជីវិត ព្រមទាំងក្រុមគ្រួសារដោយការដុតក្រឡានលក់ ដោយមិនអស់សង្ឃឹមឡើយ។ គ្រួសារដ៍កំសត់មួយនេះ មានទីលំនៅភូមិចន្លោះរេន ឃុំស្វាយជ្រុំ ស្រុករលាប្អៀរ។ ជួបជាមួយអ្នកសារព័ត៌មានយើងនៅព្រឹកថ្ងៃទី១៨ ខែមិថុនា ឆ្នាំ២០២០ បុរសឈ្មោះ ជា សាវុធ អាយុ៣៨ឆ្នាំ បានបញ្ជាក់ថា៖ គាត់បានធ្លាក់ខ្លួនពិការជាង១២ឆ្នាំ ហើយដោយគ្រោះថ្នាក់ការងារពេលធ្វើសំណង់។
ចាប់តាំងពីពេលនោះមកគាត់បានអស់សង្ឃឹមក្នុងជីវិតរួចទៅហើយ មិនដឹងរំពឹងលើអ្វីបើគាត់ជាមេគ្រួសារ។ ប៉ុន្តែដោយសារការលើកទឹកចិត្តរបស់ប្រពន្ធ និងដោយមានការអាណិតដល់កូន៣នាក់នៅក្នុងបន្ទុក គាត់បានជាយាមរស់បន្តទៀត ដើម្បីក្រុមគ្រួសារ ហើយក៏បានបង្កើតមុខរបរមួយនៅចាំផ្ទះគឺការដុតក្រឡាន ឲ្យប្រពន្ធយកទៅលក់។ ថ្វីត្បិតតែមុខរបរនេះជួបការលំបាក ហើយកម្រៃបានតិចតួចក៏ពិតមែន ប៉ុន្តែគាត់នៅតែតស៊ូដើម្បីក្រុមគ្រួសាររបស់គាត់ដែរ។
ទោះបីគាត់នៅតែលើរទេះរុញ គាត់បានព្យាយាមធ្វើការ ដុតក្រឡាន ដោយបានធ្វើការកាត់ឫស្សីច្រកអង្ករដុត និងសកឱ្យស្អាតជាមួយកូនរបស់គាត់ម្នាក់ទៀត។ ចំណែកប្រពន្ធគាត់ជាអ្នកដាំស្ល និងចាំយកក្រឡានទៅលក់តែប៉ុណ្ណោះ។ ជាមួយគ្នានោះស្ត្រីជាប្រពន្ធឈ្មោះ ឆន ធារីអាយុ៤០ឆ្នាំបានបញ្ជាក់ថា៖ គាត់បានជិះកង់យកទៅលក់ដល់ផ្សារក្រោម ហើយត្រូវបានអតិថិជនគាំទ្រច្រើនថា ក្រឡានគាត់ឆ្ងាញ់ ខ្លះទៀតក៏បានទូរស័ព្ទកុម្មង់ទិញ ដើម្បីយកផ្ញើទៅក្រុមគ្រួសារនៅភ្នំពេញ។
បើទោះបីយ៉ាងនេះក្តី បុរសមានពិការភាព ជា សាវុធ បានត្អូញត្អែថា៖ បច្ចុប្បន្នមុខរបរនេះគឺបានត្រឹមតែមួយរស់ប៉ុណ្ណោះ គាត់គ្មានលទ្ធភាពព្យាបាលជំងឺប្រចាំកាយបានឡើយ។ រូបគាត់មានជំងឺរលាកក្រពះ និងរលាកតម្រងនោមធ្ងន់ ព្រោះសព្វថ្ងៃគាត់ត្រូវស្ពាយថង់ទឹកនោមជាប់ជាប្រចាំបើមិនដូច្នោះទេផឹកទឹកប៉ុណ្ណាចេញវិញប៉ុណ្ណឹង ពេលខ្លះមានទាំងឈាមទៀត។ គាត់បានព្យាយាមធ្វើការទាំងឈឺទាំងជា ពេលខ្លះអស់កម្លាំងខ្លាំងដេកលក់មួយភាំង ងើបវិញធ្វើការទៀត។
គាត់គ្មានលទ្ធភាព ទៅពេទ្យព្យាបាលទេ ហេតុនេះហើយគាត់សូមលើកម្រាមដៃដប់ សំណូមពរដល់សប្បុរសជនទាំងអស់ សូមមេត្តាជួយដល់គាត់ផង ឬ ក៏មានជំនាញគ្រូពេទ្យណាសូមមេត្តាជួយព្យាបាលគាត់ផង។ សូមបញ្ជាក់ថា គ្រួសារជនមានពីការភាពខាងលើនេះ មានសមាជិកចំនួន៦នាក់ គឺកូន៣នាក់ ឪពុកចាស់ជរាម្នាក់ និងប្ដីប្រពន្ធជាជនពិការ៕ ដោយ ៖ ពៅ សុខហ៊ាន
ចែករំលែកព័តមាននេះ