និស្សិតដែលនឹងបញ្ចប់ការសិក្សាក្នុងឆ្នាំនេះនឹងប្រឈមមុខទីផ្សារការងារថ្មីក្នុងពិភពលោកដែលបានឆ្លងកាត់ការផ្ទុះជំងឺកូវីដ ១៩ រួចមក ដែលរួមមានទាំងសេដ្ឋកិច្ចដែលមិនប្រាកដប្រជា និងមនុស្សជាច្រើនដែលកំពុងតែរកការងារដែរ ។ ដូច្នេះតើនិស្សិតត្រូវធ្វើយ៉ាងដូចម្តេចខ្លះដើម្បីត្រៀមខ្លួនសម្រាប់ទីផ្សារការងារថ្មីនេះបន្ទាប់ពីកូវីដ ១៩ ត្រូវបានលុបបំបាត់ទាំងស្រុង?
១. ប្រើពេលនេះដើម្បីស្គាល់ខ្លួនឯងឲ្យបានច្បាស់ជាងមុន
ជាទូទៅ និស្សិតតែងតែប្រឈមមុខនឹងសម្ពាធ និងការរំពឹងទុកពីក្រុមគ្រួសារក្នុងផ្នែកជ្រើសរើសមុខរបរសម្រាប់ខ្លួន ឧទាហរណ៍ដូចជាឪពុកម្តាយជាច្រើនជំរុញឲ្យកូនៗរៀនផ្នែកវេជ្ជសាស្ត្រ និងវិស្វកម្មជាដើម ។ ប៉ុន្តែអ្នកអាចនឹងមានឱកាសជោគជ័យច្រើនជាងប្រសិនបើអ្នកធ្វើការងារដែលខ្លួនស្រលាញ់ពិតប្រាកដ ។
ដូច្នេះពេលនេះជាពេលល្អដែលអ្នកគួរវិភាគឡើងវិញលើអត្តចរិត និងចំណង់ចំណូលចិត្តរបស់អ្នកដើម្បីអាចនាំផ្លូវអ្នកទៅរកការងារដែលស័ក្តិសមនឹងអ្នកជាងគេ ។
២. យល់ដឹងបន្ថែមពីទីផ្សារ
បន្ទាប់ពីអ្នកដឹងច្បាស់ពីការងារដែលអ្នកចង់ធ្វើហើយ អ្នកត្រូវស្រាវជ្រាវពីទីផ្សារការងារ ។ អ្នកត្រូវអានតួនាទីដែលអ្នកត្រូវបំពេញឲ្យបានច្បាស់លាស់ដើម្បីដឹងថាអ្នកត្រូវមានជំនាញអ្វីដើម្បីអាចធ្វើការងារទាំងនោះបាន ។ បន្ទាប់មកទៀតមើលថាតើអ្នកអាចធ្វើយ៉ាងដូចម្តេចដើម្បីពង្រឹងជំនាញទាំងនោះបានដើម្បីអ្នកអាចនិយាយពីវាដោយជឿជាក់ក្នុងពេលសម្ភាសន៍ ។
ប្រសិនបើមិនទាន់មានឱកាសការងារល្អដែលអ្នកចាប់អារម្មណ៍ទេ អ្នកគួរពិចារណាលើឱកាសផ្សេងៗទៀតដូចជាឱកាសហាត់ការ ឬការងារស្ម័គ្រចិត្តជាដើមព្រោះវាអនុញ្ញាតឲ្យអ្នកដកពិសោធន៍ក្នុងការងារ ឬវិស័យណាមួយ ។
៣. ពង្រឹងជំនាញដែលអ្នកប្រើនៅកន្លែងការងារ
ជំនាញសំខាន់ៗដែលស្ថាប័នការងារជាច្រើនកំពុងរករួមមានការសម្របខ្លួន ជំនាញទំនាក់ទំនង និងការធ្វើការជាក្រុម ។ ជំនាញក្នុងការទំនាក់ទំនងគឺពិតជាសំខាន់ណាស់ក្នុងពេលដែលពោរពេញទៅដោយភាពមិនប្រាកដប្រជានេះ ហើយការទំនាក់ទំនងមិនកើតមានឡើងត្រឹមតែតាមពាក្យសម្តី ឬការសរសេរទេ ។ ការដែលអ្នកដោះស្រាយបញ្ហាក្នុងក្រុមក៏ជាការទំនាក់ទំនងមួយដែរ ។
ចំណុចសំខាន់សម្រាប់អ្នកដែលចង់រកការងារក្នុងទីផ្សារថ្មីនេះគឺអ្នកត្រូវតែរក្សាភាពវិជ្ជមាន បង្ហាញចំណាប់អារម្មណ៍ក្នុងការរៀនសូត្រ និងត្រូវសម្របខ្លួនទៅតាមបរិស្ថានការងារខុសៗគ្នា ៕
ចែករំលែកព័តមាននេះ