អន្តរជាតិ ៖ UEFA បានប្រកាសកាលពីថ្ងៃពុធម្សិលមិញថា ការប្រកួតពានរង្វាន់ Champions League រដូវកាលនេះ ដែលត្រូវបានផ្អាកចាប់តាំងពីខែមីនា ដោយសារតែការរាតត្បាតនៃវីរុសកូវីដ-១៩…
អន្តរជាតិ ៖ UEFA បានប្រកាសកាលពីថ្ងៃពុធម្សិលមិញថា ការប្រកួតពានរង្វាន់ Champions League រដូវកាលនេះ ដែលត្រូវបានផ្អាកចាប់តាំងពីខែមីនា ដោយសារតែការរាតត្បាតនៃវីរុសកូវីដ-១៩ នឹងត្រូវបញ្ចប់ការប្រកួតរបស់ខ្លួន ចាប់ពីវគ្គ៨ ក្រុមចុងក្រោយរហូតដល់វគ្គផ្តាច់ព្រ័ត្រ ដែលនឹងត្រូវរៀបចំឡើងនៅទីក្រុង Lisbon ប្រទេសព័រទុយហ្គាល់ នៅក្នុងខែសីហាខាងមុខនេះ។
អគ្គលេខាធិការរង UEFA លោក Giorgio Marchetti បានបញ្ជាក់ឱ្យដឹង បន្ទាប់ពីកិច្ចប្រជុំគណៈកម្មាធិការប្រតិបត្តិថា ការប្រកួតវគ្គ ៨ក្រុមចុងក្រោយ និងវគ្គពាក់កណ្តាលផ្តាច់ព្រ័ត្រ នឹងត្រូវធ្វើឡើងតែមួយជើងប៉ុណ្ណោះ។
ដោយឡែកការប្រកួតជើងទី២ វគ្គ ១៦ក្រុមចុងក្រោយមានចំនួន ៤គូដែលនឹងត្រូវលេងមានដូចជា Manchester City ជាមួយ Real Madrid, Bayern Munich ជាមួយ Chelsea, Juventus ជាមួយ Lyon និង Barcelona ជាមួយ Napoli នឹងត្រូវធ្វើឡើងនៅថ្ងៃទី៧ ខែសីហា នៅទីតាំងតាមកាលវិភាគចាស់ ឬក៏នៅប្រទេសព័រទុយហ្កាល់ផ្ទាល់តែម្តង។
សូមជម្រាបជូនថា បច្ចុប្បន្នក្រុម PSG, Atletico Madrid, Atalanta និង RB Leipzig បានកក់កៅអីរួចរាល់សម្រាប់ការប្រកួតវគ្គ ៨ក្រុមចុងក្រោយ ដែលនឹងត្រូវធ្វើឡើងនៅប្រទេសព័រទុយហ្គាល់ខាងមុខ។
ក្នុងនោះ UEFA ក៏បានបញ្ជាក់បន្ថែមទៀតថា ទំរង់ស្រដៀងគ្នានេះ នឹងត្រូវប្រើប្រាស់ដើម្បីបញ្ចប់ការប្រកួតប្រជែងពានរង្វាន់ Europa League រដូវកាលនេះ ដែលនឹងត្រូវធ្វើឡើងនៅប្រទេសអាល្លឺម៉ង់ ចាប់ពីថ្ងៃទី១០ ខែសីហាដល់ថ្ងៃទី២១ ខែសីហា ជាមួយនឹងការប្រកួតដែលត្រូវធ្វើឡើងនៅទីក្រុង Duisburg, Duesseldorf និង Gelsenkirchen ខណៈការប្រកួតវគ្គផ្តាច់ព្រ័ត្រនឹងត្រូវធ្វើឡើងក្នុងទីក្រុង Cologne ៕ (ដកស្រង់ចេញពី Reuters)
ចែករំលែកព័តមាននេះ