ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា បុរសម្នាក់ជាកម្មករបានរងរបួសធ្ងន់ បន្ទាប់ពីធ្លាក់ពីលើអគារជាន់ទី៤ ក្នុងការដ្ឋានសំណង់មួយកន្លែងកើតហេតុ បង្កឱ្យមានការភ្ញាក់ផ្អើលកាលពីម៉ោង៦និង៣០នាទីព្រឹក ថ្ងៃទី១៨ ខែមិថុនា ឆ្នាំ២០២០ នៅចំណុចការដ្ឋានសំណង់ក្រុមហ៊ុន ស្ថិតក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ហើយត្រូវបានកម្មករដូចគ្នាដឹកទៅសង្គ្រោះជាបន្ទាន់ផងដែរ តែជាអកុសលជនរងគ្រោះបានបាត់បង់ជីវិតនៅមន្ទីរពេទ្យទៅហើយ ។
លោកវរសេនីយ៍ឯកធិន ស៊ិនដេត អធិការនគរបាលក្រុងប៉ោយប៉ែត បានឲ្យដឹងថា ជនរងគ្រោះ ខាងលើឈ្មោះ ឆន ឆេន អាយុ៥១ឆ្នាំ ភេទប្រុស រស់នៅភូមិបំណាក់ ឃុំឈើតុំ ស្រុកក្រគរ ខេត្តពោធិ៍សាត់ មុខរបរកម្មករសំណង់ ស្នាក់នៅបន្ទប់កម្មករក្នុងការដ្ឋានសំណង់របស់ក្រុមហ៊ុន ស្ថិតនៅក្នុងភូមិសាមគ្គីមានជ័យ សង្កាត់ប៉ោយប៉ែត ។
លោកអធិការបានបញ្ជាក់ថា មុនពេលកើតហេតុ នៅម៉ោង៦និង៣០នាទីព្រឹក ថ្ងៃទី១៨ ខែមិថុនា ជនរងគ្រោះបានឡើងធ្វើការនៅលើអគារជាន់ទី៤ ស្រាប់តែធ្លាក់ពអាគារ បណ្តាលឱ្យជនរងគ្រោះរបួសបាក់ជើងឆ្វេង និងគ្រាំក្នុងផង ហើយក៏ត្រូវកម្មករដែលធ្វើការជាមួយបានដឹកយកទៅកាន់មន្ទីរពេទ្យបង្អែកក្រុងប៉ោយប៉ែត ដើម្បីជួយសង្គ្រោះបន្ទាន់ ប៉ុន្តែមិនអាចសង្គ្រោះបានទេ លុះដល់ម៉ោង៨ព្រឹកថ្ងៃដដែលនោះ ជនរងគ្រោះក៏ដាច់ខ្យល់តែម្តង ។
ប្រភពដដែលបន្តថា ក្រោយពេលកើតហេតុ សាកសពជនរងគ្រោះត្រូវតម្កល់ទុកនៅមន្ទីរពេទ្យ បង្អែកក្រុងប៉ោយប៉ែត ដើម្បីរង់ចាំសាច់ញាតិមកទទួលយកទៅចាត់ចែងធ្វើបុណ្យតាមប្រពៃណី៕ (កែសម្រួលដោយ ៖ បុប្ផា)
ចែករំលែកព័តមាននេះ