ខេត្តបន្ទាយមានជ័យ ៖ បុរសជាកម្មករសំណង់ម្នាក់ត្រូវគេប្រទះឃើញរងរបួសយ៉ាងធ្ងន់ធ្ងរដេកដួលក្បែរអគារមួយក្នុងការដ្ឋានសំណង់ ក្រោយមកក៏បានបាត់បង់ជីវិតនៅពេលបញ្ជូនទៅសង្គ្រោះនៅមន្ទីរពេទ្យ ។ ពាក់ព័ន្ធនឹងករណីនេះ ត្រូវបានអ្នកខ្លះសង្ស័យថា ជនរងគ្រោះធ្លាក់ពីលើការដ្ឋានសំណង់ ប៉ុន្តែសមត្ថកិច្ចថាជាករណីបញ្ចប់ជីវិត ។…
ខេត្តបន្ទាយមានជ័យ ៖ បុរសជាកម្មករសំណង់ម្នាក់ត្រូវគេប្រទះឃើញរងរបួសយ៉ាងធ្ងន់ធ្ងរដេកដួលក្បែរអគារមួយក្នុងការដ្ឋានសំណង់ ក្រោយមកក៏បានបាត់បង់ជីវិតនៅពេលបញ្ជូនទៅសង្គ្រោះនៅមន្ទីរពេទ្យ ។ ពាក់ព័ន្ធនឹងករណីនេះ ត្រូវបានអ្នកខ្លះសង្ស័យថា ជនរងគ្រោះធ្លាក់ពីលើការដ្ឋានសំណង់ ប៉ុន្តែសមត្ថកិច្ចថាជាករណីបញ្ចប់ជីវិត ។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកើតឡើងកាលពីព្រឹកថ្ងៃទី១៨ មិថុនា ឆ្នាំ២០២០ ក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
ជនរងគ្រោះដែលបាត់បង់ជីវិតខាងលើឈ្មោះឆន ឆេង ភេទប្រុស អាយុ៥១ឆ្នាំ ជាកម្មករសំណង់ និងមានទីលំនៅស្រុកបាកាន ខេត្តពោធិសាត់ ។
តាមប្រភពព័ត៌មានបានឱ្យដឹងថា ដំបូងឡើយគ្មានអ្នកណាដឹងថា ជនរងគ្រោះជួបឧប្បត្តិហេតុបែបណានោះទេ លុះនៅវេលាម៉ោងប្រហែលជាង៧ព្រឹកថ្ងៃកើតហេតុ ខណៈអ្នកលក់បបរគ្រឿងតាមរ៉ឺម៉កម៉ូតូកង់បីបើកលក់បបរក្នុងការដ្ឋានសំណង់ខាងលើ ស្រាប់តែប្រទះឃើញជនរងគ្រោះរងរបួសធ្ងន់ដេកដួលជិតអគារការដ្ឋានសំណង់ ទើបបង្កការភ្ញាក់ផ្អើលកើតឡើងតែម្តង ។
តាមប្រភពព័ត៌មានបានឱ្យដឹងថា ក្រោយពីមានការភ្ញាក់ផ្អើល ក្រុមកម្មករសំណង់ធ្វើការជាមួយគ្នាបានលើកជនរងគ្រោះដឹកតាមរ៉ឺម៉កម៉ូតូកង់បីយកទៅសង្គ្រោះនៅមន្ទីរពេទ្យបង្អែកក្រុងប៉ោយប៉ែត ប៉ុន្តែជាអកុសលដោយសារជនរងគ្រោះរបួសធ្ងន់ពេក ក៏បានបាត់បង់ជីវិតពេលកំពុងដឹកបញ្ជូនទៅសង្គ្រោះ ។
ពាក់ព័ន្ធនឹងករណីខាងលើនេះ គេមិនទាន់ដឹងថាមូលហេតុកើតចេញពីរឿងអ្វីឱ្យពិតប្រាកដនោះទេ ខណៈប្រភពខ្លះសង្ស័យថា ជនរងគ្រោះបានធ្លាក់ពីអគារការដ្ឋានសំណង់ ព្រោះនៅចំណុចជណ្តើរឡើងអគារ គេឃើញស្បែកជើងរបស់ជនរងគ្រោះ ចំណែកជនរងគ្រោះត្រូវបានគេប្រទះឃើញដេកដួលនៅលើដី ដោយមានរងរបួសបាក់ជើងយ៉ាងធ្ងន់ធ្ងរទៀតផង ។
យោងរបាយការណ៍របស់សមត្ថកិច្ចបានឱ្យដឹងថា ជនរងគ្រោះបានបញ្ចប់ជីវិតដោយលោតពីលើជាន់ទី៣ត្រង់ចំណុចកើតហេតុខាងលើ ដោយសារមានវិបត្តិក្នុងគ្រួសារ។
បច្ចុប្បន្ន សពជនរងគ្រោះកំពុងតម្កល់ទុកនៅក្នុងមន្ទីរពេទ្យ រង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ