រាជធានីភ្នំពេញ ៖ ពានរង្វាន់សម្ដេចតេជោ ហ៊ុន សែន នាយកសាលាល្អ គ្រូបង្រៀនល្អ មានលោកគ្រូ អ្នកគ្រូចំនួន២៥នាក់នៅទូទាំងប្រទេស បានទទួលជ័យលាភីពីលេខ១ ដល់លេខ៥ ក្នុងផ្នែកនីមួយៗ។
លោកហង់ ជូន ណារ៉ុន រដ្ឋមន្ត្រីក្រសួងអប់រំ យុវជននិងកីឡា បានអញ្ជើញចុះចែកពាន់រង្វាន់នេះដោយផ្ទាល់ដល់ជ័យលាភី តាំងពីដើមមិថុនាមក ។
លោកគ្រូ ប៉ិច ឈឿត នាយកសាលាវិទ្យាល័យពេជ្រចិន្ដា នៅស្រុកភ្នំព្រឹក ខេត្តបាត់ដំបង បានជាប់ជ័យលាភីលេខ១ ជានាយកសាលាឆ្នើម ។ កាលពីថ្ងៃទី៤ ខែមិថុនា រដ្ឋមន្ត្រីក្រសួងអប់រំ បានទៅប្រគល់ពាន់រង្វាន់ជូនគាត់ដល់ខេត្តបាត់ដំបង ។
លោកគ្រូ ប៉ិច ឈឿត ថា មានហេតុផលជាច្រើនសម្រាប់ការវាយតម្លៃជានាយកសាលាឆ្នើមនោះដូចជា ក្រសួងបានផ្តោតសំខាន់លើសកម្មភាពកសាងអភិវឌ្ឍន៍សាលា ការកសាងផែនការសម្រាប់អនាគត ការថែរក្សាបរិស្ថានក្នុងសាលា និងការចូលរួមកាត់បន្ថយអត្រាបោះបង់ការសិក្សារបស់សិស្សជាដើម ។
លោកគ្រូជ័យលាភីលេខ១ នាយកសាលាឆ្នើមថា ការជាប់ពាន់រង្វាន់សម្តេចហ៊ុនសែន លេខ១នេះ ជាកិត្តយសធំណាស់សម្រាប់លោក និងសាលាលោកដែលនៅទីជនបទឆ្ងាយដាច់ស្រយាលជិតព្រំដែនថៃនោះ ។
លោកប៉ិច ឈឿត និយាយទាំងរីករាយថា ក្នុងចំនុចដែលក្រសួងវាយតម្លៃចំពោះគាត់នោះលោកពេញចិត្តជាងគេ គឺសកម្មភាពចូលរួមកាត់បន្ថយអត្រាបោះបង់ការសិក្សារបស់សិស្ស ។ លោកគ្រូបាននិយាយថា គាត់បានក្លាយជាវិទ្យាល័យពេជ្រចិន្តា នៅឆ្នាំ២០១៦ ។ ពេលលោកធ្វើជានាយកសាលាដំបូងៗមានសិស្សបោះបង់ការសិក្សាប្រមាណ៤៥%ឯណោះ ។ «យើងបានកាត់បន្ថយពី៤៥% មកនៅត្រឹម៥% ប៉ុណ្ណោះ ។ ដើម្បីកាត់បន្ថយអត្រាបោះបង់ការសិក្សារបស់សិស្ស ខ្ញុំត្រូវចុះទៅដល់ផ្ទះសិស្ស អប់រំពួកគេ ម្តាយឪពុកគេឲ្យយល់ដឹងពីវិជ្ជា ។
បន្ថែមពីនេះខ្ញុំបានកៀគរអង្គការសប្បុរសជន ដើម្បីឲ្យពួកគេជួយផ្តល់កង់ សម្ភារៈលើកទឹកចិត្តដល់សិស្សឲ្យបោះបង់ការសិក្សាហើយវិលមករៀនវិញនោះ» ។
លោកគ្រូបានបញ្ជាក់ថា ជោគជ័យនៃការកាត់បន្ថយអត្រាបោះបង់ការសិក្សារបស់សិស្សនេះមិនមែនកើតមានដោយសារលោកតែម្នាក់ទេ គឺមានការចូលរួមពីលោកគ្រូអ្នកគ្រូទាំងអស់ អាជ្ញាធរ ពិសេសឪម្តាយ និងសិស្សខ្លួនឯងផ្ទាល់ ។ ជាទិសដៅទៅមុខលោកនាយកវិទ្យាល័យពេជ្រចិន្តា ចង់អភិវឌ្ឍន៍វិទ្យាល័យរបស់លោកទៅជាមជ្ឈមមណ្ឌលបណ្តុះបណ្តាលវិជ្ជាជីវៈ ដូចវិទ្យាល័យមួយចំនួននៅក្នុងប្រទេសដែរ ៕
ចែករំលែកព័តមាននេះ