រាជធានីភ្នំពេញ ៖ ព្រះនាងតូច នរោត្តម ជេនណា ដែលកំពុងល្បីល្បាញក្នុងវិស័យសិល្បៈចម្រៀងបានបង្កនូវបរិយាកាសថ្មីប្លែកមួយទៀតដែលកន្លងមក ព្រះនាងតូចច្រើនតែច្រៀងបទបែបសម័យជំនាន់ថ្មី តែលើកនេះព្រះនាងតូចបានបកស្រាយចម្រៀងចំណងជើង « Monica» សម្រាប់ថ្វាយព្រះពរដល់ព្រះរាជពិធីចម្រើនព្រះជន សម្តេចព្រះមហាក្សត្រី នរោត្តម មុនិនាថ សីហនុ ដែលចំថ្ងៃទី១៨ មិថុនានេះតែម្តង ។
ព្រះនាងតូចបកស្រាយចម្រៀងមានចំណងជើងថា « Monica» ជាភាសាបារាំង និងភាសាអង់គ្លេសយ៉ាងពិរោះរណ្តំគួរឲ្យស្ងើចសរសើរដល់ព្រះនាងតូច ដែលពោរពេញទៅដោយទេពកោសល្យខ្ពស់ ក្នុងការបកស្រាយគ្រប់ទម្រង់សិល្បៈ ។
យ៉ាងណាមិញ ព្រះនាងតូចដែលមានរូបសម្រស់ស្រស់សោភាពីធម្មជាតិ គឺមានសមត្ថភាពនិយាយ និងច្រៀងជាភាសាបរទេសរហូតដល់ ៥ភាសាឯណោះ ។
ក្រឡេកមើលហ្វេសប៊ុកផ្លូវការរបស់ព្រះនាងវិញ ព្រះនាងតូចអង្គនេះបានសរសេរសារថ្វាយព្រះពរ សម្តេចព្រះមហាក្សត្រី នរោត្តម មុនិនាថ សីហនុ ដែលមានខ្លឹមសារថា « ខ្ញុំម្ចាស់ សូមក្រាបបង្គំទូលថ្វាយព្រះពរ ហ្លូងយាយទួត សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាទីសក្ការ:ដ៏ខ្ពង់ខ្ពស់បំផុត ក្នុងឱកាស ព្រះរាជពិធីបុណ្យចម្រើនព្រះជន្ម គម្រប់៨៤ យាងចូល ៨៥ ព្រះវស្សារបស់ព្រះអង្គ ។ សូមហ្លួងយាយទួត គង់មានព្រះជន្មាយុយឺនយូរ មានព្រះបញ្ញាញាណវាងវៃ និងព្រះរាជសុខភាពមាំមួន ដើម្បីគង់នៅជាម្លប់ដ៏ត្រជាក់ត្រជុំដល់ប្រជានុរាស្ត្ររបស់ព្រះអង្គ» ។
មកដល់ពេលនេះ ចម្រៀងរបស់ព្រះនាងតូច មានអ្នកទស្សនាជាច្រើននាក់ហើយ ក៏ទទួលបានការសរសើរជាច្រើន ពីមហាជនដោយសារតែព្រះនាងមានព្រះជន្មត្រឹម៨ វស្សា តែសមត្ថភាពប្រើប្រាស់ភាសាបរទេស និងដុងសិល្បៈ គឺល្អក្រៃពេក ។
សូមបញ្ជាក់ថា បទចម្រៀង «ម៉ូនីកា» គឺជាបទបែបបូលេរ៉ូ ដែលអតីតព្រះមហាក្សត្រសម្តេចនរោត្តសីហនុបាននិពន្ធបទចម្រៀងនេះឡើង គឺព្រោះតែព្រះមហាក្សត្រ ព្រះបិតាជាតិ ចង់បង្ហាញពីក្តីស្នេហាចំពោះព្រះមហាក្សត្រីនាពេលនោះ ។
សូមរម្លឹកផងដែរថា ព្រះនាងតូច គឺជាបុត្រីទី២ របស់ព្រះម្ចាស់ក្សត្រីបុប្ជារី និងជាចៅលួតរបស់អតីតព្រះមហាក្សត្រព្រះករុណា ព្រះបាទសម្តេចព្រះនរោត្តម សីហនុ ព្រះបរមរតនកោដ្ឋ ៕
ចែករំលែកព័តមាននេះ