រាជធានីភ្នំពេញ ៖ បើតាមអ្នកនាំពាក្យក្រសួងសុខាភិបាលបានថ្លែងបញ្ជាក់ថា បុរសខ្មែរ វ័យ២១ឆ្នាំម្នាក់រកឃើញកើតកូវីដ១៩ គឺជាអ្នកដំណើរខ្មែរម្នាក់ ក្នុងចំណោមបងប្អូនមកពីម៉ាឡេស៊ីជាង ២០០ នាក់ ។…
រាជធានីភ្នំពេញ ៖ បើតាមអ្នកនាំពាក្យក្រសួងសុខាភិបាលបានថ្លែងបញ្ជាក់ថា បុរសខ្មែរ វ័យ២១ឆ្នាំម្នាក់រកឃើញកើតកូវីដ១៩ គឺជាអ្នកដំណើរខ្មែរម្នាក់ ក្នុងចំណោមបងប្អូនមកពីម៉ាឡេស៊ីជាង ២០០ នាក់ ។ ដែលការណ៍នេះ តម្រូវឲ្យអ្នកទាំងអស់ត្រូវធ្វើចត្តាឡីស័ក ។
លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានប្រាប់អ្នកសារព័ត៌មាន ឲ្យដឹងនៅថ្ងៃទី១៨ មិថុនានេះថា អ្នកផ្ទុកជំងឺកូវីដ១៩ម្នាក់ទៀត នៅថ្ងៃនេះ គឺជនជាតិខ្មែរអាយុ២១ឆ្នាំ ដែលទើបត្រឡប់មកពីប្រទេសម៉ាឡស៊ី កាលពីថ្ងៃទី១៦ មិថុនា ឆ្នាំ២០២០ ក្នុងចំណោមខ្មែរជាង២០០នាក់នោះ ។
លោកជំទាវបានបញ្ជាក់យ៉ាងដូច្នេះថា «គាត់ គឺនៅក្នុងក្រុមអ្នកមកពីម៉ាឡេស៊ី ក្មួយ អត់មានក្រុមណាផ្សេងទៀត ។ គឺក្រុមមកពីក្រុមមកពីម៉ាឡេស៊ី មានគ្នា២០០ នាក់ជាង» ។ ការរកឃើញបុរសខ្មែរម្នាក់ទៀតមកពីម៉ាឡេស៊ីថ្មីៗ មានផ្ទុកកូវីដ១៩ នេះនាំធ្វើអត្រាវិជ្ជមានជំងឺកូវីដ១៩ នៅកម្ពុជាកើនដល់១២៩ ករណី ។
សូមបញ្ជាក់ថា កម្ពុជាបានរកឃើញអ្នកផ្ទុកជំងឺកូវីដ១៩ម្នាក់ទៀត នៅថ្ងៃនេះ គឺជនជាតិខ្មែរ អាយុ២១ឆ្នាំ ដែលទើបត្រឡប់មកពីប្រទេសម៉ាឡស៊ី ដែលគាត់មានស្រុកកំណើតនៅខេត្តកោះកុង និងបានបញ្ជួនទៅសម្រាកព្យាបាលនៅមន្ទីរពេទ្យមិត្តខ្មែរ សូវៀតរួចហើយ ក្រោយពីបានធ្វើតេស្តឃើញវិជ្ជមានវីរុសឆ្លងមួយនេះ ។
មកដល់ពេលនេះ កម្ពុជាមានចំនួនអ្នកកើតកូវីដ១៩ សរុបកើនដល់១២៩នាក់ ក្នុងនោះចំនួនអ្នកជាសះស្បើយមាន ១២៦នាក់ និងអ្នកជំងឺកំពុងសម្រាកព្យាបាលចំនួន៣នាក់ ។ កើតជំងឺកូវីដ១៩ នៅកម្ពុជាមានជនជាតិវៀតណាម៣នាក់ ឥណ្ឌូណេស៊ី២នាក់ អាមេរិកកាំង២នាក់ ប៊ែលហ្ស៊ិក១នាក់ ម៉ាឡេស៊ី១៣នាក់ កាណាដា២នាក់ អង់គ្លេស៥ នាក់ បារាំង៤០នាក់ ចិន៣នាក់ និងពលរដ្ឋខ្មែរ៥៦នាក់ ។
ក្រសួងសុខាភិបាល នៅតែក្រើនរំលឹកពលរដ្ឋថា ជំងឺកូវីដ-១៩ នៅតែបន្តគម្រាមកំហែងជាប់ជានិច្ច និងសូមឲ្យពលរដ្ឋមានការប្រយ័ត្នជាប់ជានិច្ច ដោយអនុវត្តអនាម័យ នៅឃ្លាតឆ្ងាយពីគ្នា មិនចេញក្រៅផ្ទះ បើមិនចាំបាច់ ។ ក្រសួងបានបញ្ជាក់ថា ព្រោះប្រទេសជិតខាងកម្ពុជា និងពិភពលោកកំពុងបន្តរាតត្បាតជំងឺកូវីដ១៩ ដ៏ខ្លាំងក្លានៅឡើយ ។
នាយកដ្ឋានប្រយុទ្ធជំងឺឆ្លង នៃក្រសួងសុខាភិបានបន្តដាស់តឿន ពលរដ្ឋដូច្នេះថា «យើត្រូវបន្តអនុវត្តគម្លាតសង្គមបន្តទៀត ដូចជា ពន្យាការរៀបអាពាហ៌ពិពាហ៌ ពិធីជប់លៀង ការចាក់ធុងបាសរាំ ។ ល។ យើងត្រូវបន្តគម្លាតបុគ្គលបន្តទៀត ដូចជា អង្គុយគម្លាតពីគ្នា ឈររងចាំគម្លាតពីគ្នា ឈរជជែកគ្នាគម្លាតពីគ្នា ។ ល។ យើងត្រូវបន្តពាក់ម៉ាស់នៅពេលចាំបាច់ និងឧស្សាហ៍លាងដៃជាមួយសាប៊ូ អាល់កុល ឬជែល» ។
នៅពេលសាកសួរថា តើគិតត្រឹមថ្ងៃទី១៨ មិថុនានេះ មានមនុស្សប៉ុន្មានាក់ហើយ ដែលត្រូវបានធ្វើចត្តាឡីស័កនោះ លោកជំទាវ ឱ វណ្ណឌីន បានបញ្ជាក់ថា «ខ្ញុំមិនមានព័ត៌មានបែបនេះទេណា គ្រាន់តែជម្រាបថា យើងបានដាក់ឲ្យពួកគាត់ធ្វើចត្តាឡីស័កគ្រប់ជើងហោះហើរតាមនីតិវិធី ។ បើមានអ្នកវិជ្ជមាន ជើងហោះហើរមួយនឹងត្រូវតែធ្វើចត្តាឡីស័កទាំងអស់គ្នាគ្រប់១៤ថ្ងៃ ។ បើអវិជ្ជមានពួកគាត់អនុញ្ញាត្តឲ្យទៅធ្វើចត្តាឡីស័ក នៅតាមទីកន្លែងរបស់គាត់ » ៕
ចែករំលែកព័តមាននេះ