រាជធានីភ្នំពេញ ៖ ប្ដីប្រពន្ធ១គូ មានកូនប្រុសស្រី២នាក់ទៅហើយ ប៉ុន្តែមានភាពរកាំរកូសរស់នៅមិនចុះសម្រុងនឹងគ្នាក៏សម្រេចចិត្តថា លែងលះគ្នា តែលែងមិនទាន់ដាច់ស្រេចផងស្រាប់តែប្ដីចាកចេញពីផ្ទះបាត់រយៈពេលជាង២ខែកន្លងមកហើយ និងបានទៅសាងស្នេហ៍ថ្មីជាមួយនាងកម្មការិនីរោងចក្រកាត់ដេរម្នាក់ ក្រោមដំបូលផ្ទះជួលមួយកន្លែង ស្ថិតនៅនៅបន្ទប់ជួលលេខ១៥ ជាន់ទី១ ភូមិត្រពាំងពោធិ សង្កាត់ចោមចៅទី៣ រាជធានីភ្នំពេញ។
ចំណែកនាងជាប្រពន្ធបានតាមរកគ្រប់កន្លែង ហើយទីបំផុតបានឃើញប្ដីកំពុងសម្ងំដេកសោយសុខជាមួយស្រីថ្មីម្នាក់នោះក៏បានយកខ្សែចងទ្វារពីខាងក្រៅជាប់ រួចបានប្ដឹងនគរបាល និងអាជ្ញាធរសង្កាត់ចោមចៅទី៣ ឲ្យជួយអន្តរាគមន៍បង្កការភ្ញាក់ផ្អើល កាលពីវេលាម៉ោង៦និង៣០នាទីព្រឹក ថ្ងៃទី១៨ ខែមិថុនា ឆ្នាំ២០២០ ។
នគរបាលបានឲ្យដឹងថា បុរសជាប្តីឈ្មោះ យាំ រ៉ុន អាយុ៣៤ឆ្នាំ មុខរបរបើកបររថយន្តឈ្នួល មានស្រុកកំណើត នៅក្នុងភូមិចុងព្រៃ ឃុំជ្រៃ ស្រុករមាសហែក ខេត្តស្វាយរៀង និងស្នាក់នៅផ្ទះជួលខាងលើជាង២ខែមកហើយ រីឯនារីជាប្រពន្ធដើមឈ្មោះ ប៉េង ចាន់នី អាយុ៣៥ឆ្នាំ មានទីលំនៅក្នុងភូមិចុងព្រៃជាមួយគ្នាដែរ ។
ចំណែកនាងដែលជាស្រីថ្មី អាយុ៣៥ឆ្នាំ មុខរបរកម្មការនីរោងចក្រកាត់ដេរ មានស្រុកកំណើតនៅក្នុងភូមិអូរ ឃុំសង្វើយ ស្រុកជីក្រែង ខេត្តសៀមរាប ហើយសព្វថ្ងៃស្នាក់នៅក្នុងបន្ទប់ជួល កន្លែងកើតហេតុខាងលើ ។
ស្ត្រីជាប្រពន្ធដើមបានប្រាប់លោកចៅសង្កាត់ឲ្យដឹងថា នាង និងប្ដីបានរៀបការត្រឹមត្រូវតាមច្បាប់ រយៈពេល១២ឆ្នាំកន្លងមកហើយ និងបង្កើតបានមានកូនប្រុស១នាក់ មានអាយុ១១ឆ្នាំ និងកូនស្រី១នាក់ មានអាយុ៦ឆ្នាំហើយ ដោយប្ដីមានមុខរបរជាអ្នកបើកបររថយន្តឈ្នួល ។ ប៉ុន្តែមួយរយៈចុងក្រោយនេះ មានភាពរកាំរកូសរស់នៅហាក់មិនចុះសម្រុងនឹងគ្នាសោះ និងមានទំនាស់កើតឡើងនៅក្នុងគ្រួសារជាបន្តបន្ទាប់ រហូតឈានដល់ការលែងលះគ្នា តែនៅមិនទាន់លែងដាច់ស្រេចនៅឡើយទេ ។
ស្ត្រីរូបនេះបាននិយាយទៀតថា ក្រោយមកបន្ទាប់ពីមានទំនាស់កើតឡើង ចុងក្រោយប្ដីបានចាកចេញពីផ្ទះបាត់ស្រមោល ហើយគិតរហូតមកដល់ពេលនេះ មានរយៈពេល២ខែកន្លងមកហើយ នាងបានតាមរកគ្រប់ទីកន្លែង ហើយរហូតដល់វេលាព្រឹកថ្ងៃទី១៨ ខែមិថុនា ទើបឃើញកំពុងដេកនៅក្នុងបន្ទប់ជួលខាងលើជាមួយស្រីថ្មី ។
ភ្លាមៗនោះនាងមានអារម្មណ៍ក្ដៅក្រហាយខ្លាំងណាស់ ហើយក៏បានយកខ្សែចងទ្វារពីខាងក្រៅ រួចបានប្ដឹងនគរបាល និងអាជ្ញាធរសង្កាត់ចោមចៅទី៣ ឲ្យជួយអន្តរាគមន៍តែម្ដង ដើម្បីហៅប្ដី និងស្រីក្រោយទៅធ្វើការដោះស្រាយគ្នាបញ្ចប់រឿង ។
ចំណែកបុរសជាប្ដីក៏បានប្រាប់ឲ្យនគរបាលដឹងថា គាត់ និងប្រពន្ធបានលែងលះគ្នាមិនទាន់ដាច់ដែរ ហើយដោយសារតែមិនអាចរស់នៅជាមួយគ្នាលែងកើតតទៅទៀត ទើបគាត់សម្រេចចិត្តចាកចេញពីផ្ទះ ហើយបានសាងស្នេហ៍ថ្មី ដើម្បីអនាគតថ្មី រយៈពេលជាង២ខែមកហើយ ។ ម្យ៉ាងទៀតគាត់មិនបានលួចលាក់មានស្រីថ្មីអីនោះទេ គឺនាងក្រោយជាប្រពន្ធរបស់គាត់តែម្ដង ដែលគាត់បានសម្រេចយកនាងធ្វើជាប្រពន្ធជាគូអនាគត ។
រីឯនាងក្រោយក៏បាននិយាយថា នាងគឺជាស្រីមេម៉ាយហើយបានសុខចិត្តយកបុរសខាងលើជាប្ដី និងមិនបានលួចប្ដីគេទេ ព្រោះនៅពេលបានស្គាល់គ្នារហូតឈានដល់ការទំនាក់ទំនងស្នេហានេះ បុរសខាងលើបានប្រាប់នាងថា ជាបុរសពោះម៉ាយទើបនាងព្រមយកធ្វើជាប្ដី ។
ក្រោយពេលកើតហេតុលោក វ៉ា សាវឿន ចៅសង្កាត់ចោមចៅទី៣ បានហៅភាគីទាំង៣ទៅកាន់សាលាសង្កាត់ធ្វើការសម្របសម្រួលគ្នារហូតឈានដល់ការត្រូវរ៉ូវដោយខាងប្រពន្ធដើមទាមទារអាហារកិច្ច ដើម្បីចិញ្ចឹមកូនក្នុង១ខែ៣០ម៉ឺនរៀល ហើយភ្លាមៗនោះបុរសជាប្ដីរួមជាមួយប្រពន្ធក្រោយបានយល់ព្រមជូនតាមសំណើរ ហើយក្រោយមកបានធ្វើកិច្ចសន្យាបញ្ចប់រឿងរួចក៏បែកផ្លូវគ្នាទៅផ្ទះរៀងៗខ្លួន ៕
ចែករំលែកព័តមាននេះ