ខេត្តព្រះសីហនុ ៖ បុរស២នាក់ តាំងខ្លួនធ្វើជាប្រជាការពារ តែងតែធ្វើសកម្មភាពដើរទារលុយប្រជាពលរដ្ឋយ៉ាងអនាធិបតេយ្យ នៅតំបន់ឆ្នេរអារីស្ដុន ត្រូវបានកម្លាំងនគរបាលខេត្តព្រះសីហនុឃាត់ខ្លួន ។
នៅថ្ងៃទី១៥ ខែមិថុនា ឆ្នាំ២០២០ បុរសទាំងពីរនាក់នេះ ត្រូវបានមន្ត្រីសាលាខេត្តព្រះសីហនុ ធ្វើការអប់រំ និងឲ្យធ្វើកិច្ចសន្យា ផ្ដិតមេដៃបញ្ឈប់ធ្វើសកម្មភាពតទៅទៀត បើនៅតែប្រព្រឹត្តទៀត នឹងប្រឈមមុខផ្លូវច្បាប់ ។
មន្ត្រីសាលាខេត្តព្រះសីហនុ បានអោយដឹងថា បើតាមបទបញ្ជារបស់លោក គួច ចំរើន អភិបាលខេត្តព្រះសីហនុ ដាក់ទៅមន្ត្រីដែលពាក់ព័ន្ធ ត្រូវចុះរៀបចំសណ្ដាប់ធ្នាប់នៅតាមតំបន់ឆ្នេរ ជាប្រចាំ ហើយមិនអនុញ្ញាតឲ្យបុគ្គលណាម្នាក់ ដើរទារលុយពីប្រជាពលរដ្ឋនោះទេ ផ្ទុយទៅវិញ បែរជាមានបុរសពីរនាក់ខាងលើនេះ បន្លំខ្លួនជាប្រជាការពារ ហើយដើរទារលុយប្រជាពលរដ្ឋមកលេងកម្សាន្ដ នៅតាមតំបន់ឆ្នេរអារីស្ដុន យ៉ាងអនាធិបតេយ្យ ទើបកម្លាំងចាប់ឃាត់ខ្លួនបុគ្គលទាំង២នាក់នេះតែម្តង ៕
ចែករំលែកព័តមាននេះ