រាជធានីភ្នំពេញ ៖ លោក ស៊ាន បូរ៉ាត រដ្ឋលេខាធិការនៃក្រសួងអប់រំ យុវជន និងកីឡា បានទទួលការគាំទ្រពីអង្គមហាសន្និបាត ឲ្យធ្វើជាប្រធានសហព័ន្ធកីឡាបាល់បោះកម្ពុជាសម្រាប់អាណត្តិថ្មី ទី៨ ឆ្នាំ២០២០-២០២៣ បន្តទៀត បន្ទាប់ពីសហព័ន្ធបានធ្វើមហាសន្និបាតបញ្ចប់អាណត្តិចាស់(២០១៧-២០២០)របស់ខ្លួននាព្រឹកថ្ងៃទី១៦ ខែមិថុនា ឆ្នាំ២០២០ នៅសាលប្រជុំនាយកដ្ឋានអប់រំកាយ និងកីឡា ក្នុងពហុកីឡដ្ឋានជាតិ។
សម្រាប់អាណត្តិទី៨ ឆ្នាំ២០២០-២០២៣ មានសមាជិកចំនួន១៥រូប ចំណែកអគ្គលេខាធិការ និងអគ្គលេខាធិការរងសហព័ន្ធមិនមែនជាសមាជិកឡើយ ។ សមាជិកប្រតិបតិ្តចំនួន១៥រូប រួមមានលោក ស៊ាន បូរ៉ាត រដ្ឋលេខាធិការនៃក្រសួងអប់រំ យុវជន និងកីឡា ជាប្រធានសហព័ន្ធកីឡាបាល់បោះកម្ពុជា, លោក អ៊ុក សិទ្ធិជាតិ អគ្គនាយកកីឡា លោក ឈី សម្បតិ្តលោក ខេស៊ី បាណេត ជាអនុប្រធាន, លោក សាំ យៀង, លោក ជូ សុខារី, លោក រ៉ាឌី មុំ,លោក សាន់ នី, លោក គឹម រ័ត្នណារិន, លោក ប៉ុន សុខ, លោក ហ៊ុន សាមុត, លោក ដួង មាសចំរើន, លោក ផ្លុង លីឌៀន, លោក អែម ប៊ុន្នី និងលោក អ៊ុំ ចាន់តារា ជាសមាជិក ។
នាពេលបច្ចុប្បន្ន សហព័ន្ធមានការខ្វះខាតធនធានមនុស្ស អ្នកឧបត្ថម្ភនៅមានកម្រិត និងពុំទាន់មានការចូលរួមពីសំណាក់មហាជនច្រើនកុះករនៅឡើយ ។ ស្មារតីសហការ និងការបំពេញការងារជាក្រុមនៅពុំទាន់មានការស៊ីសង្វាក់គ្នា ។ ចំពោះហេដ្ឋារចនាសម្ព័ន្ធដូចជាទីលានមានតិចតួច និងមិនទាន់សមស្របតាមស្តង់ដារបច្ចេកទេស ព្រមទាំងខ្វះខាតនូវសម្ភារបច្ចេកទេសដែលបំពាក់នៅទីលានប្រកួត និងសមស្របតាមស្តង់ដារប្រកួត។
សូមបញ្ជាក់ថា ផ្អែកតាមរបាយការណ៍សកម្មភាពរបស់សហព័ន្ធកីឡាបាល់បោះកម្ពុជាមួយអាណត្តិទី៧(២០១៧-២០២០) បានបង្ហាញឲ្យឃើញថា សហព័ន្ធកីឡាបាល់បោះកម្ពុជា បានដំណើរការទៅដោយរលូន ទោះបីជាមានចំណុចខ្សោយមួយចំនួនដូចរៀបរាប់ខាងលើក៏ដោយ ។
គណៈកម្មាធិការប្រតិបត្តិសហព័ន្ធ និងមន្ត្រីបច្ចេកទេស បានខិតខំប្រឹងប្រែងបំពេញភារកិច្ចរបស់ខ្លួនឆ្លើយតបទៅគោលដៅរបស់កីឡាជាតិនិងអន្តរជាតិនិងសម្រេចផែនការរបស់ខ្លួន ។ សហព័ន្ធបានពុះពាររាល់ការលំបាកដោយខិតខំបំពេញភារកិច្ចដោះស្រាយចំណុចខ្វះខាតដែលនៅសេសសល់និងជំរុញឲ្យការងារសហព័ន្ធទទួលបានជោគជ័យនាពេលអនាគត ៕ (កែសម្រួលដោយ ៖ បុប្ផា)
ចែករំលែកព័តមាននេះ