រាជធានីភ្នំពេញ ៖ អាជ្ញាធររាជធានីភ្នំពេញបានអោយដឹងថា ចៀសវាងនូវការបញ្ចេញឈ្មោះលើបណ្តាញសង្គមនាំអោយបងប្អូនខ្មាស់គេ សូមបងប្អូនអញ្ជើញទៅបង់ថ្លៃសេវាប្រមូលសំរាមអោយបានរួសរាន់ តាមសេចក្តីជូនដំណឹងរបស់រដ្ឋបាលរាជធានីភ្នំពេញ ។
រដ្ឋបាលរាជធានីភ្នំពេញ កាលពីថ្ងៃទី២៥ ខែឧសភា ឆ្នាំ២០២០ បានចេញសេចក្ដីជូនដំណឹងដល់ប្រជាពលរដ្ឋរស់នៅរាជធានីភ្នំពេញ ដែលមិនទាន់បង់ថ្លៃសេវាប្រមូលសំរាម និងសំណល់រឹង សូមរួសរាន់បំពេញកាតព្វកិច្ចនេះ ដើម្បីចៀសវាងការពិន័យផ្សេងៗ។ រដ្ឋបាលរាជធានីភ្នំពេញ បានកត់សម្គាល់ឃើញថា រហូតមកដល់ពេលនេះ ប្រជាពលរដ្ឋភាគច្រើនបង់ថ្លៃសេវាប្រមូលសំរាមរួចហើយ ប៉ុន្ដែនៅមានមួយចំនួនទៀតមិនទាន់បានបំពេញកាតព្វកិច្ចបង់ថ្លៃសេវាប្រមូលសំរាម និងសំណល់រឹងនេះនៅឡើយ។
រដ្ឋបាលរាជធានីភ្នំពេញ បានដាក់ចេញនូវវិធានការមួយចំនួនផងដែរ ប្រសិនបើប្រជាពលរដ្ឋមិនមកបំពេញកាតព្វកិច្ចនេះ ៖ ទី១-បញ្ចេញបញ្ជីឈ្មោះអ្នកមិនទាន់បានបង់ថ្លៃសេវាប្រមូលសំរាម និងសំណល់រឹង ជាសាធារណៈតាមបណ្ដាញសង្គម ឬប្រព័ន្ធផ្សព្វផ្សាយនានា ទី២-កត់ត្រាជាបំណុល ហើយអនុវត្តវិធានការរដ្ឋបាល ដោយបិទអាជីវកម្ម ឬសេវាកម្មជាបណ្ដោះអាសន្ន និងទី៣-អនុវត្តវិធានការផ្សេងៗទៀតតាមការចាំបាច់ ។
សូមជម្រាបថា រាជរដ្ឋាភិបាលសម្រេចបង្វែរថ្លៃសេវាប្រមូលសំរាម និងសំណល់រឹង នៅរាជធានីភ្នំពេញ ពីក្រុមហ៊ុនស៊ីនទ្រី មកជូនរដ្ឋាករស្វយ័តគ្រប់គ្រងសំរាម និងសំណង់រឹងរាជធានីភ្នំពេញវិញ ដើម្បីជំរុញនូវប្រសិទ្ធភាពនៃការប្រមូលសំរាម ។
គួររំលឹកថា បច្ចុប្បន្ននេះ ប្រជាពលរដ្ឋរាជធានីភ្នំពេញបានប្រេីសប្រាស់សេវាប្រមូលសំរាមប្រមាណជិត៤០ម៉ឺននាក់ ឬទីតាំង ដែលមានអ្នកបង់សេវាយ៉ាងច្រេីន ប៉ុន្តែអ្នកដែលមិនទាន់បង់នៅសល់តិចតួច ដូច្នេះសូមបងប្អូនប្រជាពលរដ្ឋរួសរាន់ទៅបង់ថ្លៃសេវាប្រមូលសំរាមអោយបានគ្រប់ៗគ្នា៕ (កែសម្រួលដោយ ៖ ធីតា)
ចែករំលែកព័តមាននេះ