រាជធានីភ្នំពេញ ៖ រថយន្តកុងតឺន័រមួយគ្រឿងសង្ស័យបើកបរក្នុងល្បឿនលឿនខ្វះការប្រុងប្រយ័ត្នក៏ជ្រុលទៅបុករថយន្ត៣គ្រឿងផ្សេងទៀតជាបន្តបន្ទាប់ បណ្តាលឱ្យរងការខូចខាតយ៉ាងធ្ងន់ធ្ងរ និងបង្កអោយមានការភ្ញាក់ផ្អើលកាលពីវេលាម៉ោង៦យប់ថ្ងៃទី១៦ ខែមិថុនា ឆ្នាំ២០២០ តាមបណ្តោយមហាវិថីឈ្នះឈ្នះហៅផ្លូវទំនប់កប់ស្រូវ ស្ថិតនៅភូមិត្រពាំងធ្នង់ សង្កាត់សំរោងក្រោម…
រាជធានីភ្នំពេញ ៖ រថយន្តកុងតឺន័រមួយគ្រឿងសង្ស័យបើកបរក្នុងល្បឿនលឿនខ្វះការប្រុងប្រយ័ត្នក៏ជ្រុលទៅបុករថយន្ត៣គ្រឿងផ្សេងទៀតជាបន្តបន្ទាប់ បណ្តាលឱ្យរងការខូចខាតយ៉ាងធ្ងន់ធ្ងរ និងបង្កអោយមានការភ្ញាក់ផ្អើលកាលពីវេលាម៉ោង៦យប់ថ្ងៃទី១៦ ខែមិថុនា ឆ្នាំ២០២០ តាមបណ្តោយមហាវិថីឈ្នះឈ្នះហៅផ្លូវទំនប់កប់ស្រូវ ស្ថិតនៅភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
រថយន្តកុងតឺន័រមួយគ្រឿងខាងលើ ពណ៌ស ពាក់ស្លាកលេខ ភ្នំពេញ 3C-6288 អ្នកបើកបរមិនស្គាល់អត្តសញ្ញាណ ។ ចំណែករថយន្តរងគ្រោះទាំង៣គ្រឿងខាងលើរួមមាន ១-រថយន្តម៉ាកព្រូស ពណ៌ស មិនចាំស្លាកលេខ អ្នកបើកបរមិនស្គាល់អត្តសញ្ញាណ បានរងការខូចខាតតិចតួច ២-រថយន្តម៉ាកកូរ៉ូឡា ពណ៌ក្រហម អ្នកបើកបរមិនស្គាល់អត្តសញ្ញាណ បានរងការខូចខាត និង៣-រថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 2G-1815 អ្នកបើកបរមិនស្គាល់អត្តសញ្ញាណ បានរងការខូចខាតយ៉ាងធ្ងន់ធ្ងរ។
តាមប្រភពពត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញម៉ូតូមួយគ្រឿងបើកឆ្លងផ្លូវ ក្នុងទិសដៅពីកើតទៅលិច បន្ទាប់មករថយន្តម៉ាកព្រូសបានបន្ថយល្បឿន ដើម្បីអោយម៉ូតូឆ្លងផ្លូវ ចំណែករថយន្តម៉ាកកូរ៉ូឡា និងរថយន្តម៉ាកហ៊ីយ៉ាន់ដាយក៏បានបន្ថយល្បឿនដូចគ្នា ពេលនោះធ្វើឲ្យរថយន្តកុងតឺន័រដែលបើកបរក្នុងល្បឿនយ៉ាងលឿន ក្នុងទិសដៅស្របគ្នាពីជើងទៅត្បូងជាន់ហ្វ្រាំងមិនជាប់ក៏បុករុញរថយន្តម៉ាកហ៊ីយ៉ាន់ដាយពីក្រោយយ៉ាងពេញទំហឹង ហើយបុករថយន្តម៉ាកកូរ៉ូឡា និងរថយន្តម៉ាកព្រូស បណ្តាលឲ្យរងការខូចខាតយ៉ាងធ្ងន់ធ្ងរ តែសំណាងល្អមិនបង្កគ្រោះថ្នាក់ដល់អ្នកបើកបររថយន្តទាំង៣គ្រឿងនោះឡើយ ។
តាមប្រភពដដែលបានបន្តទៀតថា បន្ទាប់ពីកើតហេតុ អ្នកបើកបររថយន្តកុងតឺន័របានទាក់ទងទៅតំណាងក្រុមហ៊ុនរបស់ខ្លូនដើម្បីឱ្យចុះមកដោះស្រាយនៅកន្លែងកើតហេតុភ្លាមៗផងដែរ ។ ចំណែកសមត្ថកិច្ចនគរបាលប៉ុស្តិ៍បានមកដល់កន្លែងកើតហេតុ ដើម្បីសំរួលចរាចរណ៍ កុំឲ្យមានការកកស្ទះ ហើយកំលាំងនគរបាលសំរោងក្រោមបានបាញ់ថ្នាំសម្គាល់នៅកន្លែងកើតហេតុ រួចអោយរថយន្ត២គ្រឿងអែបខាង និងអោយភាគីទាំងសងខាងសំរបសំរួលគ្នានៅកន្លែងកើតហេតុភ្លាមៗផងដែរ។
ក្រោយពេលកើតហេតុ តំណាងក្រុមហ៊ុនរបស់រថយន្តកុងតឺន័របានចុះមកសំរបសំរួល ដោយសងរថយន្តម៉ាកព្រូស ចំនួន៥០ដុល្លារ និងសងរថយន្តម៉ាកកូរ៉ូឡាចំនួន៣០០ដុល្លារ ចំណែកឯរថយន្តហ៊ីយ៉ាន់ដាយវិញ ខាងរថយន្តកុងតឺន័របានសំរបសំរួលសងចំនួន១០០០ដុល្លារដើម្បីបញ្ចប់រឿងនៅកន្លែងកើតហេតុ ៕
ចែករំលែកព័តមាននេះ