ខេត្តបន្ទាយមានជ័យ ៖ អគ្គិភ័យដែលឆាបឆេះតូបអាជីវករខ្មែរលក់ខោអាវនៅផ្សាររ៉ុងក្លឿ ប្រទេសថៃ អស់ចំនួន២តូបអស់ទាំងស្រុងដែលបណ្តាលមកពីទុស្សេខ្សែភ្លើងកាលពីថ្ងៃទី១៣ មិថុនានោះ បើគិតជាថវិកា គឺសរុប១០ម៉ឺនដុល្លារឯណោះ ខណៈពេលដែលផ្សាររ៉ុងក្លឿបានបិទ ស្របពេល…
ខេត្តបន្ទាយមានជ័យ ៖ អគ្គិភ័យដែលឆាបឆេះតូបអាជីវករខ្មែរលក់ខោអាវនៅផ្សាររ៉ុងក្លឿ ប្រទេសថៃ អស់ចំនួន២តូបអស់ទាំងស្រុងដែលបណ្តាលមកពីទុស្សេខ្សែភ្លើងកាលពីថ្ងៃទី១៣ មិថុនានោះ បើគិតជាថវិកា គឺសរុប១០ម៉ឺនដុល្លារឯណោះ ខណៈពេលដែលផ្សាររ៉ុងក្លឿបានបិទ ស្របពេល ប្រទេសថៃបិទច្រកព្រំដែនកម្ពុជា-ថៃ ដើម្បីទប់ស្កាត់ជំងឺកូវីដ១៩។
មន្ត្រីនគរបាលអន្តោរប្រវេសន៍ច្រកទ្វារអន្តរជាតិប៉ោយប៉ែត បានប្រាប់ឱ្យដឹងនៅថ្ងៃទី១៦ ខែមិថុនា ឆ្នាំ២០២០ថា អគ្គិភ័យបានឆាបឆេះតូបអាជីវករខ្មែរលក់នៅផ្សាររ៉ុងក្លឿ ប្រទេសថៃ អស់ចំនួន២តូប ដែលហេតុការណ៍នេះបានកើតឡើងកាលពីថ្ងៃទី១៣ ខែមិថុនា ឆ្នាំ២០២០ ។
មន្ត្រីនគរបាលអន្តោរប្រវេសន៍បន្តថា តូបទាំង២ខាងលើ មានម្ចាស់១.ឈ្មោះ ហេង វីរ៉ា ភេទប្រុស អាយុ៣២ឆ្នាំ មានប្រពន្ធឈ្មោះ ហេង ស្រីលីន អាយុ២៥ឆ្នាំ មុខរបបលក់ខោអាវ ដែលរស់នៅភូមិក្បាលស្ពាន២ សង្កាត់-ក្រុងប៉ោយប៉ែត ហើយតូបដែលឆេះមានទំហំ៤គុណ៤ម៉ែត្រ បណ្តាលឱ្យខូចខាតអស់ទាំងស្រុងដែលសរុបថវិកា២០.០០០ដុល្លារ និង២-ឈ្មោះ តាំង រិទ្ធី ភេទប្រុស អាយុ៥០ឆ្នាំ មានប្រពន្ធឈ្មោះ អៀង ដាណែត អាយុ៣៨ឆ្នាំ មុខរបបលក់ដូរខោអាវ រស់នៅភូមិមិត្តភាព សង្កាត់-ក្រុងប៉ោយប៉ែត ហើយតូបឆេះមានទំហំ៤គុណ៤ម៉ែត្រ បណ្តាលឱ្យឆេះខូចខាតអស់ទាំងស្រុង សរុបថវិការ៨០.០០០ដុល្លារ។
មន្ត្រីនគរបាលអន្តោប្រវេសន៍បានបញ្ជាក់ថា អគ្គិភ័យឆាបឆេះតូបអាជីវករខ្មែរលក់នៅផ្សាររ៉ុងក្លឿ ប្រទេសថៃ អស់ចំនួន២តូប ធ្វើឱ្យរងការខូចខាតដែលសរុបថវិកាទាំង២តូបចំនួន១០០.០០០ដុល្លារ (១០ម៉ឺនដុល្លារ) ហើយចំពោះមូលហេតុដែលបណ្តាលមកពីឆ្លងចរន្តអគ្គិសនី ទើបធ្វើឱ្យទុស្សេខ្សែភ្លើងក្លាយជាអគ្គិភ័យឆាបឆេះតែម្តង នេះបើយោងតាមរបាយការណ៍ខាងភាគីថៃ។
គួរបញ្ជាក់ថា អគ្គីភ័យដែលឆាបឆេះតូបអាជីវករខ្មែរដែលលក់នៅផ្សាររ៉ុងក្លឿ ប្រទេសថៃ ខាងលើនេះ គឺស្របពេលដែលភាគីថៃបិទច្រកព្រំដែនកម្ពុជា-ថៃ ដើម្បីទប់ស្កាត់កូវីដ១៩ និងផ្សារត្រូវបានបិទមិនបានចូលលក់ដូរនោះ ទើបធ្វើឱ្យអគ្គិភ័យឆាបឆេះអស់តូបអាជីវករអស់ទាំងស្រុងតែម្តង៕ (កែសម្រួលដោយ ៖ បុប្ផា)
ចែករំលែកព័តមាននេះ