រាជធានីភ្នំពេញ ៖ ចំនួនសហគមន៍ក្រីក្រនៅរាជធានីភ្នំពេញមានការថយចុះ គួរឲ្យកត់សម្គាល់ ។ ជាក់ស្តែងនៅរាជធានីភ្នំពេញយ៉ាងហោចណាស់ គឺមានសហគមន៍ក្រីក្រ ចំនួន៣៣៥ កាលពីឆ្នាំ២០០៣មាន តែមកដល់ឆ្នាំ២០២០…
រាជធានីភ្នំពេញ ៖ ចំនួនសហគមន៍ក្រីក្រនៅរាជធានីភ្នំពេញមានការថយចុះ គួរឲ្យកត់សម្គាល់ ។ ជាក់ស្តែងនៅរាជធានីភ្នំពេញយ៉ាងហោចណាស់ គឺមានសហគមន៍ក្រីក្រ ចំនួន៣៣៥ កាលពីឆ្នាំ២០០៣មាន តែមកដល់ឆ្នាំ២០២០ សហគមន៍ក្រីក្របានថយមកនៅត្រឹមតែ១៥១ ប៉ុណ្ណោះ ។
នេះបើតាមការឲ្យដឹងរបស់លោកអភិបាលរាជធានីភ្នំពេញ នៅក្នុងសន្និសីទសារព័ត៌មាននិយាយពីវឌ្ឍន៍ភាពរបស់ក្រុង កាលពីថ្ងៃទី១៦ មិថុនានេះ ។ អត្រាសហគមន៍ក្រីក្របានធ្លាក់ចុះ បើតាមលោក ឃួង ស្រេង អភិបាលរាជធានីភ្នំពេញ គឺដោយសារក្រុងបានអនុវត្តនូវគោលការណ៍ប្រទានកម្មរបស់រាជរដ្ឋាភិបាល ។
រដ្ឋាភិបាលបានធ្វើប្រទានកម្មដីចំនួន២៩ទីតាំង ស្មើទំហំដីប្រមាណ៨២ហិកតា ដល់ពលរដ្ឋក្រីក្រចំនួន១៨ពាន់នាក់ ។ «ពលរដ្ឋដែលរស់នៅក្នុងសហគមន៍មិនរៀបរយ ទទួលបានដីកម្មសិទ្ធិតាមរយៈការធ្វើប្រទានកម្ម សម្រាប់ពួកគាត់ធ្វើការអភិឌ្ឍនៅក្នុងទីក្រុង»។
លោក ឃួង ស្រេង បានបញ្ជាក់បន្ថែមថា សហគមន៍បូរីកីឡា ដែលមានពលរដ្ឋធ្វើការតវ៉ាជាច្រើនឆ្នាំបានកាត់ចេញពីសហគមន៍ក្រីក្រនៅឆ្នាំ២០១៩ ។ ពលរដ្ឋក្រីក្ររស់នៅតាមប្រឡាយស្ទឹងមានជ័យ ទទួលបានការអភិវឌ្ឍន៍នៅនឹងកន្លែង ។
ថ្នាក់ដឹកនាំរាជធានីភ្នំពេញបានបញ្ជាក់ថា រហូតមកដល់ពេលនេះ អាជ្ញាធរបានដោះស្រាយចប់រួចរាល់ទំនាស់ដីធ្លីធំពីរនៅកណ្តាលក្រុង គឺតំបន់បឹងកក់ និងតំបន់បូរីកីឡា ហើយកំពុងឈានទៅបញ្ចប់ទំនាស់ក្នុងតំបន់អភិវឌ្ឍន៍ ឬស្សីកែវ ជើងឯង បឹងទំពុន ផ្លូវដែក ស្ថានីយ៍បូម ទឹកទួលគោក អាងស្តុកទឹកបឹងត្របែក ជាបន្តទៀត ។ មានការសង្កេតឃើញថា ការអភិវឌ្ឍទីក្រុងភ្នំពេញ ធ្វើឲ្យមានការជម្លៀសពលរដ្ឋចេញពីដីធ្លីមួយចំនួនដែលអាជ្ញាធរថាជា តំបន់មិនទាន់រៀបរយ មានដូចជា សហគមន៍ដីក្រហម សំបុកចាប កោះពេជ្រ បឹងកក់ និងបូរីកីឡាជាដើម ។ ការជម្លៀសពលរដ្ឋចេញពីតំបន់ទាំងនោះភាគច្រើនពួកគាត់មិនពេញចិត្ត ហើយបានបង្កឲ្យមានការតវ៉ា។
លោកឃួង ស្រេង បានបញ្ជាក់ថា «កាលដោះស្រាយបញ្ហាដីធ្លីនៅក្នុងក្រុងភ្នំពេញនាពេលកន្លងមក ឈរលើគោលការណ៍ច្បាប់ស្តីពីសិទ្ធិលំនៅដ្ឋាន និងគោការណ៍មនុស្សធម៌» ។ រាជធានីភ្នំពេញបច្ចុប្បន្នមានពលរដ្ឋរស់នៅ និងប្រកបការងារប្រមាណ៣លាននាក់ ៕
ចែករំលែកព័តមាននេះ