រាជធានីភ្នំពេញ ៖ ចាប់ពីពេលនេះតទៅ រាល់មតិយោបល់ ឬសំណូមពរ (Comment) របស់មហាជនក្នុងគេហទំព័រហ្វេសប៊ុក (Facebook Page) របស់សម្តេចក្រឡាហោម ស ខេង នឹងត្រូវដកស្រង់ដោយក្រុមតាមដានមួយ ដើម្បីគោរពជូនសម្តេចក្រឡាហោមជ្រាប ពិនិត្យ និងស្នើសុំមតិដឹកនាំ ។
ក្រុមការងារនេះទៀតសោតនឹងចាត់បញ្ចូនឯកសារតាមចំណារដ៍ខ្ពង់ខ្ពស់របស់សម្តេចក្រឡាហោម ទៅ បណ្តាអគ្គនាយកដ្ឋាននានា ឬអង្គភាពពាក់ព័ន្ធចំណុះក្រសួងមហាផ្ទៃ ដើម្បីពិនិត្យ និងដោះស្រាយតាមសមត្ថកិច្ច ទាំងនេះ គឺជាភារកិច្ចរបស់ក្រុមការងារតាមដាមលើទំព័រហ្វេសប៊ុករបស់សម្តេចក្រឡាហោម ស ខេង ដែលទើបបង្កើតឡើង ។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញសេចក្តីសម្រេចបង្កើតក្រុមការងារដាមតាមការបញ្ចេញមតិ សំណូមពរ របស់សាធារណជន នៅលើទំព័រហ្វេសប៊ុករបស់សម្តេច កាលពីថ្ងៃទី១៥ មិថុនា ឆ្នាំ២០២០ ។
ក្រៅពីមានភារកិច្ចដូចខាងលើក្រុមការងារតាមដានអំពីការដោះស្រាយចំពោះមតិយោបល់ ឬសំណូមពរ(Comment) របស់មហាជនក្នុងទំព័រហ្វេសប៊ុក សម្តេចក្រឡាហោម ស ខេង មានភារកិច្ចជាច្រើនទៀត បើតាមសេចក្តីសម្រេចនោះ ។
សម្តេច ស ខេង បានបញ្ជាក់ថា ក្នុងករណីចាំបាច់ ក្រុមការងារអាចសហការជាមួយបណ្តាអគ្គនាយកដ្ឋាននានា ឬអង្គភាពពាក់ព័ន្ធ ដើម្បីចុះពិនិត្យ និងដោះស្រាយករណីនោះ រួចរាយការណ៍អំពីលទ្ធផលនៃការដោះស្រាយ ឬមិនទាន់ដោះស្រាយពីបណ្តាអគ្គនាយកដ្ឋាននានា និងអង្គភាពពាក់ព័ន្ធ ដើម្បីសម្តេចក្រឡាហោមជ្រាប ។
សម្តេចឧបនាយករដ្ឋមន្ត្រី បានបញ្ជាក់ថា ក្រុមការងារតាមដាមទំព័រហ្វេកសប៊ុករបស់សម្តេចនេះត្រូវបានអនុវត្តការងារចាប់ពីថ្ងៃទី១៥ មិថុនា ឆ្នាំ២០២០ ដែលជាថ្ងៃសម្តេចបានចុះហត្ថលេខាលើសេចក្តីសម្រេចនោះតទៅ ៕
ចែករំលែកព័តមាននេះ