ប្រទេសឥណ្ឌា-ចិន ៖ កងទ័ពឥណ្ឌាប្រកាសនាថ្ងៃទី១៦ មិថុនា ពីការបាត់បង់ជីវិតទាហានរបស់ខ្លួន២០នាក់ ក្នុងការប៉ះទង្គិចគ្នាខ្លួនទល់នឹងខ្លួន នៅព្រំដែនជាមួយកងទ័ពចិនក្នុងតំបន់ព្រំដែនហ៊ីម៉ាឡៃយ៉ា ដែលទីនោះចាប់តាំងពីយូរមកហើយ ជាប្រភពនៃភាពតានតឹង រវាងមហាប្រទេសទាំង២…
ប្រទេសឥណ្ឌា-ចិន ៖ កងទ័ពឥណ្ឌាប្រកាសនាថ្ងៃទី១៦ មិថុនា ពីការបាត់បង់ជីវិតទាហានរបស់ខ្លួន២០នាក់ ក្នុងការប៉ះទង្គិចគ្នាខ្លួនទល់នឹងខ្លួន នៅព្រំដែនជាមួយកងទ័ពចិនក្នុងតំបន់ព្រំដែនហ៊ីម៉ាឡៃយ៉ា ដែលទីនោះចាប់តាំងពីយូរមកហើយ ជាប្រភពនៃភាពតានតឹង រវាងមហាប្រទេសទាំង២ នៅអាស៊ី។
ក្រសួងការបរទេសចិនអះអាងថា ការប៉ះទង្គិចគ្នាដ៏សាហាវ កើតមានកាលពីយប់ថ្ងៃទី១៥ មកថ្ងៃទី១៦ មិថុនា ក្នុងតំបន់ដាច់ស្រយាល និងពោរពេញដោយព្រិល LADAKH។ ក្រសួងនោះពុំបានរៀបរាប់ពីជនរងគ្រោះ តែខាងក្រសួងការបរទេសឥណ្ឌាអះអាងថា មានជនរងគ្រោះទាំងសងខាង។
យោងតាមប្រភពរដ្ឋាភិបាលឥណ្ឌាថា ពុំមានការបាញ់តតាំងគ្នាឡើយ តែកងទាហានទាំងសងខាង បានប៉ះទង្គិចគ្នាដោយដំបងនិងគប់ដុំថ្ម។
នោះជាការប៉ះទង្គិចគ្នាដែលមានមនុស្សបាត់បង់ជីវិតច្រើនលើកដំបូង នៅតំបន់ព្រំដែននេះចាប់តាំងពីការប៉ះទង្គិចគ្នាធំ កើតមាននៅតំបន់នោះកាលពីឆ្នាំ១៩៦៧មក រវាងមហាអំណាចនុយក្លេអ៊ែរ នៅជាប់ជិតខាងគ្នាទាំង២ ដែលក៏ជាប្រទេស២ដែលមានប្រជាជនច្រើនជាងគេនៃពិភពលោកដែរ។
ឥណ្ឌា និងចិន បានទម្លាក់ដាក់គ្នាទៅវិញទៅមក ពីការទទួលខុសត្រូវចំពោះឧប្បត្តិហេតុនោះ ដែលផ្ទុះឡើង ខណៈដែលការជួបគ្នាត្រូវបានរៀបចំធ្វើ រវាងមេបញ្ជាការយោធានៃប្រទេសទាំង២ ដើម្បីប៉ុនប៉ងសម្រាលភាពតានតឹង ដែលមានការកើនឡើង ក្នុងតំបន់នោះចាប់ពីដើមខែឧសភាមក។
រយៈពេលប៉ុន្មានសប្ដាហ៍ចុងក្រោយនេះ កើតមានឧប្បត្តិហេតុជាច្រើន នៅតំបន់ហ៊ីម៉ាឡៃយ៉ាខាងលិចនោះ តែពុំបណ្ដាលឲ្យមានជនរងគ្រោះឡើយ ។
មហាប្រទេសនៅអាស៊ីទាំង២នេះ មានជម្លោះដែនដីតាមព្រំដែនដ៏វែង របស់ពួកគេនៅហ៊ីម៉ាឡៃយ៉ាមានប្រវែងដល់ទៅ ៣.៥០០គីឡូម៉ែត្រដែលគូសវាស ក្រោយសង្គ្រាមដ៏ខ្លីមួយរវាងប្រទេសទាំង២កាលពីឆ្នាំ ១៩៦២។
កងទ៏ពឥណ្ឌា ដំបូងនាថ្ងៃទី១៦ មិថុនា ប្រកាសពីការបាត់បង់ជីវិតរបស់នាយទាហានម្នាក់ និងកូនទាហានខ្លួន២នាក់ ហើយលើកពីការបាត់បង់ជីវិត ទាំងសងខាង។ នាវេលាល្ងាចកងទ័ពនោះរៀបរាប់ ពីទាហាន១៧នាក់រងរបួសធ្ងន់ ហើយបានបាត់បង់ជីវិតដោយសាររបួសធ្ងន់ពេក។ ចិនក៏លើកពីបណ្ដាអ្នកត្រូវបានបាត់បង់ជីវិត និងរបួសតែមិនបញ្ជាក់ពីចំនួនឡើយ។
ក្រោយការប៉ះទង្គិចគ្នាដ៏បង្ហូរឈាមនោះ ពលរដ្ឋឥណ្ឌាបានលើកគ្នាធ្វើបាតុកម្មប្រឆាំងការឈ្លានពានរបស់ចិន។
អ្នកនាំពាក្យក្រសួងការបរទេសឥណ្ដាបានទម្លាក់ការទទួលខុសត្រូវនៃឧប្បត្តិហេតុនោះ លើចិនដោយបរិហារថា ជាការប៉ុនប៉ងចង់ផ្លាស់ប្ដូរជាឯកតោភាគី ស្ថានភាពនៅតំបន់ព្រំដែននោះ។ ចំណែកអ្នកនាំពាក្យក្រសួងការបរទេសចិន បានចោទប្រកាន់កងទ័ពឥណ្ឌាថា បានឆ្លងកាត់ព្រំដែន២លើក មុនពេលធ្វើសកម្មភាពខុសច្បាប់នានានិងបង្កហេតុ រួចវាយប្រហារលើកងទាហានចិន ដែលនាំឲ្យមានការប៉ះទង្គិចធ្ងន់ធ្ងរខ្លួនទល់នឹងខ្លួន៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ