រាជធានីភ្នំពេញ ៖ បុរសម្នាក់មិនអស់ចិត្ត ក្រោយពីឮម្តាយមីងនិយាយថា ប្រពន្ធនាំសហាយមកដេកក្នុងបន្ទប់ជួល ក៏នាំគ្នាពីរនាក់ប្តីប្រពន្ធទៅសួរម្តាយមីងដើម្បីឱ្យដឹងរឿងច្បាស់ ស្រាប់តែបង្កជាជម្លោះរហូតដល់ប្រើហិង្សា ដោយបុរសជាប្អូនថ្លៃជីដូនមួយបានទាញកាំបិតបុ័ងតោកាប់ទៅលើបុរសជាបងថ្លៃជីដូនមួយ បណ្តាលឲ្យរងរបួសរយះដៃ ។…
រាជធានីភ្នំពេញ ៖ បុរសម្នាក់មិនអស់ចិត្ត ក្រោយពីឮម្តាយមីងនិយាយថា ប្រពន្ធនាំសហាយមកដេកក្នុងបន្ទប់ជួល ក៏នាំគ្នាពីរនាក់ប្តីប្រពន្ធទៅសួរម្តាយមីងដើម្បីឱ្យដឹងរឿងច្បាស់ ស្រាប់តែបង្កជាជម្លោះរហូតដល់ប្រើហិង្សា ដោយបុរសជាប្អូនថ្លៃជីដូនមួយបានទាញកាំបិតបុ័ងតោកាប់ទៅលើបុរសជាបងថ្លៃជីដូនមួយ បណ្តាលឲ្យរងរបួសរយះដៃ ។
ហេតុការណ៍ខាងលើនេះបង្កឲ្យមានការភ្ញាក់ផ្អើលកាលពីវេលាម៉ោង១២និង៥០នាទីរំលងអាធ្រាត្រឈានចូលថ្ងៃទី១៧ ខែមិថុនា ឆ្នាំ២០២០ ត្រង់ចំណុចបន្ទប់ជួលគ្មានលេខ ក្បែរបុរីភ្នំពេញថ្មីទឹកថ្លា តាមបណ្ដោយផ្លូវបេតុង ក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
បុរសរងគ្រោះជាបងថ្លៃជីដូនមួយឈ្មោះ ខុត នឿន ភេទប្រុស អាយុ៣២ឆ្នាំ ជាអ្នកលាងម៉ូតូ ស្នាក់នៅផ្ទះជួលមួយកន្លែងនៅខាងក្រោយសាកលវិទ្យាល័យអាយយូ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ ចំណែកជនដៃដល់ជាប្អូនថ្លៃជីដូនមួយ មិនស្គាល់អត្តសញ្ញាណនោះទេ បានរត់គេចខ្លួនបាត់ ។
តាមប្រភពពីបុរសរងគ្រោះបានរៀបរាប់ប្រាប់ឲ្យដឹងថា គាត់ និងក្រុមគ្រួសារបានមកស្នាក់នៅកន្លែងកើតហេតុអស់រយៈពេលជាយូរឆ្នាំណាស់មកហើយ ។ ចំណែកក្រុមគ្រួសារម្តាយមីងក៏បានមកស្នាក់នៅបន្ទប់ជួលក្បែរគ្នាផងដែរ ប៉ុន្តែរវាងគ្រួសារគាត់ និងគ្រួសារម្តាយមីងមិនត្រូវគ្នាអស់រយៈពេលជាជាច្រើនឆ្នាំកន្លងមកហើយ គឺធ្លាប់មានរឿងរ៉ាវឈ្លោះប្រកែកគ្នាជាហូរហែរ តែមិនដែលបង្កជាអំពើហិង្សាដាក់គ្នានោះទេ ។
តាមប្រភពដដែលបានបន្តថា ព្រោះតែការរស់នៅមិនសូវចុះសម្រុងនឹងគ្នា ទើបគាត់រួមទាំងគ្រួសារបានទៅជួលបន្ទប់មួយផ្សេងទៀតនៅឯខាងក្រោយសាកលវិទ្យាល័យអាយយូ ហើយការជួលបន្ទប់នៅភូមិឃុំកើតហេតុខាងលើនោះគឺដើម្បីធ្វើជាកន្លែងលាងម៉ូតូនៅពេលថ្ងៃ ដើម្បីរកស៊ីចិញ្ចឹមប្រពន្ធនិងកូន រហូតដល់ពេលយប់ ទើបត្រឡប់ទៅស្នាក់នៅផ្ទះជួលនៅសង្កាត់ទឹកថ្លាវិញ។
តាមប្រភពដដែលបានបន្តថា នៅថ្ងៃកើតហេតុ គាត់បានមកកន្លែងលាងម៉ូតូដែលជាកន្លែងរបស់គាត់ប្រកបរបររកស៊ីដូចសព្វដង។ រហូតដល់ល្ងាចថ្ងៃដដែល គាត់ក៏បានរៀបចំបិទកន្លែងលាងម៉ូតូ ដើម្បីត្រឡប់ទៅសំរាកនៅឯផ្ទះជួលក្នុងសង្កាត់ទឹកថ្លាវិញ ខណៈពេលដែលគាត់កំពុងងូតទឹក ក៏បានឮម្តាយមីងបង្កើតនិយាយ ថា ប្រពន្ធរបស់គាត់បាននាំប្រុសសហាយមកដេកដល់ក្នុងបន្ទប់ ។ ពេលបានលឺដូច្នេះ គាត់ក៏មិនបាននិយាយតបតឈ្លោះប្រកែកទៅវិញនោះទេ ដោយចាកចេញត្រឡប់ទៅបន្ទប់ជួលក្នុងសង្កាត់ភ្នំពេញថ្មី
វិញ។
តាមប្រភពដដែលបានបន្តទៀតថា ពេលដែលត្រឡប់មកដល់បន្ទប់ជួលក្នុងសង្កាត់ទឹកថ្លា ដោយមិនអស់ចិត្តនឹងពាក្យសម្ដីរបស់ម្តាយមីង ដែលគាត់បានឮ រហូតដល់វេលាកើតហេតុ គាត់ក៏សម្រេចចិត្តសួរនាំប្រពន្ធទៅសួរពីរឿង(ប្រពន្ធនាំប្រុសសហាយមកដេកក្នុងបន្ទប់ជួល)ដែលគាត់បានឮពីម្តាយមីងបង្កើតនិយាយ ជាហេតុធ្វើប្រពន្ធរបស់គាត់ខឹងយ៉ាងខ្លាំងនឹងសម្តីដែលម្តាយមីងនិយាយមួលបង្កាច់ ដោយមិនអស់ចិត្ត ទើបពួកគាត់ទាំងពីរនាក់ប្តីប្រពន្ធក៏នាំគ្នាទៅសួរនាំម្តាយមីងដើម្បីឱ្យដឹងរឿងច្បាស់។
តាមប្រភពដដែលបានបន្តទៀតថា ពេលដែលទៅដល់កន្លែងកើតហេតុ ពួកគាត់ទាំង២នាក់ប្តីប្រពន្ធក៏បានសួរនាំរឿងរ៉ាវ រហូតទាស់ពាក្យសម្តីគ្នា ក៏កើតជាជម្លោះឈ្លោះប្រកែកគ្នា ខណៈពេលនោះដែរ ស្រាប់តែបុរសម្នាក់ដែលត្រូវជាប្អូនថ្លៃជីដូនមួយបង្កើតរបស់គាត់ បានស្ទុះទៅទាញកាំបិតបុ័ងតោកាប់មកលើគាត់ត្រូវចំដៃខាងឆ្វេងរយះឈាមហូរស្រោចខ្លួន។ បន្ទាប់មក គាត់ក៏បានរត់ទៅប្តឹងសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលទឹកថ្លាឲ្យចុះមកធ្វើអន្តរាគមន៍ តែនៅពេលដែលសមត្ថកិច្ចចុះមកដល់ ជនដៃដល់បានរត់គេចខ្លួនបាត់ស្រមោលបាត់ទៅហើយ ។
ក្រោយពេលកើតហេតុ សមត្ថកិច្ចបានអោយជនរងគ្រោះទៅព្យាបាលរបួសនៅឯមន្ទីរពេទ្យសិន រង់ចាំព្រឹកថ្ងៃទី១៧ មិថុនា មកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទឹកថ្លា ដើម្បីឲ្យកម្លាំងសមត្ថកិច្ចចុះទៅធ្វើការតាមនីតិវិធី ។
ពាក់ព័ន្ធនឹងករណីខាងលើនេះដែរ នៅពេលកើតហេតុភ្លាមៗ ភាគីខាងម្តាយមីងមិនទាន់មានការបំភ្លឺណាមួយជុំវិញហេតុការណ៍ដែលបានកើតឡើងនៅឡើយទេ ៕ (កែសម្រួលដោយ ៖ ធីតា)
ចែករំលែកព័តមាននេះ