ប្រទេសឥណ្ឌា ៖ តាមប្រភពព័ត៌មាន Oddity Central បានឱ្យដឹងថា គ្រូមន្តអាគមដែលប្រកាសដោយខ្លួនឯងថា អាចព្យាបាលជំងឺគ្រប់បែបយ៉ាង រួមទាំងជំងឺកូវីដ១៩ផងដែរ ដោយគ្រាន់តែថើបដៃតែប៉ុណ្ណោះ ប៉ុន្តែពេលថ្មីៗនេះ គ្រូមន្តអាគមរូបនេះបានទទួលមរណភាពហើយ ដោយសារតែជំងឺកូវីដ១៩ ។
គ្រូមន្ត ដែលគេស្គាល់ថា មានឈ្មោះ Aslam បានប្រាប់អ្នកដើរតាមនៅ Ratlam រដ្ឋ Madhya Pradesh ប្រទេសឥណ្ឌាថា ការថើបដើម្បីព្យាបាល គឺជាវិធីមួយដែលអាចព្យាបាលជំងឺគ្រប់ប្រភេទ។ តែជាអកុសលការព្យាបាលដ៏អស្ចារ្យរបស់លោក មិនមានប្រសិទ្ធភាពល្អសម្រាប់លោកឡើយ ព្រោះតែនៅថ្ងៃទី៣ ខែមិថុនា លោកត្រូវបានគេរកឃើញថា មានផ្ទុកជំងឺកូវីដ១៩ ហើយក៏បានទទួលមរណភាពនៅថ្ងៃបន្ទាប់។ អ្នកជឿលោក មានការភ័យព្រួយយ៉ាងខ្លាំង ហើយទើបតែដឹងថា ការថើបនេះ គឺគ្រាន់តែជាការនាំមេរោគពីមនុស្សម្នាក់ទៅមនុស្សម្នាក់ទៀតប៉ុណ្ណោះ។
អាជ្ញាធរក្នុងតំបន់ បានចាប់ផ្តើមបង្កើតសកម្មភាពភ្លាមៗ នៅពេលដែលគ្រូមន្តគាថា ត្រូវបានគេរកឃើញថា មានផ្ទុកជំងឺកូវីដ១៩ ហើយបានចាប់ផ្តើមស្វែងរកមនុស្សដែលបានប្រើប្រាស់សេវាការព្យាបាលរបស់គ្រូម្នាក់នេះ។ ក្នុងចំណោមមនុស្ស៤០នាក់ ដែលពួកគេបានធ្វើតេស្តនោះ មាន២០នាក់បានធ្វើតេស្តរកឃើញជំងឺកូវីដ១៩។ តាមពិតក្នុងចំណោមករណីទាំង២៤ ដែលបានបញ្ជាក់នៅក្នុងរដ្ឋ Ratlam នៅថ្ងៃទី៩ ខែមិថុនា ចំនួនអ្នកឆ្លង១៣នាក់ បានទាក់ទងយ៉ាងជិតស្និទ្ធជាមួយគ្រូមន្តរូបនេះ។
លោក Ruchika Chouha នាយកមន្ទីរសុខាភិបាលបានប្រាប់កាសែត Times of India ថា៖ «២០នាក់ក្នុងចំណោមពួកគេ រួមទាំងគ្រួសារ៧នាក់របស់ពួកគេបានធ្វើតេស្តវិជ្ជមាន»។
គ្រូមន្ត Aslam មិនមែនជាមនុស្សដំបូង ដែលអះអាងថា អាចព្យាបាលជំងឺកូវីដ១៩ បាននោះទេ។ កាលពីខែមុន មានគ្រូជនជាតិនីហ្សេរីយ៉ា ដែលគេស្គាល់ម្នាក់បានប្តេជ្ញាធ្វើដំណើរទៅប្រទេសចិន ដើម្បីបំផ្លាញជំងឺកូវីដ១៩ ឱ្យអស់ពីប្រទេស។ តែគាត់មិនបានធ្វើតាមអ្វីដែលគាត់បាននិយាយឡើយ៕ ដកស្រង់ចេញពីវេបសាយ ៖ odditycentral (កែសម្រួលដោយ ៖ បុប្ផា)
ចែករំលែកព័តមាននេះ