រាជធានីភ្នំពេញ ៖ បន្ទប់ជាន់ទី២នៃវីឡាភ្លោះបុរីដឹមេគង្គរ៉ូយ៉ាល់មួយកន្លែង បានឆ្លងចរន្តក្លាយជាអគ្គីភ័យ ឆាបឆេះអស់គ្រឿងក្នុង បង្កអោយមានកាភ្ញាក់ផ្អើលដល់អាជ្ញាធរនិងសមត្ថកិច្ចហៅរថយន្តពន្លត់អគ្គីភ័យ ជាច្រើនគ្រឿងទៅអន្តរាគមន៍ ។ នៅពេលមានអគ្គីភ័យកើតឡើង អ្នកយកព័ត៌មានត្រូវបានក្រុមសន្តិសុខឃាត់មិនអោយចូលទៅផ្តិតយករូបភាពឡើយ ។
ហេតុការណ៍អគ្គីភ័យខាងលើនេះបានកើតឡើងកាលពីវេលាម៉ោង២និង២០នាទីរសៀលថ្ងៃទី១៦ ខែមិថុនា ឆ្នាំ២០២០ នៅចំណុចផ្ទះលេខ LH-07 ផ្លូវ M-06 បុរីដឹមេគង្គរ៉ូយ៉ាល់ ក្នុងសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។
ម្ចាស់ផ្ទះវីឡាកើតហេតុខាងលើឈ្មោះ ណុប សូវើនៀរ ភេទស្រី អាយុ៣៨ឆ្នាំ ជាមេផ្ទះ ។
តាមប្រភពព័ត៌មានបានអោយដឹងថា មុនពេលកើតហេតុ គេឃើញ ភ្លើងបានឆាបឆេះបន្ទប់ផ្ទះវីឡានៅជាន់ទី២ ដោយមានផ្សែងហុយទ្រលោម និងបង្កអោយមានការភ្ញាក់ផ្អើល ។ ភ្លាមៗនោះរថយន្តពន្លត់អគ្គីភ័យ របស់ស្នងការនគរបាលរាជធានីភ្នំពេញ និងក្រុមហ៊ុន OCIC សរុបចំនួន៧គ្រឿងបានចុះមកជួយអន្តរាគមន៍ ដោយបាញ់ទឹកពន្លត់អស់២គ្រឿង ទើបភ្លើងបានរលត់ទៅវិញ ប៉ុន្តែពុំបណ្តាលអោយឆេះរាលដាលឡើយ ។
តាមប្រភពពីនគរបាលបានអោយដឹងថា មូលហេតុដែលនាំឱ្យកើតមានអគ្គីភ័យខាងលើ គឺបណ្តាលមកពីឆ្លងចរន្តអគ្គីសនី ហើយកំទេចផ្កាភ្លើងបានធ្លាក់ទៅលើពូក បណ្តាលឱ្យកើតមានអគ្គីភ័យតែម្តង។
តាមប្រភពពីនគរបាលអោយដឹងទៀតថា សម្ភារៈនៅក្នុងបន្ទប់ទំហំ៣ម៉ែត្រx៤ម៉ែត្រដែលរងការខូចខាតរួមមាន គ្រែ ពូក ពិតាន និងសម្ភារៈមួយចំនួនទៀត ត្រូវភ្លើងឆេះរងការខូចខាតទាំងស្រុង តែពុំបណ្តាលឱ្យមនុស្សណាម្នាក់រងរបួសឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ