បើនិយាយដល់រឿងប្រើប្រាស់រថយន្តនិងការកាន់ចង្កូតយ៉ាងស្ទាត់ជំនាញនោះ វាពិតជាអាចទៅរួចចំពោះមនុស្សដែលមានវ័យរាងរេបន្តិច នៅតែបើកបរដោយសុវត្ថិភាពដូចពាក្យចាស់ពោលថា «ម្ទេសកាន់តែចាស់ គឺកាន់តែហិល» ។ ប៉ុន្តែទោះជាយ៉ាងណា វាគឺជាកត្តាសំខាន់បំផុតចំពោះការបើកបរមួយដែរ ប្រសិនបើវ័យរបស់គាត់វិវឌ្ឍន៍ទៅជាមួយនឹងសមត្ថភាពអនុវត្តជាក់ស្តែង ឆ្លុះបញ្ចាំងពីហានិភ័យយ៉ាងច្បាស់នឹងភ្នែកនោះ ។
សូមលើកយកនូវវិធីសាស្ត្រគួរប្រតិបត្តិសម្រាប់មនុស្សចាស់ក្នុងការបើករថយន្តឱ្យធានាបានសុវត្ថិភាពដូចតទៅ៖
១-ចូរចៀសវាងការបើកបរក្នុងអំទ្បុងពេលនៃលក្ខខណ្ឌផ្លូវ ដែលពិបាកក្នុងការបញ្ជាយានរបស់ខ្លួន ។ បើអាចធ្វើទៅបានគួរជ្រើសយកការធ្វើដំណើរតែនៅពេលថ្ងៃ ទើបជាការប្រសើរ ។ ជាមួយគ្នានោះដែរ ចៀសវាងបើករថយន្តពេលយប់ងងឹត ថ្ងៃទើបនិងរះ ឬពេលព្រលប់ៗ ។
២-ចៀសវាងបើកបរនៅពេលអាកាសធាតុមិនអំណោយទានដូចជា ពេលភ្លៀងធ្លាក់ផ្លូវរអិល ឬមេឃចុះអ័ព្ទជាដើម ។ ស្ថានភាពបែបនេះអាចកាត់បន្ថយលទ្ធភាពមើលឃើញឧបសគ្គដល់ពួកគាត់ជាក់ជាមិនខាន ។
៣-កាត់បន្ថយថេរវេលាធ្វើដំណើរ ក៏ដូចជាការឧស្សាហ៍បើករថយន្តទៅណាមកណាញឹកញាប់ ។
៤-គួរបើកតែនៅលើផ្លូវ ឬទីតាំងភូមិសាស្ត្រដែលអ្នកស្គាល់ច្បាស់ ទើបជាការប្រសើរនិងមិននាំរឿងចូលផ្ទះ ។
៥-ចៀសវាងបើករថយន្តទៅណាមកណាតែឯង ។ ការបន្ថែមនរណាម្នាក់ឱ្យជិះក្នុងរថយន្តអាចជួយរក្សាការក្រើនរំលឹកពីស្ថានការណ៍គ្រោះថ្នាក់ និងលក្ខខណ្ឌផ្សេងៗបានកាន់តែល្អទ្បើង ។
៦-ចៀសវាងបើកលើថ្នល់ជាតិនៅពេលដែលមានរថយន្តច្រើនចរាចរណ៍លើផ្លូវនោះ ឬក៏ស្ថានភាពចរាចរណ៍លំបាកៗមួយចំនួន ។
៧-ជម្រះចេញនូវកិច្ចការដែលរំខានផ្សេងៗ ខណៈពេលបើកបរ ពោលគឺផ្តោតអារម្មណ៍ផ្ចង់ស្មារតីលើការបញ្ជាយានរបស់ខ្លួននិងធ្វើយ៉ាងណាឱ្យទទួលបានសុវត្ថិភាព ។
៨-ប្រើក្រសែភ្នែកសម្លឹងមើលឱ្យបានទៀងទាត់ និងរក្សាទីតាំងកញ្ចក់មើលក្រោយឱ្យបានត្រឹមត្រូវ ។
៩-ព្យាយាមបើកបរឱ្យស្ថិតក្នុងល្បឿនដែលច្បាប់បានកំណត់ទៅតាមគោលដៅនីមួយៗ ។ កុំបោះពួយលើសឬក្រោមល្បឿនកំណត់ច្រើនពេក ។
១០-ចូរប្រុងប្រយ័ត្នចំពោះយានយន្តដែលនៅជុំវិញ ឬក្នុងគន្លងផ្លូវជាមួយនិងផ្លូវដទៃ ។
១១-រក្សារថយន្តរបស់អ្នកក្នុងលក្ខខណ្ឌប្រក្រតីមិនខូចនៅចំណុចណាមួយមុនចេញដំណើរ ។
១២-ពិគ្រោះសុំយោបល់ពីឱសថការី ក៏ដូចជាវិជ្ជបណ្ឌិតថា តើលោកអ្នកគួរប្រើប្រាស់ឱសថ ឬយ៉ាងណា ប្រសិនបើអ្នកហាក់ដូចជាមានអារម្មណ៍លង់លក់ពេលកាន់ចង្កូតរថយន្តម្តងៗ ៕
ចែករំលែកព័តមាននេះ