រាជធានីភ្នំពេញ ៖ កម្មករ និងក្រុមជាងសាងសង់សំណង់ផ្សារទំនើប DNC MALL ប្រមាណ៤០នាក់ ក្នុងចំណោមប្រមាណជាង១០០នាក់បាននាំគ្នាមិនធ្វើការ ហើយនាំគ្នាលើកបដាព្រោងព្រាត ដើម្បីទាមទារប្រាក់ខែចំនួន៣ខែ…
រាជធានីភ្នំពេញ ៖ កម្មករ និងក្រុមជាងសាងសង់សំណង់ផ្សារទំនើប DNC MALL ប្រមាណ៤០នាក់ ក្នុងចំណោមប្រមាណជាង១០០នាក់បាននាំគ្នាមិនធ្វើការ ហើយនាំគ្នាលើកបដាព្រោងព្រាត ដើម្បីទាមទារប្រាក់ខែចំនួន៣ខែ ដែលក្រុមហ៊ុនមិនទាន់បើកអោយកម្មករ ។
ហេតុការណ៍ខាងលើនេះបានកើតឡើងកាលពីព្រឹកថ្ងៃទី១៦ ខែ មិថុនា ឆ្នាំ ២០២០ ដោយកម្មករ និងក្រុមជាងសំណង់ បាននាំគ្នាឈរត្រៀបត្រាលើកបដានៅមុខទីតាំងការដ្ឋានសំណង់ផ្សារទំនើប DNC MALL ស្ថិតនៅតាមបណ្តោយផ្លូវ៣១៥ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។
នៅព្រឹកនោះដែរ គេឃើញកម្មករបាននាំគ្នាលើកបដាព្រោងព្រាត ដោយមានខ្លឹមសារ ថា «ក្រុមហ៊ុន មិនបានបើកលុយអោយពួកយើងចំនួន៣ខែហើយ», «ក្រុមហ៊ុន DNC ត្រូវតែបើកលុយអោយកម្មករ » ជាដើម ។
តាមប្រភពពីកម្មករបានអោយដឹងថា រយៈពេលប្រមាណ៣ខែមកហើយ ដែលក្រុមហ៊ុនសាងសង់ផ្សារទំនើប DNC MALL មិនបានបើកប្រាក់ខែអោយពួកគាត់ ដោយសន្យារហូត ទើបពួកគាត់នាំគ្នាលើកបដា ដើម្បីទាមទារប្រាក់ខែ។
តាមប្រភពពីក្រុមកម្មករបានអោយដឹងទៀតថា នៅថ្ងៃទី១៥ ខែមិថុនា ដែលជាថ្ងៃក្រុមហ៊ុនសន្យាថាបើកប្រាក់ខែអោយកម្មករ តែមិនមានប្រាក់បើកឱ្យ ទើបកម្មករក៏បាននាំគ្នាធ្វើបាតុកម្មបិទផ្លូវម្តងមកហើយនៅវេលាល្ងាច ។ លុះនៅព្រឹកថ្ងៃទី១៦ ខែមិថុនា ក៏បាននាំគ្នាបន្តធ្វើកូដកម្មនៅមុខការដ្ឋានតែម្តង ។
តាមប្រភពពីកម្មករបានអោយដឹងទៀតថា មូលហេតុដែលមិនមានប្រាក់អោយកម្មករ ដោយសារតែម្ចាស់ក្រុមហ៊ុនដែលជាម្ចាស់អាគារអត់ទំលាក់ប្រាក់អោយក្រុមហ៊ុន ដែលជាអ្នកម៉ៅការសាងសង់ ហើយពួកគាត់មិនដឹងថា មកមូលហេតុអ្វីនោះទេ ។ ប្រាក់ខែរបស់កម្មករក្នុង១ខែ ប្រមាណ២០០ដុល្លារទៅ៣០០ដុល្លារ ។ ចំណែកប្រាក់ខែជាងវិញប្រមាណ៤០០ដុល្លារ ទៅ៦០០ដុល្លារជាង ។
លោកកែ ប៊ុន ហួរ ជាតំណាងក្រុមហ៊ុនYUTI BUILDING DECORATION ENGINERRING (CAMBODIA) CO;LTD ដែលជាក្រុមហ៊ុន ម៉ៅការសាងសង់ ទាំងសម្ភារះ បានអោយដឹងថា ដោយសារតែក្រុមហ៊ុនម្ចាស់អាគារមិនបានទំលាក់ប្រាក់តាមកិច្ចសន្យា ទើបធ្វើអោយក្រុមហ៊ុនរបស់ខ្លួនដែលជាអ្នកម៉ៅការពុំមានប្រាក់បើកអោយថ្លៃពលកម្ម ។
តាមប្រភពពីតំណាងរូបនោះបានអោយដឹងថា សំណង់ផ្សារទំនើបនេះ តាមគម្រោងមាន៣ជាន់កន្លះ សាងសង់រយៈពេល១ឆ្នាំ ហើយរហូតមកដល់ថ្ងៃនេះ សង់មានប្រមាណ៩០ភាគរយហើយ ។ មុនដំបូង ដំណើរការល្អ ទើបតែ៣ខែមានបញ្ហា ក្រុមហ៊ុនម្ចាស់សំណង់មិនបានទំលាក់ប្រាក់តាមកិច្ចសន្យា ទើបកម្មករបានផ្អាកការងារប្រមាណ១សប្តាហ៍មកហើយ ។ មុនការតវ៉ា ក្រុមហ៊ុនខ្លួនដែលជាអ្នកម៉ៅការបានស្នើសុំប្រាក់៥០ម៉ឺនដុល្លារមិនបាន ហើយបានធ្វើការចរចាប្រមាណ៥ទៅ៦ដង មិនបាន ទើបកម្មករនាំផ្អាកការងារ និងនាំគ្នាតវ៉ាទាមទារប្រាក់ខែតែម្តង ។
ទោះបីជាយ៉ាងណា កោះសន្តិភាព ពុំទទួលបានការបំភ្លឺណាមួយពីក្រុមហ៊ុនផ្សារទំនើប DNC MALLឡើយ៕ (កែសម្រួលដោយ ៖ ធីតា)
ចែករំលែកព័តមាននេះ