សហរដ្ឋអាមេរិក ៖ ប្រធានាធិបតីអាមេរិកលោកដូណាល់ត្រាំ អះអាងនាថ្ងៃទី១៥មិថុនាថា លោកពិតជាចង់កាត់បន្ថយច្រើនចំនួនទាហានអាមេរិកដែលបោះទីតាំងនៅអាល្លឹម៉ង់ ដោយ ប្រើប្រាស់សន្តិសុខអឺរ៉ុបជាទម្ងន់ ក្នុងការចរចាពាណិជ្ចកម្មរបស់ខ្លួនជាមួយក្រុងប៊ែរឡាំង។
ប្រធានាធិបតីអាមេរិកអះអាងទៅកាន់សារព័ត៌មានថា ទាហានអាមេរិកប្រមាណជា៥២.០០០នាក់បច្ចុប្បន្នស្ថិតនៅអាល្លឺម៉ង់ ជាកងកម្លាំងយោធាអាមេរិកដ៏សំខាន់ក្នុងកងកម្លាំងអូតង់។ លោកបន្តថានោះជាការចំណាយប្រាក់ដ៏ច្រើនសម្រាប់សហរដ្ឋអាមេរិក។ យើងនឹងកាត់បន្ថយចំនួនហើយនឹងទុកនៅត្រឹម២៥.០០០នាក់។
តាមតួលេខផ្លូវការរបស់មន្ទីរប៉ង់តាហ្គោនថា ចំនួនទាហានអាមេរិកដាក់ពង្រាយនៅអាល្លឺម៉ង់ ជាអចិន្ត្រៃយ៍ តាមពិតមានត្រឹម៣៤.៦៧៤នាក់កាលពីខែមីនាឆ្នាំ២០២០ តែតួលេខនោះអាចបង្កើនដល់៥២.០០០នាក់ ដោយសារការដូរវេនគ្នាឬការមកចូលរួមក្នុងសមយុទ្ធយោធានានា។ បណ្ដាមូលដ្ឋានយោធាអាមេរិកនៅអាល្លឹម៉ង់ តាមពិតប្រើសម្រាប់ការឈប់សំចត ចំពោះកងកម្លាំងដែលដាក់ពង្រាយនៅអឹរ៉ុប អាហ្វ្រិកនិងមជ្ឈឹមបូព៌ា ដែលបែបនោះទើបមានការហក់ឡើងនៃចំនួនយោធាជាបណ្ដោះអាសន្ន។
ព័ត៌មានដំបូងៗពីគម្រោងនោះរបស់រដ្ឋការលោកត្រាំ បណ្ដាលឲ្យមានការព្រួយបារម្ភនៅក្រុងប៊ែរឡាំង ខណៈមានការចេញផ្សាយដោយកាសែតWALL STREET JOURNAL កាលពីដើមខែនេះ។ តួលេខប្រកាសដោយលោកត្រាំនាថ្ងៃទី១៥មិថុនា ទាក់ទិននឹងការវាយតម្លៃរបស់កាសែតនោះដែលថា នឹងមានការកាត់បន្ថយទាហានអាមេរិកនៅអាល្លឹម៉ង់ប្រមាណជា៩.៥០០នាក់ នាំឲ្យចំនួនទាហាននៅសល់ត្រឹម២៥.០០០នាក់។
នាថ្ងៃទី១៥មិថុនានោះដែរ ប្រធានាធិបតីអាមេរិកប្រកាសថា លោកនឹងចុះហត្ថលេខា លើក្រិត្យមួយដែលផ្ដោតលើការកែទម្រង់ កងកម្លាំងប៉ូលិសនិងថា លោកនឹងធ្វើសន្និសីទសារព័ត៌មានមួយស្ដីពីរឿងនោះនាថ្ងៃទី១៦មិថុនា បន្ទាប់ពីបាតុកម្មច្រើនសប្ដាហ៍ នៅទូទាំងសហរដ្ឋអាមេរិក ក្រោយការស្លាប់ជនស្បែកខ្មៅម្នាក់ ពេលប៉ូលិសចាប់ខ្លួនគេ នៅក្រុងមីននីប៉ូលីស មកពីប៉ូលិសស្បែកសម្នាក់យកជង្គង់សង្កត់ករគេដល់ដាច់ខ្យល់៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ