ខេត្តសៀមរាប ៖ អាជ្ញាធរខេត្តសៀមរាបបានដឹកនាំក្រុមសហគ្រិនវ័យក្មេង ទៅពិនិត្យមើលតំបន់អេកូទេសចរណ៍លើភ្នំចង្ក្រានរយ ស្ថិតក្នុងឃុំស្វាយស ស្រុកវ៉ារិន ថា តើយើងត្រូវរៀបចំអ្វីបន្ថែមទៀតនៅដើមខែមិថុនា ឆ្នាំ២០២០ នោះ…
ខេត្តសៀមរាប ៖ អាជ្ញាធរខេត្តសៀមរាបបានដឹកនាំក្រុមសហគ្រិនវ័យក្មេង ទៅពិនិត្យមើលតំបន់អេកូទេសចរណ៍លើភ្នំចង្ក្រានរយ ស្ថិតក្នុងឃុំស្វាយស ស្រុកវ៉ារិន ថា តើយើងត្រូវរៀបចំអ្វីបន្ថែមទៀតនៅដើមខែមិថុនា ឆ្នាំ២០២០ នោះ ដើម្បីទាក់ទាញភ្ញៀវជាតិ និងភ្ញៀវអន្តរជាតិឲ្យមកទស្សនាកាន់តែច្រើនថែមទៀត ។
បើតាមប្រសាសន៍របស់លោក នាក់ ណេរ៉ុន អភិបាលរងខេត្តបានមានប្រសាសន៍ថា សហគមន៍ ព្រៃឈើចង្ក្រានរយនេះ មិនត្រឹមតែជាតំបន់អេកូទេសចរណ៍ធម្មជាតិប៉ុណ្ណោះទេ វាក៏ជាយុទ្ធសាស្ដ្រ មួយជួយកាត់បន្ថយការប្រែប្រួលអាកាសធាតុផងដែរ ពីព្រោះព្រៃសហគមន៍នោះ មានទាំងព្រៃ ស្រោង និងព្រៃរបោះ ដែលគ្របដណ្ដប់ដោយព្រៃឈើប្រមាណជិត១ ម៉ឺនហិកតាឯណោះ។ ម្យ៉ាងទៀត តំបន់អេកូទេសចរណ៍ទាំងនេះ កំពុងបង្ហាញខ្លួន ដើម្បីរង់ចាំអ្នកទេសចរណ៍មកកំសាន្ដ ដោយមានទាំងតំបន់ទេចរណ៍ធម្មជាតិ និងប្រវត្ដិសាស្ដ្រផងដែរ ។
លោកបានបន្ដថា តំបន់នេះ វាមានការទាក់ទាញអ្នកទេសចរណ៍ បែបពនេចរ ដើរផ្សងព្រេងគ្រប់ជាតិសាសន៍ជាដើម។ ដោយឡែកចំពោះព្រៃឈើ វាជួយកាត់បន្ថយនូវភាពបន្សាំទៅនឹងការប្រែប្រួលអាកាសធាតុ នឹងចូលរួមលើកកម្ពស់ជីវភាពក្នុងការរស់នៅរបស់ប្រជាជននៅក្នុងតំបន់នេះ និងការអភិរក្សប្រកបដោយនិរន្ដរភាពទៅថ្ងៃអនាគតផងដែរ។
ចំណែកលោក គឹម លី ប្រធានមន្ទីរពាណិជ្ជកម្មខេត្ត មានប្រសាសន៍ថា សក្តានុពលនៃសហគមន៍ចង្ក្រានរយ នេះ មានតំបន់ទេសចរណ៍អេកូធម្មជាតិប្រមាណជាង៤០កន្លែង ដែលនៅលើខ្នងភ្នំចង្ក្រានរយ ស្ថិតក្នុងឃុំស្វាយស ស្រុកវ៉ារិន ខេត្តសៀមរាប មានចំងាយប្រហែល៨០គីឡូម៉ែត្រ ពីទីរួមខេត្តសៀមរាប។ តំបន់ទេសចរណ៍ព្រៃឈើនេះ វាបានគ្របដណ្តប់ដោយទេសភាពព្រៃឈើនៅលើផ្ទៃដីចំនួនប្រមាណជាង ៩.០០០ ហិកតា ដែលជាជម្រកសត្វព្រៃ និងជីវចម្រុះគ្រប់ប្រភេទ អាចជួយដល់ការរៀបចំអេកូទេសចរណ៍តាមបែបធម្មជាតិ ។
អ្វីជាពិសេសជាងនេះទៀតនោះ ចំពោះភាពទាក់ទាញនៃតំបន់នេះ ជារួមមានដូចជា កន្លែងទឹកជ្រោះនឹងអាចហែលទឹកលេងនារដូវវស្សា ទស្សនាសត្វព្រៃ និងសត្វមេអំបៅ រួមជាមួយការធ្វើដំណើរដោយថ្មើរជើងទៅគយគន់សមុទ្រឈើ ល្អាងប្រជៀវ និងភ្នំចាន់ក្រហម ហើយក៏អាចនាំគ្នាជិះគោយន្ដ ឬជិះកង់កំសាន្ត និងស្វែងយល់ពីវប្បធម៌ធម្មជាតិ ទស្សនាថ្ម នានា ដូចជារូបចង្ក្រាន រាប់រយ រាប់ពាន់ នៅលើភ្នំនោះទៀតផង ហើយនឹងរីករាយជាមួយការរស់នៅបែបជនបទ មិនត្រឹមតែប៉ុណ្ណោះអ្នកទេសចរណ៍ក៏អាចបោះត់ងស្នាក់នៅដោយភាពសប្បាយរីករាយផងដែរ
ជាមួយគ្នានោះ លោក គឹម សួ ប្រធានសហគ្រិនវ័យក្មេងខេត្តសៀមរាប បានបញ្ជាក់ផងដែរថា ក្រុមការងាររបស់យើងមកធ្វើទស្សនកិច្ច ក៏ដូចជាការមកពិនិត្យពីសក្តានុពលនៃសហគមន៍ចង្ក្រានរយ ដែលជាតំបន់អេកូទេសចរណ៍ធម្មជាតិដ៏ស្រស់បំព្រងមួយនេះ ដែលពីមុនមកមានអ្នកទេសចរណ៍ជាតិ និងអន្តរជាតិ តែងតេចូលមកកំសាន្តជាបន្ដបន្ទាប់ ប៉ុន្ដែភាគច្រើនសុទ្ធជាអ្នកទេសចរណ៍បែបលក្ខណជាក្រុមៗ ។ អញ្ចឹងហើយក្រុមការងារសហគ្រិនវ័យក្មេង យើងបានចុះមកពិនិត្យមើលដោយផ្ទាល់ថា យើងត្រូវធ្វើអ្វី និងរៀបចំអ្វីបន្ថែមទៀតក្នុងការទាក់ទាញភ្ញៀវឲ្យចូលមកទស្សនាឲ្យបានច្រើនជាងមុននោះ ។
លោកបានបន្តថា ខាងសហគ្រិនរបស់លោកគ្រោងនឹងបង្កើតកន្លែងមើលសត្វគ្រប់ប្រភេទ និងកន្លែងបោះតង់ ក្នុងការសាកល្បងមើលជាជំហានទី១ ថា តើនៅតំបន់នោះមានសុវត្ថិភាពចំពោះភ្ញៀវឬក៏អត់? ហើយក៏កន្លែងទាំងនោះមានអ្វីប្លែកៗដែលធ្វើឲ្យភ្ញៀវចាប់អារម្មណ៍ដែរឬទេ?
ចែករំលែកព័តមាននេះ